Read Punu 2 Bakaga 4 Bible Online

2 Bakaga 4 - Punu bible

2 Bakaga 4

¹Yilumbu yimosi mugatsi umubiyitsi amatatila Elisee rie: Mulumi ama amafu; guijabi amadumanga Fumu. Musombisitsi amaruga uyibonga baana bami babeji ubavaga baviga bandi.

²Elisee amamuwivula rie: Yi nyurungula uguvayila: Nsinguli, yi yivu nagu o ndagu agu? Mugetu eni amawaka rie: Ngaa na yima yiotsu o ndagu, yika yirura yimatsi buandi.

³Amamuruma rie: Wenda yenavonda birura bipavala ombu bambatsi bagu, gukavonda bipuela.

⁴Gabuga; jenu na baana bagu dukakota o ndagu; dibiga ndagu mbana gukawitila matsi mu birura biotsu; gukasunsanga abimabasa va mugula.

⁵Mbana mugetu eni amamusila. Jogu na baana bandi bamakota o ndagu na amadibiga ndagu; baana bamamuwakisanga birura na jandi amawitilanga matsi.

⁶Birura binobasa amavonda muana andi dibaala rie: Peyi birura bisusu. Tumba amamuwaka rie: Birura bimasuka. Avana matsi mamasukila wandi.

⁷Mugetu eni amagabuga ombu mubiyitsi agumamuruma rie: Weʼ yesumbisa matsi, gukafuta muganu agu; amosialulu dukajanganga jenu na baana bagu.

⁸Yilumbu yisusu Elisee amavioga va Chounem. Avana vamaba yisina yimugetu agumamugoma uyeji o ndagu andi. Ubanda va temu eni kadi divioga amalejanganga ombu mugetu eni.

⁹Mugetu eni amatsingula mulumi andi rie: Guluati, nyilabi yiri dibaala diedidi avu mubiyitsi.

¹⁰Turungi yibuku yindagu yigeyi o julu muansa, tukamunsunsila tangi guna na tavula na yivika na lambi yiri oyevengamanga ava obilanga netu.

¹¹Mua temu jinovioga Elisee amamuegabuga o Chounem na amavengama o yibuku yieni yijulu na amayetsana.

¹²Amaruma musalitsi andi Guehazi rie: Nengila mugetu eni. Guehazi amamunengila; mugetu amamuwagula.

¹³Elisee amatsingula Guehazi rie: Muwivuli rie: Ndeʼ gumatuvayila motsu mana, yi turungula uguvayila? Tuguvosila ombu kaga vo yivunda yibagora yiri guwamusu? Amawaka rie: Nesi, nyitsani va gari batu bami.

¹⁴Elisee amawivula Guehazi rie: Yi ngamuvayila? Guehazi amawaka rie: Agaa na baana bababaala na mulumi andi aka yivunda.

¹⁵Amaruma rie: Munengili. Guehazi amamunengila. Jandi amawenda nandi te no munu ndagu.

¹⁶Elisee amamutsingula rie: Yilima ayiuruga va temu ejiji, gubura muana dibaala. Mugetu amawaka rie: Viaga! Ndeʼ aguvu mubiyitsi, guyafura!

¹⁷Mugetu eni amadila dimi na amabura muana dibaala vana temu eni yilima ayimaduka dedi nana Elisee amamutubulila.

¹⁸Muana amabanguga na yilumbu yimosi amarasuna taji andi ombu batsonsiyitsi.

¹⁹Amasundila ugamuga rie: Muru! Muru! Taji amaruma musalitsi andi rie: Mubeyi ombu nguji andi.

²⁰Musalitsi amamunangula na amayenamubega ombu nguji andi. Muana amaba va tulu nguji andi te na muangulu; mbana amafu.

²¹Mugetu eni amamaia na amasiliga muana va tangi jiElisee, amamudibiga o ndagu; jaʼ beni amapala.

²²Amawenda o manungi, amanengila mulumi andi na amamuvonda rie: Kokolu tsiagu, tindili musalitsi agu umosi na buru jimosi; nyuwenda mbangu mbangu ombu mubiyitsi mbana nyugabuga.

