Read Punu 1 Misamu 29 Bible Online

1 Misamu 29 - Punu bible

1 Misamu 29

¹Kaga David amatsingula dibuli diotsu rie: Muana ami Salomon agumasolu na Nsambi akivu ngebi, asakaba na mangolu; yisalu yivu yiranga mu mbari Ndagu ejiji jigaa jimutu tumba jivu jiFumu Nsambi.

²Nyimamanina mangolu mami motsu ugukiga biwelimina urungila Ndagu Nsambi: lora na lora jivema na kunga na madilu na miri na mamanyi madufunu duneni na mamanyi amonamugu mu bisalu na ameluli na binyuru bimunongu na munongu na tsiengi tsipuela tsipuela.

³Va julu biotsu abi nyimagukiga urungila Mbura Nsambi na durondu duami nyiveyi lora na lora jivema abimaba bimeʼ beni.

⁴Nyiveyi kama tona tsilora jiOfir na kama beji na magumana matona tsilora jivema atsiusalusu ubaka bibaga biNdagu Nsambi.

⁵Anyi va gari enu ovagulila Fumu pagu tsitondini tsilora na lora jivema atsi baketi bovayila bima bilora na lora yivema?

⁶Basefu bamikuta mibataji bogu na basefu babifumba biIsrael na bivunda bibatosini na bibakama na abamakelisanga bisalu bikaga bamavagula pagu tsitondini.

⁷Bamavega kama na magumidusambuali matona na yigumi yitosini yimbongu tsilora na kama yirieru tsitona tsilora tsivema na kama yisiamunu tsitona tsikunga na tosini yirieru tsitona tsimadilu.

⁸Jogu abamaba na mamanyi madufunu duneni bamamaveganga ombu Yehiel agumaba mu mukuta uGuerchon agumakelisanga yisuegulu yiNdagu Nsambi.

⁹Batu bamalaba nsangu na pagu tsiogu tsitondini; bamatsivagulila Fumu na murima usunda; kaga David wandi amalaba tindi nsangu.

¹⁰David amagabusila Fumu diboti va gusu dibuli diotsu, amavosa rie: Diboti ombu gagu Fumu Nsambi, ubandila namunyi te na mutubu guji taji taji etu Jacob!

¹¹Fumu guvu na buneni na buneni; mangolu na mangolu; bundumba na bundumba. Biotsu abivu o julu na abivu va butamba bivu abiagu; Fumu bundumba buotsu guirumi biotsu!

¹²Busina na bundumba biruyili ombu gagu; ndeʼ aguirumi biotsu, mangolu na mangolu mavu nagu; ndeʼ guvu na mangolu uroyisa nowarisa biotsu.

¹³Aa Nsambi etu, tuiguyitsi na tuigukakisi, diina diagu divu na bundumba.

¹⁴Menu lʼanyi na batu bami banyi yiri tumaguvagulila pagu tsietsitsi tsitondini? Biotsu abi tuiguvagulila biruyili ombu gagu, ndeʼ beni guituveyi.

¹⁵Jetu tuvu benyi na bilayilayi va gusu agu dedi mosi na bataji betu botsu; bilumbu bietu va butamba bivu nderi yidumbitsi ayigaa na tsongu.

¹⁶Fumu Nsambi etu, busina bueni buotsu abu tumagukiga ugurungila Ndagu ajiudumisila diina diagu, biotsu bivu abiagu na tumabidilila ombu gagu.

¹⁷Aa Nsambi ami, nyijabi yiri ndeʼ guiweliyi mirima na guirondi dusungugu; nyimaguvagulila pagu tsiami tsitondini na murima uwelimina, namunyi nyilabi batu bagu babasa de na nsangu ava beguvagulili pagu tsiogu tsitondini.

¹⁸Fumu Nsambi bataji betu Abraham na Isaac na Jacob, ubandila namunyi te na mutubu kelisa batu bagu nobawarisa yiri bokevega ombu gagu.

¹⁹Vega muana ami Salomon murima uwelimina ukelisa maruma magu na malongi magu na migaga miagu yiri okipanga mambu meni motsu nogurungila Ndagu aji nyimagukiyila bima biebibi biotsu.

²⁰David amaruma batu botsu rie: Gabusilanu Fumu Nsambi enu diboti! Batu botsu bamagabusila Fumu Nsambi bataji bogu diboti. Bamagudama va gusu Fumu na va gusu kaga.

²¹Ava kedi bamavagulila Fumu pagu tsiunyensa tsimunongu na munongu diwendi rie: tosini balumi babangombi na tosini balumi babindombu na tosini baana babindombu na pagu tsiunu na pagu tsisusu tsiunyensa. Pagu tsieni tsimaba tsiwelimina ulisila baIsrael botsu.

²²Yilumbu yieni bamaji na bamanu va gusu Fumu na nsangu jineni, temu ajimubeji bamamuetubula Salomon muana dibaala uDavid kaga. Bamamubiatsa sefu va gusu Fumu na va temu eni bamabiatsa Sadoc muvagulitsi upagu.

²³Salomon amatsana va yitsiga yibufumu uba kaga va yivinga yitaji andi David. Amakelasa awelimina na baIsrael botsu bamamudedila.

²⁴Basefu botsu na bangogaga nesi baana botsu bababaala bakaga David bamakesunsa o tsi durumu dukaga Salomon.

²⁵Fumu amamatisa tindi umatisa Salomon va misu mabaIsrael botsu na amadumisa bukaga buandi ne uviolila bakaga botsu baIsrael abamamureyila.

²⁶David muana dibaala uJesse amarumanga o Israel jiotsu.

²⁷Durumu duandi o Israel dumaba magumana mabilima: amaruma yisambuali yibifima o Hebron na magumarieru na bilima birieru o Jerusalem.

²⁸Bununu buandi bumabueji na bilima biandi bimaba bipuela na amalabanga nsangu. Salomon muana andi udibaala amamuvinga.

²⁹Bisalu bikaga David nesi abitega nesi abiusita bimasonugu mu Dibuku diMubiyitsi Samuel na mu Dibuku diMubiyitsi Natan na mu Dibuku diMubiyitsi Gad,

³⁰diwendi rie: motsu mabufumu buandi na bisalu biandi na motsu amamalabana va temu andi nesi o Israel nesi o bufumu bumalongu masusu.