Read Punu 1 Misamu 18 Bible Online

1 Misamu 18 - Punu bible

1 Misamu 18

¹Adina dinovioga David amabelisa baPhilistin na amabalasa yisonyi na amabapatula Gat na misiengi amimabambana.

²Amabelisa bisi Moab; kabogu bisi Moab bamaba o tsi durumu duDavid na bamamufutila lepu.

³David amabelisa Hadadezer agumaba kaga jiSoba o yiari yiHamat ava amayewarisila durumu duandi te no mujamba Euphrate.

⁴David amamupatula tosini jimakalu na yisambuali yitosini tsibabeyitsi babakabala na magumabeji matosini tsibagora; amatabula miansi mimakulu mabakabala abamadutanga makalu, amakelisa kama mosi buandi.

⁵Bisi Syrie abamatsananga o Damas bamawenda o uyewamusa Hadadezer; David amabelisa magumabeji matosini na tosini beji tsibisi Syrie.

⁶David amasunsa barumitsi o Syrie o Damas. Bisi Syrie bamaba o tsi durumu duDavid na bamamufutila lepu. Fumu amabambanga David mbura tsiotsu atsi amawendanga.

⁷David amapatula bagora baHadadezer ngubu tsiogu tsilora amayenatsibega o Jerusalem.

⁸Va julu vana amabonga kunga tsipuela o Tibat no Koun, misiengi miHadadezer. Na tsionyi Salomon amavayila nsienga jikunga na makutu na bisalulp bikunga.

⁹Toou kaga jiHamat amagulu yiri David amabelisa dibadi diotsu diHadadezer.

¹⁰Amasindiga Hadoram muana andi udibaala ombu kagaDavid uyemuvega mbolu noyemukakisa mu mbari amatumuna Hadadezer na amamubelisa. Diwendi rie: Toou na Hadadezer bamavinasana. Amamubeyila bima bilora na bilora jivema na bikunga.

¹¹Kaga David amabiwakisa ombu Fumu nana amalewakisila lora jivema na lora abi amabongila o malongu motsu ama amabelisa: nesi o Edom nesi o Moab nombu baAmmon nombu baPhilistin nombu baAmalec.

¹²Abichai muana dibaala uSerouia amabelisa yigumi na yinana yitosini tsibisi Edom o yibususu yimusayi.

¹³Amasunsa barumitsi o Edom; baEdom bamaba o tsi durumu duandi. Fumu amabambanga David mbuira tsiotsu atsi amawendanga.

¹⁴David amarumanga o Israel na dusungugu na asamaba na dupasu.

¹⁵Joab muana dibaala uSerouia amarumanga bagora bandi: Yochafat muana dibaala uAhiloud amaba musonitsi andi;

¹⁶Sadoc muanadibaala uAhitoub na Abimelek muana dibaala uAbiatar bamaba bavagulitsi bandi bapagu; Chavecha amaba musonitsi;

¹⁷Benaya muana dibaala uYoyada amarumanga baCretie na baPeletie abamakelisanga kaga na ndagu andi. Baana bababaala baDavid bamaba va gari batu bandi baneni.