Read Punu 1 Misamu 22 Bible Online

1 Misamu 22 - Punu bible

1 Misamu 22

¹La dibandu David amavosila rie: Avava voba Ndagu Nsambi na yinyensulu yipagu ayi baIsrael bovagulilanga pagu tsiogu.

²David amagukiga benyi botsu abamaba o Israel, amabavega yisalu upaka mamanyi mawelimina urungisila Ndagu Nsambi.

³Amakunsa madilu mapuela wandi uvayila batsongu babiabutsu na bamagongi, na kunga jipuela jipuela aji basamarungula nesi upitsa,

⁴na tsimbi tsisedera atsisamatalu nesi utalu, ami bisi Sidon na bisi Tyr bamabeyila David.

⁵David amavosa rie: Muana ami Salomon avu ngebi na asakadila mangolu; Ndagu ajiurungulu Fumu jiuba jiviolila ubueji na jiudumusu tindi udumusu te na malongu motsu, kabogu nyirondi ugukiga birungulu biNdagu eni. David amagukiga bipuela bipuela ne akafu.

⁶David amanengila Salomon muana andi udibaala na amamuruma urungila Fumu Nsambi Israel Ndagu.

⁷David amatsingula Salomon rie: Muana ami, nyimaba na ditasa urungila Fumu Nsambi ami Ndagu.

⁸Tumba Fumu amansingula rie: Ndeʼ gumawitila malungu mapuela ava gumatoyila mavita mapuela. Gunowitila malungu mapuela va misu mami ndeʼ gugotungila Ndagu aji batu bokitsila.

⁹Gubura muana dibaala na jandi oba na duvotsu, diwendi rie: nyumuvega duvotsu na bavinitsi bandi bayiari na yiari bagomupupisa; diina diandi diuba Salomon, divindugulu rie: duvotsu; nyuvega duvotsu tindi duvotsu ombu baIsrael yitsingu yiandi yiotsu.

¹⁰Jandi agutungila Ndagu. Oba muana ami udibaala, nyuba taji andi na nyuwarisanga yitsiga yibufumu buandi o Israel te na mutubu.

¹¹Muana ami, Fumu abi nagu yiri gulunga ava gurungila Ndagu Fumu Nsambi agu nana jaʼ beni amavosila mu diambu diagu!

¹²Dimosi buandi Fumu aguveyi diela na dujabu noguvaga kaga jiIsrael yiri gukelisanga migaga miFumu Nsambi agu!

¹³Pa gukelisa migaga na maruma maFumu abimavegu ombu Moise mu diambu diIsrael kabogu gulunganga. Wara na guyadeda, guyalaba keri na guyaregama.

¹⁴Nyimagukiga bimnguiu biNdagu Nsambi: tosini yirieru tsitona tsilora na magumarieru matosini tsilora jivema tsiri utala kunga jipuela na madilu mapuela, va julu vana nyimagukiga tsimbi na mamanyi; ndeʼ beni gubuela bisusu.

¹⁵Ndeʼ guba na basalitsi bapuela na bapakitsi bamamanyi na basarpati na babaala abavu na buketi buminongu miotsu mibisalu.

¹⁶Va julu vana guvu na lora nesi lora jivema nesi kunga nesi madilu: biotsu bina bigaa na dutalu. Sala na Fumu abi nagu!

¹⁷David amaruma basefu botsu baIsrael uyewamusa muana andi Salomon.

¹⁸Fumu Nsambi enu agaa nenu? Asamaduvumisa o biari biotsu? Fumu amakwakisa bisi bulongu na bagaa o tsi durumu duFumu na batu bandi?

¹⁹Keveganu na mirima mienu miotsu uromba Fumu Nsambi enu; relamanu na runganu Mbura jiFumu Nsambi yiri dubega yigara yipangini yiFumu na bisalulu abimawakusu ombu Nsambi o Ndagu aji durunga umuyitsanga.