Read Punu 2 Misamu 20 Bible Online

2 Misamu 20 - Punu bible

2 Misamu 20

¹Va julu vana bisi Moab na baAmmon va mosi na baMeounie bamayetoyisa Josaphat.

²Bamalelubusa Josaphat rie: Batu bapuela bapuela uruga beruyi ombu gagu ubandila o disimu dina dimubu no Syrie na bavu o Hassasson-Tamar diwendi rie: o En-Guedi.

³Josaphat anogaangu na goma amagengila Fumu; amatubula temu ubusa uji o bufumu buotsu buJuda.

⁴BaJuda bamaruyila o misiengi miotsu miJuda uyebenguna notatila Fumu.

⁵Josaphat amaretsama va gari dibuli diJuda na diJerusalem va gusu Ndagu Nsambi va dulombili dugona.

⁶Amasambila rie: Fumu Nsambi bataji betu ndeʼ gugaa Nsambi aguvu o julu na tsiri ndeʼ aguiviolili bafumu bamalongu motsu? Tsiri ndeʼ aguvu na mangolu mamunongu na munongu? Mutu orungula ugagana nagu?

⁷Aa Fumu Nsambi etu tsiri ndeʼ agumabingila baIsrael bisi bulongu buebubu? Tsia gumabuvega ombu bategula baAbraham agu gumarondanga?

⁸Bamatsaninanga muna na bamayegurungila Mbura Nsambi. Mbana bamavosa rie:

⁹Pa tulaba mua maguga nesi divita nesi bunsonsi nesi yivunga vo dungosu dunsala, turuga va gusu Mbura ejiji jiNsambi va gusu agu mu mbari guitsaningi muna; mbana tugutatila, gutugulu notuwaka kalala!

¹⁰Labati baAmmon na bisi Moab na baEdom betutumuni. Ava bataji betu bamaruyilanga o bulongu buEgypte gumabagandisa ubabunga. Kabogu bataji betu bamagonga biari biogu na bamabusa ubabunga.

¹¹Tumba namunyi betugabusili dibi ava betubingili o disiala adi gumatuvega.

¹²Aa Fumu Nsambi etu gugobakilisa? Jetu tugaa na mangolu va gusu bagora bapuela bapuela aberuyi utoga netu na tugejabi adi tuvaga tumba tuigugengili yisuisu.

¹³BaJuda botsu bamaba diteli va gusu Mbura Nsambi na baana bogu bageyi na bagatsi bogu na baana bogu bababaala.

¹⁴Va misu mabatu Yinyunyi yiFumu amagaangila Yaziel muisi Levi, muana dibaala uZacharie na mutegula uMattania agumaba muana umosi uAssaf.

¹⁵Yaziel amagamuga rie: Jenu aduitsani o Juda no Jerusalem, sinsa viri ndeʼ kaga Josaphat guluatianu! Fumu jandi rie: Duyalaba keri na duyalaba goma va gusu bagora bapuela bapuela! Dugotoga nogu, Nsambi odutoyila!

¹⁶Dukawenda mugesa uyetoga nogu; bovioyila o mukongu uBafelera na dubarasuna vana dibandu diyibususu va nsungisini na kumu Yerouel.

¹⁷Dugotoga nogu. Jenu aduitsani o Juda no Jerusalem relamanu, duyapupa, labanu nana Fumu odulungisila! Duyalaba keri na duyalaba goma, mugesa dukayebabengusana na Fumu oba nenu!

¹⁸Josaphat amagudama va tsi va gusu Fumu. BaJuda botsu na bisi Jerusalem bamagudama va gusu Fumu umuyitsanga wandi.

¹⁹Mbana bisi Levi abamaba mu mukuta uQuehat na uCore bamaretsama uyitsa Fumu Nsambi Israel na migamu.

²⁰Ava kedi bamasogama uwenda o kumu Tecoa. Ava bamasoyimina Josaphat amavosa rie: Kululuatianu jenu baJuda na bisi Jerusalem! Vayilanu Fumu Nsambi enu yitu mbana duwarusu! Vayilanu babiyitsi bandi yitu mbana dulunga!

²¹Mbana anomoga na batu amasola bawimbitsi abamaduara biduaru biyingitsi na bamawendanga va gusu bagora noyitsa Fumu rie: Yitsanu Fumu mu mbari aji muboti, durondu duandi duitsingingi te na mutubu.

²²Ava baJuda bamabandila uwimbila noyitsa, Fumu amakambisa baAmmon na bisi Moab na baEdom abamabanda utoga joʼ beni na joʼ beni.

²³BaAmmon na bisi Moab bamatumuna baEdom nobagudisa. Va julu vana bamabokasana joʼ beni na joʼ beni.

²⁴Ava baJuda bamatolila va julu mukongu agu belabilili kumu, bamagengila o yiari ayimalebanga bagora bapuela bapuela na bamalabilila yika bamfumbi na bamfumbi mu tsi ne mutu mosi asamarina.

²⁵Josaphat na batu bandi bamayekinda bima biogu; bamadila busina bupuela na bima bidufunu duneni bibamfumbi te na bamalaba uvura ubibega. Bamamana bilumbu birieru ukindanga bima mu mbari bimabanganga bipuela.

²⁶Yilumbu ayi muina bamabenguna o yibususu yiBeraka, yinengulungu na diina dieni te na namunyi mu mbari avana bamagabusila Fumu diboti.

²⁷BaJuda botsu na bisi Jerusalem na kaga Josaphat bamayenagabuga na nsangu o Jerusalem. Fumu amababasa de na nsangu ava amabawakila kalala ombu bavinitsi bogu.

²⁸Bamayesiganga bangomfi na basambi na mimbanda ava bamakotila o Jerusalem; te na bamatola o Ndagu Nsambi.

²⁹Goma Fumu jimagaanga bufumu buotsu bumalongu masusu ava bamagululu yiri Fumu amabelisa bavinitsi baIsrael.

³⁰Mbana bufumu buJosaphat bumaba sui mu mbari Nsambi andi amamuvega yivumu o biari biotsu.

³¹Josaphat amarumanga o Juda. Amaba na magumarieru na bilima biranu ava amabandila uba kaga, amaruma magumabeji na bilima biranu o Jerusalem. Diina dinguji andi Azouba agumaba muana mugetu uChili.

³²Amadukanga bifu bitaji andi Asa, asamavaganga masumu; amavaganga yika amamalasanga Fumu ubueji.

³³Dimosi buandi mbura tsiduyitsu tsisamatsiemuga na batu basamamuekevega na murima uotsu ombu Nsambi bataji bogu.

³⁴Misamu misusu miJosaphat mimasonugu mu Dibuku diJehu, muana dibaala uHanani na mu dibuku dibakaga baIsrael.

³⁵Va julu vana Josaphat kaga jiJuda amafubana na Ahazia kaga jiIsrael agumavaganga dibi.

³⁶Bamatabula diambu urunga makumbi mamamba uwendila o yiari na yiari; bamamagomina o Ession-Gueber.

³⁷Mbana Eliezer muana dibaala uDodava muisi Marecha amavosa na Josaphat rie: Gunofubana na Ahazia Fumu ubunga ebungi yisalu yienu. Kabogu makumbi mamamba mamapansu na basamamuerungula uyenawendanga yiari na yiari.