²³Mulumi andi amamamuwivula rie: Dibandu yi guirondili uwenda namunyi ombu gandi? Namunyi tsiri yilumbu yiyisusungi nesi yilumbu yitsona? Amawaka rie: Vagaa diambu.

²⁴Mbana mugetu amarungisa buru yitsiga na amaruma musalitsi andi rie: Lensa tʼwendi. Guyasikama muna nsila pa ngegusikiyi.

²⁵Kabogu mugetu amayenawenda o mukongu uCarmel ombu Elisee. Elisee amamulabilila vala na amatsingula musalitsi andi Guehazi rie: Laba mugetu eni muisi Chounem!

²⁶Yemubengusana mbangu nomuwivula rie: Guji buranga? Mulumi agu na muana agu baji buranga? Mugetu amawagula rie Nyiina.

²⁷Yika etoli ombu Elisee o mukongu uCarmel, amakebuaga va makulu mandi. Guehazi amabambana umusimbula tumba Elisee amavosa rie: Mudundi, munyongu elabi na Fumu amadinsuega.

²⁸Mbana mugetu amagamuga rie: Je nyimaguvonda muana dibaala? Nyisamavosa nagu rie: Guyamfura?

²⁹Elisee amaruma Guehazi rie: Warisa tsanda agu, bonga nguangu ami jimubiyitsi, wenda. Pa gubenguna na mutu muna nsila guyamuvega mbolu; pa mutu oguvega mbolu, guyamuwagula. Gukasunsa nguangu ami va mbami muana.

³⁰Nguji muana; amavosa rie: Fumu jaʼ beni ejabi na ndeʼ beni guijabi! Ngowenda pa ndeʼ beni gugowenda nami! Kabogu Elisee amawenda nandi.

³¹Guehazi amabarela na amasunsa nguangu jiElisee va mbami muana; muana asamapupa ne upupa. Amagabuga uyenabengusana Elisee na amamutsingula rie: Muana agaarambuga.

³²Ava Elisee amatolila o ndagu amalaba yiri muana afu kala, asilugu va tangi andi.

³³Elisee anokota amadibiga diguyi na amasambila Fumu.

³⁴Mbana amanangama o tangi na amagudimina muana; munu andi umadukusunu na munu muana na misu mandi na misu mamuana na makaka mandi na makaka mamuana. Anana amamugudimina; mbana yiusila yimagabuga mu dunyuru dumuana.

³⁵Mbana Elisee amasimbuga na amayenalinganga yiari na yiari o ndagu; mbana amamuenangama o tangi na amamuegudimina muana. Muana amasundila uvaga batsi yisambuali yikumbu na amatiemuna.

³⁶Elisee amaruma Guehazi rie: Nengila nguji muana. Guehazi amamunengila na amawenda ombu Elisee agumamuruma rie: Muebonga muana agu.

³⁷Mugetu eni amakebuaga va makulu maElisee. Mbana amabonga muana andi na amapala.

³⁸Elisee amagabuga o Guilgal na dungosu dunsala dumaba o bulongu. Dibuli dibabiyitsi bamatsana va gusu andi, amaruma musalitsi andi rie: Religa mbiji ajineni tulambila musulu.

³⁹Umosi amawenda o nungi uyedokula magaji; amalaba mfuga jimumbendila na amadokula milunda mijionyi, amabasa yiduaru yiandi.

⁴⁰Ava amaruyila amamipapasa mu mbiji ajimaba musulu tsiri ujaba munongu agu mivu. Kabogu basamarungula unu.

⁴¹Elisee amaruma rie: Mbeyilianu fufu. Amajikuka mu mbiji na amavosa rie: Gabila batu bebaba, banuangingi. Kabogu musulu umabueji.

⁴²Va temu eni dibaala dimosi amaruyila o Baal-Chalicha. Amabeyila mubiyitsi magumabeji mamapa amamavagu na tsangu tsiorsa jiumanga na putu tsigona mu komi andi. Elisee amavosa rie: Bagabili, bakaji.

⁴³Musalitsi andi amamuwivula rie: Yika tsie nyugabila kama batu? Tumba Elisee amavosa rie: Baveyi, baji! Fumu amavosa rie: Boji, te na biusialulu.

⁴⁴Kabogu musalitsi amagabila bambatsi bandi mapa; mamasialulu nana Fumu amavosila.