Read Punu 1 Misamu 19 Bible Online

1 Misamu 19 - Punu bible

1 Misamu 19

¹Adina dinovioga, Nahach kaga jibaAmmon amafu, muana andi udibaala amamuvinga.

²David amavosa rie: Nyulasa maboti ombu Hanoun muana dibaala uNahach dedi mosi nana taji andi amapayila maboti. David amasindiga basalitsi bandi uyebembiga Hanoun mu diambu didufu dutaji andi. Ava basalitsi baDavid bamatolila o bulongu bubaAmmon,

³baana bakaga baAmmon bamawivula fumu ogu rie: Guitasi yiri divu duyitsu dutaji agu David egutindili babembiyitsi? Basalitsi beni yi bevayi viri tsiri baleyitsi bavu uyenasieenga misiengi utupatula?

⁴Mbana Hanoun amagaanga basalitsi baDavid na amabafuyisa yiasi yimosi yibiedu na amabatabula biduaru biogu muna kodu tsimarangi, mbana amabagabusa ombu David.

⁵David anogulu dionyi amasindiga batu uyenababengusana mu mbari batu beni bamagaangu na yisonyi; kaga amabatsingula rie: Letsananu o Jericho te na biedu bienu biumuenega mbana dukaruga.

⁶BaAmmon bamajaba yiri bamakevaga nsoruru ombu David. Kabogu Hanoun na baAmmon bamatinda magumarieru matona tsilora jivema ufuta makalu na babeyitsi babakabala ombu bisi Syrie abamatsananga o Mesopotamie nombu bisi Syrie abamatsananga o Maaka no Soba.

⁷Bamadila magumarieru na tosini beji tsimakalu madivita na kaga jiMaaka na bagora bandi. Botsu bamavaga milaku o yiari yiMedeba na baAmmon bamapalila misiengi miogu ufubana nogu uyetoga.

⁸David anodigulu amatinda Joab na dibadi diotsu uyetoga nogu.

⁹BaAmmon bamapala na bamakunsama utoga va dikotulu dimusiengi. Bakaga abamafubana nogu bamatsana va mbura ogu va mugula.

¹⁰Joab amalaba yiri vamaba batu utoyisa o gusu nesi o nsima. Kabogu amasola dibuli dibagora baIsrael abamaba na mangolu uviolila basusu; amabasungasana na bisi Syrie.

¹¹Amavega durumu dubagora abamasila ombu muana taji andi Abichai; jogu bamayetoga na baAmmon.

¹²Amavosa rie: Pa baSyrie bepiolili mangolu, gukaruga uyikwamusa; pa baAmmon beguviolili mangolu nyuyiguwamusa.

¹³Guyadeda, tumaninianu mangolu metu uwamusa abetu nogaga misiengi miNsambi etu na Fumu jaʼ beni avayi adi elabi diwelimina.

¹⁴Joab na bagora bandi bamayetumuna baSyrie na bamabarina.

¹⁵Ava baAmmon bamalabila yiri baSyrie bamarina, jogu wogu bamarina Abichai, bamayesuema o musiengi. Joab amagabuga o Jerusalem.

¹⁶Bisi Syrie banolaba yiri baIsrael bamababetsa bamatinda bilumbi uyelanda bisi Syrie abamaba o disimu dina dimujamba; Chofak amaba yivunda yidibadi diHadadezer.

¹⁷David anodigulu amagukiga bagora baIsrael, bamasabuga Jourdain uyebatoyisa. Bamakunsama uyetoga na bisi Syrie. Bamabanda utoga,

¹⁸tumba bisi Syrie bamabetsu na bamarina baIsrael. David na bagora bandi bamabokisa mabadi amamaba na yisambuali yikama tsimakalu na magumidunana matosini tsibabeyitsi bamakalu; bamaboka Chofak wandi.

¹⁹Bakaga botsu abamaba o tsi durumu duHadadezer banolaba yiri baIsrael bamababetsa bamavaga dinonga na baIsrael na bamakesunsa o tsi durumu duogu. Bisi Syrie basamamuerungula uwamusa baAmmon.