Read Punu 1 Misamu 15 Bible Online

1 Misamu 15 - Punu bible

1 Misamu 15

¹David amarungisa mandagu o musiengi uDavid; amakunsila yigara yipangini yiNsambi mbura na amayirangiyila ndagu jitsanda uyikotisa.

²Mbana David amavosa rie: yigara yipangini yiNsambi yiunangulungu yika na bisi Levi mu mbari Nsambi amabasola unangulanga yigara yipangini noyikelisanga.

³David amabengusana baIsrael botsu o Jerusalem uyematisa yigara yipangini yiNsambi va mbura aji amayikunsila.

⁴David amabengusana baana bababaala baAaron na bisi Levi.

⁵Vagari ogu vamaba Ouriel agumaba sefu jikama na magumabeji mabisi mukuta uQuehat;

⁶na Assaya agumaba sefu jikama beji na magumabeji babisi mukuta uMerari;

⁷na Joel agumaba sefu jikama na magumarieru mabisi mukuta uGuerchon;

⁸na Chemaya agumaba sefu jikama beji tsibisi mukuta uElissafan;

⁹naEliel agumaba sefu jimagumidunana mabisi mukuta uHebron;

¹⁰na Amminadab agumaba sefu jikama na yigumi na babeji babisi mukuta uOuziel.

¹¹David amanengila Sadoc na Abiatar, bavagulitsi bapagu na Ouriel na Assaya na Joel na Chemaya na Eliel na Amminadab, bisi Levi.

¹²Amabatsingula rie: Jenu duvu basefu bamikuta mibisi Levi; keliomisanu jenu na baana bataji benu; yebonganu yigara yipangini yiNsambi Israel noyimatisa va mbura aji nyimayikunsila.

¹³Jenu dusamaba netu temu ajitega la dibandu Fumu Nsambi etu amatukilisa mukilu udufu. Diwendi rie: tusamamuwivula migaga miyionyi.

¹⁴Bavagulitsi bapagu na bisi Levi amakeliomisa umatisa yigara yipangini yiNsambi Israel.

¹⁵Bisi Levi bamabega yigara yipangini yiNsambi na manguangu va masambaka mogu nana Fumu amarumina Moise.

¹⁶David amaruma bisi Levi usola bawimbitsi uwimbilanga na mufi o julu; jogu babi na bisigu bimunongu na munongu: bangomfi na basambi na bambumbu abi bosalisa usangila.

¹⁷Bisi Levi bamasola Heman muana dibaala uJoel na Assaf muana dibaala uBerekia va mosi na Etan muana dibaala uCouchaya umukuta uMerari.

¹⁸Mbana abamabawamusa ababa: Zacharie na Ben na Yaziel na Chemiramot na Yehiel na Ounni na Eliab na Benaya na Masseya na Mattitia na Eliflehou na Micneya na Obed-Edom na Yeiel.

¹⁹Bawimbitsi abamasolu ababa: Heman na Assaf na Etan, jogu bamaba na bambumbu bakunga aba bamasiganga wandi;

²⁰na Zacharie na Aziel na Chemiramot na Yehiel na Ounni na Eliab na Masseya na Benaya, jogu bamaba na bangomfi abamaba na tindi mufi;

²¹na Mattitia na Eliflehou na Micneya na Obed-Edom na Yeiel na Azazia, jogu bamaba na basambi abamaba na yinana yimikudu uyenawendisa nyimbu.

²²Kenania sefu jibisi Levi amasolu ubawendisanga mu mbari amaba na tindi muwimbitsi.

²³Berekia na Elcana bakelisi bamakotulu maNdagu Nsambi bamavegu mbura bebeli na yigara yipangini,

²⁴va mosi na bakelisi bamakotulu basusu: Obed-Edom na Yehia. Mbe ka bavagulitsi bapagu: Chebania na Yochafat na Netaneel na Amassai na Zacharie na Benaya na Eliezer, jogu bamasiganga mimbanda va gusu yigara yipangini yiNsambi.

²⁵David na bivunda biIsrael na bivunda bibatosini bamasogama uyematisa yigara yipangini yiNsambi noyipalisa o ndagu Obed-Edom na nsangu jineni.

²⁶Na duwamusu duNsambi bisi Levi bamabeganga yigara yipangini yiNsambi na bamamuvagulila yisambuali yibalumi babangombi na yisambuali yibalumi babindombu.

²⁷David amaduara yilinga ayimavagu na lina; bisi Levi botsu bamaduaranga munongu mosi nesi abamabeganga yigara yipangini nesi bawimbitsi nesi Kenania agumawendisanga bawimbitsi. David amaduara yijungi yibuvagulitsi bupagu ayimavagu na lina.

²⁸BaIsrael botsu bamabega yigara yipangini yiNsambi na nsangu o Jerusalem; bamasiyisa mimbanda mimunongu na munongu na bambumbu na bangomfi na basambi

²⁹Ava yigara yipangini yiNsambi yimakotila o musiengi uDavid, Mikal muana mugetu uSaul amadokimina va fenetera; amalabilila kaga David uyina ayenayina na nsangu, amamulensa o tsi murima.