Read Punu 2 Misamu 21 Bible Online

2 Misamu 21 - Punu bible

2 Misamu 21

¹Josaphat amafu na amatsigu va mugula bataji bandi o musiengi uDavid. Joram muana andi udibaala amaruma va yivinga yiandi.

²Joram amaba na baana bataji ababa: Azaria na Yehiel na Zacharie na Azariahou na Mikael na Chefatia.

³Taji ogu amabagabila lora jivema na lora na bima bidufunu duneni na misiengi mikandu o Juda; tumba amasola Joram umuvinga mu mbari amaba tsomi andi.

⁴Joram amabialila bufumu butaji andi na anowarusu mu bufumu amabokisa baana bataji botsu va mosi na basefu basusu baIsrael wandi.

⁵Joram amaba na magumarieru na bilima bibeji ava amabandila uruma na amarumanga yinana yibilima o Jerusalem.

⁶Amadukanga bifu bibakaga baIsrael dedi mosi na bisi mukuta uAchab; mu mbari amawela muana mugetu uAchab; amavaganga amasamalasa Fumu ubueji.

⁷Tumba Fumu asamaronda ubunga mukuta uDavid mu diambu dipangini aji amavangana na David; diwendi rie: omuvega muana umosi va yivinga yiandi agurumanga o Jerusalem.

⁸Va temu andi baEdom bamabusila bufumu buJuda na bamakesolila kaga.

⁹Joram amasogama na bivunda biandi bibagora na makalu mandi motsu. Bamawenda mukolu na mukolu; bamayebelisa baEdom abamabakanda na bivunda biogu bibabeyitsi bamakalu wandi.

¹⁰Ubanda va temu eni baEdom bamabusa utsana va mosi na baJuda. Vana temu eni bisi Libna bamabusila durumu duJoram mu mbari amaliyila Fumu Nsambi bataji bandi nsima.

¹¹Joram amarungisa nesi mbura tsiduyitsu tsibansambi bangana o mikongu miJuda; amarombisa bisi Jerusalem na baJuda uliyila tindi Nsambi nsima.

¹²Joram amadila muganda umubiyitsi Elie agumasonugu rie: Fumu Nsambi kaga agu David, jandi rie: Mu mbari gusamaduka bifu bitaji agu Josaphat nesi bikaga agu Asa abamaba bakaga baJuda,

¹³tumba gumaduka bifu bibakaga baIsrael na gumarombisa baJuda na bisi Jerusalem uyitsa bansambi bangana nana mukuta uAchab beyitsili na gumabokisa tindi baana bataji bagu abamaba bawelimina uviolila ndeʼ

¹⁴kabogu Fumu onamusu batu bagu yivunga yineni jenu na baana bagu na bagatsi bagu nesi biagu biotsu.

¹⁵Ndeʼ beni gubela buali bubigari, buali bueni buba buranga na bugutsoyisa; gubela yitsingu yineni te na bupalisa misopu miagu.

¹⁶Va julu vana Fumu amasibisa baPhilistin na baArab abetsani bebeli na bisi Ethiopie ulasa Joram maguga.

¹⁷Kabogu bamayetoyisa baJuda na bamayebasa guna na bamakinda busina buotsti bundagu kaga na bamayenabega baana bandi bababaala na bagatsi bandi; amasiala na muana umosi buandi la Ahazia agumaba marina mabaana bandi.

¹⁸Motsu mana manovioga Fumu amamunamusu buali bubigari abusamabugu;

¹⁹buali buandi bumaranga na va disukusulu diyilima ayimubeji misopu miandi mimapala. Amafu na maguga maneni; nesi batu bandi basamanyensa bima bimbunga jiboti umuyitsa nana bamayitsilanga bataji bandi.

²⁰Amaba na magumarieru na bilima bibeji ava amabandila uba kaga na amaruma yinana yibilima o Jerusalem. Ne mutu mosi asamamulila na bamamutsiga o musiengi uDavid tumba asamatsigulu va mbura jibakaga.