Read Punu 2 Misamu 2 Bible Online

2 Misamu 2 - Punu bible

2 Misamu 2

¹Salomon amatabula diambu urungisila Fumu Ndagu na ndagu andi wandi.

²Amanengila magumidusambuali matosini tsibabaala abamanangulanga mifuna na magumidunana matosini tsibabaala abamapakanga mamanyi o julu mukongu na tosini yirieru na kama yisiamunu abamakipanga basalitsi.

³Salomon amatinda yilumbi uyetsingula Hiram kaga jiSyrie rie: Payili dedi mosi nana gumavayila taji ami David agu gumatindila tsimbi tsisedera urunga ndagu andi.

⁴Gulu, nyirungili Fumu Nsambi ami Ndagu ajiumuwakusu ajiunyesulungu bima bimbunga jiboti va gusu andi, nyumuwakisanga mapa mapagu na nyumuvagulilanga pagu tsiunyensa kedi na tsisiga mu bilumbu bibatsona na bibisusungi na bibafeta baFumu Nsambi etu; tsiotsu tsina tsiubanganga mutubu o Israel.

⁵Ndagu aji nyurungisa vengu jiuba jineni mu mbari Nsambi etu avu muneni uviolila bansambi botsu.

⁶Anyi avu na mangolu umurungila Ndagu? Julu na tindi julu jigaa mbura jiwelimina nandi. Je meʼ nyurungula umurungila Ndagu? Jiuba yika mbura umuvagulila pagu tsiunyensa.

⁷Kabogu tindili dibaala adivu na buketi bubisalu bilora na bilora jivema na bikunga na bimadilu na bimatsanda amavu na yinyuru ayivu va gari ubenga na dumbulu na mabenga na madumbulu adijabi ubaka. Oyisalanga va mosi na baketi bami abetsani o Juda no Jerusalem aba taji ami amasola.

⁸Tindili tsimbi tsiLiban: tsisedera na tsisipara na tsisantala; nyijabi yiri basalitsi bagu bejabi upasa tsimbi tsiLiban; basalitsi bami boyesala va mosi na basalitsi bagu.

⁹Bapasi tsimbi tsipuela mu mbari Ndagu aji nyurunga jiuba tindi jineni na jiboti.

¹⁰Nyuvega basalitsi bagu abowanganga na abopasanga tsimbi, yisambuali yikama tsitona tsible na yisambuali yikama tsitona tsiorsa na yinana yikama tsitosini tsimbuta tsimalamu na yinana yikama tsitosini tsimbuta tsimatsi.

¹¹Hiram kaga jiSyrie amasonina Salomon muganda rie: Mu mbari Fumu erondi batu bandi la dibandu amaguvayila kaga ogu.

¹²Hiram amabuela rie: Diboti ombu Fumu Nsambi Israel agumavaga julu na butamba mu mbari amavega kaga David muana udibaala aguvu na diela na malubu na dujabu agurungila Fumu Ndagu norunga ndagu jijaʼ beni!

¹³Kabogu nyudutindila dibaala adivu na buketi na diela wandi diina diandi Houram-Abi.

¹⁴Nguji andi avu muisi Dan na taji avu muisi Tyr. Ana buketi bubisalu bilora na bilora jivema na bikunga na bimadilu na bimamanyi na bimiri na bimatsanda amavu na yinyuru ayivu va gari ubenga na dumbulu na madumbulu na matsanda malina na mabenga na bisalu biotsu biubaka na bisalu bimunongu na munongu abi bemuveyi usala. Osalanga va mosi na baketi bagu na baketi aba taji agu David amasola.

¹⁵Mbe ka ndeʼ gukatindila ble na orsa na matsi na malamu abi gumavangana.

¹⁶Mbana jetu tupasa tsimbi tsiLiban nana guirondili; tugutindila tsionyi mu bilindi abi tutinda mu mubu te no Jaffa. Ndeʼ beni gutsitolisa o Jerusalem.

¹⁷Salomon amanengila benyi botsu abamaba o bulongu buIsrael abamasansumu na taji andi David. Dutalu duogu dumaba kama na magumaranu na tosini yiriem na kama yisiamunu.

¹⁸Amuna amabongila magumidusambuali matosini abamanangulanga mifuna, magumidunana matosini abamapakanga mamanyi va julu mukongu na tosini yirieru na kama yisiamunu abamakipanga nosalisanga basalitsi.