Read Punu 1 Misamu 21 Bible Online

1 Misamu 21 - Punu bible

1 Misamu 21

¹Yilumbu yimosi Satan amarelama utoga na baIsrael

²David amaruma Joab na bivunda bibagora rie: Wendanu uyesansama baIsrael ubandila o banda te no tandu; basansimi batu yiri nyujaba dutalu duogu.

³Joab amamuwaka rie: Fumu Nsambi agu afunisi batu kama tsikumbu ne uviolila. Aa fumu ami, botsu bagaa basalitsi bagu? Tumba dibandu yi guirondili udivaga? Dibandu yi turombisila baIsrael uvaga masumu?

⁴Kaga amawarisa diruma adi amaruma Joab. Kabogu Joab amawenda uyenalinganga o Israel jiotsu; mbana amagabuga o Jerusalem.

⁵Joab amawakisa muganda udutalu dubatu abamasansumu ombu kaga: o Israel dumaba yivevi yimosi na kama mosi jitosini tsibagora abamatoganga mavita; no Juda dumaba kama jina na magumidusambuali matosini tsibagora abamatoganga mavita.

⁶Asamatala bisi Levi na baBenjamin mu mbari amalaba diruma dikaga nsoruru.

⁷Diruma dieni disamalasa Nsambi ubueji kabogu amakilisa baIsrael.

⁸David amatsingula Nsambi rie: Nyimavaga dibi ava nyimadivayila! Kokolu tsiagu Fumu, singa utandila dibi adi nyimavaga. Nyimadivaga na buduka.

⁹Fumu amatsingula Gad mubiyitsi uDavid rie:

¹⁰Wenda ombu David nomutsingula rie: Fumu jandi rie: Nyimatasa mikilu mirieru ugukilisa; sola umosi mbana nyudivaga.

¹¹Gad amarasuna David na amamujabisa diambu ava amamuwivulila rie:

¹²Guirondi bilima birieru bidungosu dunsala? Je guirondi miweli mirieru ami guyenarininanga bavinitsi bagu abogubingisanga? Je guirondi bilumbu birieru abi dijenga diFumu na yivunga biuba mu bulongu na yiansa yiFumu obega dubungu o bulongu buotsu buIsrael? Tsie tabuli diambu, gukawagula adi nyuyetsingula agumansidiga.

¹³David amawagula Gad rie: Goma jineni nyilabi! Mbe ka menu nyukewakisa ombu Fumu mu mbari ana yingeba; nyiyawakusu ombu batu!

¹⁴Kabogu Fumu amatinda yivunga o Israel; vamafu magumidusambuali matosini tsibabaala.

¹⁵Nsambi amasindiga yiansa o Jerusalem ugubunga; ava Fumu amalabila yiansa ubunga ebungi Jerusalem amakalula diela mu diambu didibi dieni na amatsingula yiansa ayimabokisanga batu rie: Vana dedi! Sundusa gogu agu. Yiansa yiFumu yimaba bebeli na yisagulu yiOrnan muisi Jebes.

¹⁶David anobuaga misu amalaba yiansa yiFumu va yiliyili ayimaba na dijenga diandi va dikaka uyenabokanga bisi Jerusalem. Kabogu David na bivunda bamaduara basiela na bamagudama va tsi.

¹⁷Mbana David amawivula Nsambi rie: Tsiri menu agumaruma batu uvaga sansama? Menu agumavaga disumu na nyimavaga dibi; tumba batu bebaba dibi yi bamavaga? Kokolu Fumu Nsambi ami, kilisi jetu na mukuta ami tsiri batu bagu.

¹⁸Yiansa yiFumu yimaruma Gad uyetsingula David yiri awendi uyerungila Fumu yinyensulu yipagu va yisagulu yiOrnan muisi Jabes.

¹⁹David amadedila diufi diGad nana Fumu amamurumina.

²⁰Ava Ornan amasayilanga ble amabuaga misu na amalaba yiansa yiFumu; baana bandi bababaala bamasuema.

²¹Ornan amamuebuaga misu na amalaba kaga na basalitsi bandi umga bemyi; amapala na amakebuaga va tsi va gusu kaga.

²²David amavonda Ornan rie: Peyi mbura ajivu yisagulu; nyirondi umngila Fumu yinyensulu yipagu vana yiri yivunga yieyiyi yiugusulu mu bulongu; yipeyi na dufunu.

²³Ornan amawaka David rie: Kaga abongi yisagulu na avaguli pagu tsiandi nana erondili. Bonga na bangombi uvagula pagu jiunyensa na tsimbi tsimakalu tsiuba mikansu na ble jipagu wandi. Nyiguveyi biotsu bina.

²⁴Tumba kaga amawaka Ornan rie: Nesi! Nyugufutila biotsu bina ngovagulila Fumu ami pagu tsiunyensa atsiagu, atsi ngaafuta.

²⁵David amavega Ornan kama yisiamunu tsimbongu tsilora ufuta yisagulu.

²⁶David amamngila Fumu yinyensulu yipagu vana na amavagula pagu tsiunyensa tsimunongu na munongu na pagu tsikabusulu tsimaboti. Amawivula Fumu na Fumu amamuwaka mu muji agumasunduyila o julu va yinyensulu yipagu.

²⁷Mbana Fumu amamma yiansa ugabusa dijenga diandi mu yisupu.

²⁸Vana temu eni David amalaba yiri Fumu amamutanda va yisagulu yiOrnan muisi Jabes; ubongila va temu eni amavagulilanga Fumu pagu tsiunyensa.

²⁹Tumba va temu eni Ndagu Nsambi aji Moise amamnga o kumu na yinyensulu yipagu bimaba va mbura tsiduyitsu o Gabaon.

³⁰David asamamngula uwenda guna uyetatila Nsambi mu mbari dijenga diyiansa yiFumu dimamulasa goma.