Read Punu 2 Misamu 14 Bible Online

2 Misamu 14 - Punu bible

2 Misamu 14

¹Asa amavaga maboti na mawelimina va gusu Fumu Nsambi andi.

²Amatsiemusa binyensulu bipagu bibansambi bangana na mbura tsiogu tsiduyitsu, amabula bitumba na bakosi.

³Amaruma baJuda uyitsa Fumu Nsambi bataji bogu nokipanga migaga na maruma.

⁴Amatsiemusa mbura tsiduyitsu o misiengi miotsu miJuda na bakosi abamayitsulu wisi; bufumu buandi bumaba na yivumu.

⁵Batu basamaruga uyimutoyisa mu bilima bieni; Fumu jaʼ beni amamuvega yivumu. Va temu eni jiduvotsu amanmgisa misiengi mikandu o Juda.

⁶Asa amatsingula baJuda rie: Turunga misiengi na tumikanda bivaga na mandagu masakama na maguyi mamadilu; bulongu buvu mu miogu mietu mu mbari tumasungama va gusu Fumu Nsambi etu, kabogu amatuvega yivumu o biari biotsu. Kabogu bamarungisa misiengi mikandu na bisalu biotsu bimabueji.

⁷Asa amaba na kama yirieru tsitosini tsibagora baJuda abamaba na bangubu na makongu na kama na magumidunana matosini tsibagora baBenjamin abamaba na bangubu na bapita, botsu bamaba bagora bamangolu.

⁸Zera muisi Ethiopie amayetoga nogu, amaba na yivevi yibagora na kama yirieru tsimakalu, amatola te no Marecha.

⁹BaAsa bamayemubengusana na bamaba bakunsama utoga o yibususu yiSefata bebeli na Marecha.

¹⁰Asa amatatila Fumu Nsambi andi rie: Fumu, yika ndeʼ agurungula uwamusa abadeda nesi abavu na mangolu: Fumu Nsambi etu ruga yituwamusa! Ndeʼ guituwarisi na mu diina diagu tumaruyila uyitoga na puela batu bebaba. Fumu, ndeʼ guvu Nsambi etu; mutu ayagubetsa.

¹¹Fumu amabetsa baEthiopie va gusu Asa na bagora baJuda te na baEthiopie bamarina.

¹²Asa na batu botsu abamaba nandi bamababingisa te no Guerar na baEthiopie bamaboku; Fumu amabasingisa uboku na bagora bandi. Asa na abandi bamakinda bipuela bipuela.

¹³Bamapatula misiengi miotsu miyiari yiGuerar mu mbari bisi misiengi mieni bamagaangu na goma Fumu; bamakinda misiengi mieni miotsu na bamadila bima bipeula.

¹⁴Bamabetsa bakelisi bamigamba na bamadila bindombu bipuela na basamo wandi. Mbana bamayenagabuga o Jerusalem.