Read Punu 1 Misamu 20 Bible Online

1 Misamu 20 - Punu bible

1 Misamu 20

¹Va yitsubi vana temu aji bakaga bamawendilanga o utoga mavita, Joab na bagora bandi na bagora baIsrael botsu bamawenda uyebunga baAmmon noyekanda Rabba. Tumba jaʼ beni David amasiala o Jerusalem. Joab amabelisa Rabba na amagubunga.

²David amavula kaga jibaAmmon dugaba; utsira uduonyi umaba magumana makilu tsilora na dumaba dunamugu mamanyi madufunu duneni, duonyi dumaduisu David. Bamabega bipuela bipuela abi bamakinda o musiengi.

³David amaruma bagora upalisa bisi musiengi, amabakotisa mu buviga bubisalu biranga: bibiwasu na bibatsiengu na bimumbi; amavayila misiengi miotsu mibaAmmon munongu mosi. David na bagora botsu bamagabuga o Jerusalem.

⁴Adina dinovioga vamamueba divita disusu na baPhilistin o Guezer. Mbana Sibkai muisi Houcha amaboka Sippai mutegula ubaRefaie. Kabogu baPhilistin bamasundusu.

⁵Vamamueba divita disusu na baPhilistin. Elanan muana dibaala uYair amaboka Lami muana taji uGoliath muisi Gat agumaba na dikongu adi pandi jimaba nderi munongu umubuangitsi.

⁶Vamaba divita disusu o Gat aguna umaba gora ajimaba na yirela yisakama ajimaba na milembu misiamisimunu mu makaka na mu makulu, diwendi rie: magumabeji na milembu mina, jaʼ wandi amaba mutegula ubaRafaie

⁷Jandi amasienganga baIsrael; kabogu Yonatan muana dibaala uChamma agumaba muana katsi uDavid amamuboka.

⁸Bagora beni bana bamaba baRafaie bisi Gat; botsu bamaboku na David na bagora bandi.