Read Punu 1 Misamu 17 Bible Online

1 Misamu 17 - Punu bible

1 Misamu 17

¹David amatsana o ndagu andi. Yilumbu yimosi amatsingula Natan mubiyitsi rie: Labati, nyitsani o ndagu ajimarungu na tsimbi tsisedera na yigara yipangini yiNsambi yivu o ndagu tsanda. Yi guitasi?

²Natan amawaka David rie: Yevaga diotsu adi guitasi mu mbari Nsambi aji nagu.

³Ava mukolu Natan amagulu diufi diFumu adimavosa rie:

⁴Weʼ yetsingula musalitsi ami David rie: Fumu jandi rie: Ndeʼ gugotungila ndagu aji nyutsaninanga.

⁵Ubanda na yilumbu ayi nyimapalisa baIsrael o Egypte te na namunyi nyisakatsananga muna ndagu; nyimayenalinganga o gari ndagu jitsanda yiari na yiari.

⁶Mu mbura tsiotsu atsi nyimalinganga na baIsrael, je nyimavosa diambu na mutu mu bifumba biIsrael agu nyimaruma ubungulanga batu bami baIsrael? Je nyimawivula rie: Dibandu yi dugetungili ndagu jisedera?

⁷Gukatsingula musalitsi ami David rie: Fumu Israel jandi rie: Nyimagusola ava gumabila mubungulitsi ubindombu, gumayenadukanga bindombu; nyimagusola uba sefu jibatu bami baIsrael.

⁸Nyimabanganga nagu mu mbura tsiotsu atsi gumawendanga, nyimaboka bavinitsi bagu botsu va misu magu va julu vana nyimaroyisa diina diagu dedi mosi na bakaga basusu babutamba.

⁹Nyuvega batu bami baIsrael mbura ajiuba jijogu beni na bagomuepupusu, batu babi bagomuebalasa maguga nana na kala;

¹⁰ava baIsrael bamarumunu na bansonsi. Nyimaguvega yivumu ava nyimaguwakila kalala ombu bavinitsi bagu. Meʼ beni Fumu nyivosi rie: Nyuguvega bategula.

¹¹Ava bilumbu biagu biudugulu na gutsigulu na bataji bagu, nyuvinsa muana agu va yitsiga yiagu na nyuwarisa durumu duandi.

¹²La jandi agutungila Ndagu Yibenguna, na nyuwarisa yitsiga yibufumu buandi te na mutubu.

¹³Nyuba taji andi na jandi oba muana ami udibaala. Ngogusula durondu duami ombu gandi nana nyimadugusulila ombu kaga omagurela.

¹⁴Mukuta agu na durumu duagu bigotsiemuga te na mutubu, yitsiga yiagu yibufumu yiuba yiwara te na mutubu.

¹⁵Natan amayetsingula David mambu meni motsu ama Fumu amamulasa mu yiriariamu yieni.

¹⁶Kaga David amawenda va gusu Fumu na amawivula rie: Fumu Nsambi menu la nyi na yi yivu na mukuta ami yiri gumambiatsa nana?

¹⁷Va julu motsu mana, Fumu Nsambi, guivosi wandi mu diambu dimukuta umusalitsi agu mu temu atsiuruga? Aa Fumu Nsambi ndeʼ guikengili nana batu bekengilili?

¹⁸Diambu yi, menu David, nyurungula uvosa va julu vana? Fumu Nsambi ndeʼ beni guinjabi!

¹⁹Mu diambu dipangini agu na murima agu gumavaga mambu meni motsu maneni ama nyijabi.

²⁰Fumu ndeʼ guvu tindi muneni! Vagaa ne mutu mosi aguvu dedi nagu na vagaa Nsambi jisusu yika nde. Motsu ama tumagulu mamatujabisa dionyi.

²¹Va dilongu vava tsi adibagunu na batu bagu baIsrael? Tsia jogu bavu dilongu adi Nsambi amayekobula yiri boba batu bandi? Uroyisa diina diagu gumadugusulu bimaga bineni ombu getu nesi dilongu dietu ava gumabungila bisi Egypte na bansambi bogu.

²²Ndeʼ gumawarisa batu bagu baIsrael yiri boba batu bagu te na mutubu, ndeʼ Fumu guvu Nsambi ogu.

²³Kabogu Fumu Nsambi warisa diambu adi gumavosa mu diambu diami na dimukuta ami na ubanganga nana gumavosila.

²⁴Diina diagu didodusungu te na mutubu yiri batu bovosa rie: Nsambi Israel avu Fumu malongu motsu! Mukuta ami uwara va gusu agu te na mutubu!

²⁵Aa Nsambi, gumakelasa ombu gami ava gumavosila rie: Nyuwarisa mukuta agu! La dibandu nyina bukidi ugusambilila.

²⁶Fumu Nsambi ndeʼ guvu Nsambi na mambu magu mavu mangensa na gumanjabisa maboti memama.

²⁷Kokolu tsiagu gabila mukuta ami miula, yiri ubanganga va gusu agu te na mutubu! Fumu Nsambi ami nana gumavanginina, miula miagu mibangingi na mukuta ami!