Read Punu 2 Misamu 22 Bible Online

2 Misamu 22 - Punu bible

2 Misamu 22

¹Bisi Jerusalem bamasola Ahazia muana andi umarina uruma va yivinga yiandi; diwendi rie: bivunda biandi biotsu bamaboku na baArab abamakotanga o milaku miJuda. La dibandu Ahazia muana dibaala uJoram amaruminanga o Juda.

²Ahazia amaba na magumana na bilima bibeji ava amabandila uruma na amarumanga yilima yimosi o Jerusalem. Diina dinguji andi Athalie muana mugetu uOmri.

³Amaduka bifu bimukuta uAchab; nguji andi amamulonsanga malongi mabi.

⁴Amavaga amasamalasa Fumu ubueji dedi mosi na mukuta uAchab, taji andi anofu amadila balongitsi abamamurombisa ubungu.

⁵Anoduka malongi mogu kabogu amaduka Joram muana dibaala uAchab agumaba kaga jiIsrael uvaga divita na Hazael kaga jiSyrie te no Ramot o Galaad; va temu eni bisi Syrie bamatsungula Joram.

⁶Joram amagabuga uyebugusu mapura o Jizreel; kabogu Ahazia amagabuga o Jizreel uyemulaba mu mbari amabelanga.

⁷Na duganu duNsambi Ahazia amawenda ombu Joram. Anotola jogu na Joram bamapala uyebengusana Jehu muana dibaala uNimchi agu Fumu amabiatsa kaga yiri ogudisa mukuta uAchab.

⁸Ava Jehu amadugusulu duganu duNsambi na mukuta uAchab amalaba basefu baJuda na baana bataji baAhazia, jogu abamasalilanga Ahazia, kabogu amababoka wandi.

⁹Bamaromba Ahazia na bamayemugaanga o Samarie agu amasuemina. Bamamubega ombu Jehu na bamamubokisa. Mbana bamamutsiga mu mbari bamavosa rie: Avu mutegula uJosaphat agumadukanga Fumu na murima andi uotsu. Vasamasiala ne mutu mosi mu mukuta uAhazia agumaba uwelimina urumanga.

¹⁰Athalie nguji Ahazia anolaba yiri muana andi udibaala amafu amaretsama na amabokisa baana babakaga baJuda botsu.

¹¹Tumba Yocheba muana mugetu uJoram agumaba yibusi yiAhazia na mugatsi uYoyada muvagulitsi upagu, amabonga Joas muana dibaala uAhazia na amamugusula va gari baana bakaga ava bamababokisila; amamusuega na ndetsi andi o yibuku yiNdagu Nsambi. Anana amadagulu va misu maAthalie, kabogu asamaboku na basusu.

¹²Amasuegu bilima bisiamunu jogu na Yocheba o Ndagu Nsambi ava Athalie amaruminanga bulongu.