Read Punu 2 Misamu 13 Bible Online

2 Misamu 13 - Punu bible

2 Misamu 13

¹Yilima yiyigumi na yinana bidurumu duJeroboam, Abia amabanda uruma o Juda.

²Amaruma bilima birieru o Jerusalem. Diina dinguji andi Mikaya muana mugetu uOuriel muisi Guibea. Vamabanganga divita va gari Abia na Jeroboam.

³Abia amawenda o utoga na bagora bandi bamangolu, dutalu duogu dumaba kama jina tsitosini tsibabaala; Jeroboam amakunsama utoga nandi na yinana yikama tsitosini tsibagora.

⁴O julu mukongu uSemaraim aguvu o yiari yisusu yimukongu uEfraim, Abia amaretsama na amagamuga rie: Ndeʼ Jeroboam na baIsrael botsu, kululuatianu!

⁵Dugejabi yiri Fumu Nsambi Israel amavega David bufumu buIsrael mutubu? Dugejabi yiri pangini andi jigokubulu?

⁶Tumba Jeroboam muana dibaala uNebat, musalitsi uSalomon muana dibaala uDavid amakaluga mumbini ufumu andi.

⁷Bifufu na batu babi bamagukama ombu gandi na bamatumuna Roboam muana dibaala uSalomon. Roboam muana dibaala uSalomon amaba yika mufudu agumalabanga goma kabogu asamarungula ugagana nogu.

⁸Mbana duitasi ugagana na bufumu abu Fumu amavega ombu bategula baDavid. Duvu bapuela bapuela na duna bansambi bangana abavu baana babangombi balora aba Jeroboam amaduvayila.

⁹Jenu dumabusa tindi bavagulitsi bapagu baFumu abamaba bategula baAaron na bisi Levi, dumakesolila bavagulitsi bapagu nana bisi malongu masusu bamavayilanga: mutu uotsu agumaruganga na muana ngombi na yisambuali yibalumi babindombu amabiatsu muvagulitsi upagu ubansambi bangana.

¹⁰Mbe ka jetu Fumu avu Nsambi etu, jetu tusamamubusa; bavagulitsi bapagu bavu bategula baAaron na bisi Levi, jogu besalili Fumu etu.

¹¹Kadi kedi na kadi tsisiga bevagulilingi Fumu pagu tsiunyensa na benyensingi bima bimbunga jiboti, besunsingi mapa mapagu va julu tavula jiyingitsi, kadi tsisiga bebangisingi dingasa dilora na lambi tsidionyi. Tuikelisi maruma maFumu Nsambi etu, tumba jenu dumamubusa.

¹²Nsambi jaʼ beni avu Fumu etu; bavagulitsi bandi bapagu bavu bakunsama usiga mimbanda na nsiyitsi jiulubusa utoga nenu. BaIsrael duyatoga na Fumu Nsambi bataji benu mu mbari dugolunga.

¹³Jeroboam amabakanda o nsima ava amabarambila murambu na bagora bandi bamaba va nsungisini na baJuda abamaba o yiari yinsima.

¹⁴BaJuda banogabuga bamalaba bagora o gusu no nsima; bamatatila Fumu. Ava bavagulitsi bapagu bamasiyila mimbanda, bagora baJuda bamagamuga mugamu udivita.

¹⁵Vana vana Fumu amabetsa Jeroboam na baIsrael botsu va gusu Abia na baJuda.

¹⁶BaIsrael bamatsiemusa mangolu na Nsambi amabawakisa ombu baJuda.

¹⁷Abia na batu bandi bamabagudisa tindi ugudisa; kama yiranu tsitosini tsibagora baIsrael bamaboku.

¹⁸BaIsrael bamasundusu vana temu eni, tumba baJuda bamalunga mu mbari bamawarusu na Fumu Nsambi bataji bogu.

¹⁹Abia amaduka Jeroboam na amamupatula misiengi; Bethel na Yechana na Efron na misiengi amimabambana mionyi.

²⁰Va durumu duAbia, Jeroboam asamamuedila mangoki; Nsambi amamudimba na amafu.

²¹Tumba durumu duAbia dumawara; amawela yigumi na bagetu bana na amabura magumabeji na baana babeji bababaala na yigumi na baana babagetu basiamunu.

²²Misamu misusu miAbia mimasonugu mu Dibuku diMubiyitsi Iddo.

²³Abia amafu na amatsigu o musiengi uDavid; Asa muana andi udibaala amamuvinga. Va temu Asa bulongu bumaba na yivumu mu yigumi yibilima.