Read Punu 2 Misamu 24 Bible Online

2 Misamu 24 - Punu bible

2 Misamu 24

¹Joas amaba na yisambuali yibilima ava amabandila uruma na amarumanga magumana mabilima o Jerusalem. Diina dinguji andi Sibia muisi Bercheba.

²Joas amavaganga amamalasanga Fumu ubueji yitsingu yiotsu yiYoyada muvagulitsi upagu.

³Yoyada amawelila Joas bagatsi babeji na Joas amabura baana bababaala na babagetu.

⁴Va julu vana Joas amatabula diambu ulonda Ndagu Nsambi.

⁵Amabengusana bavagulitsi bapagu na bisi Levi na ambamma rie: Wendanu o misiengi miJuda uyegunga mbongu o Israel jiotsu yiri tsiulondulu Ndagu Nsambi enu yilima na yilima. Lensanu o divaga. Tumba bisi Levi basamadikipa.

⁶Kaga amanengila Yoyada agumaba yivunda yibavagulitsi bapagu na amamuwivula rie: Dibandu yi gugaarumina bisi Levi uyebonga dumandu dubaJuda na dubisi Jerusalem: Dumandu adu Moise musalitsi uFumu na baIsrael botsu bamasinga uvega ukelisa Mbura Nsambi aguvu yigara yipangini?

⁷Athalie na batu bandi bamabula Ndagu Nsambi na bamasalisa bima biotsu biyingitsi uyitsila baBaal o ndagu andi.

⁸Mbana kaga amaruma yiri bavayi yigara noyisunsa va dikotulu diNdagu Nsambi va gusu kana.

⁹Bamayenasamunanga o Juda jiotsu nesi o Jerusalem yiri bafutili Fumu dumandu adu Moise musalitsi Fumu amaruma baIsrael ava bamabila o kumu.

¹⁰Basefu botsu na batu botsu bamapodulanga na nsangu biotsu abi bamawivulu te na yigara yimabasa.

¹¹Ava bamalabila yiri yigara yimabasa mbongu tsipuela bamayeyiwakisa ombu bisi Levi nombu musonitsi kaga nombu yivunda yibavagulitsi bapagu abamatsitala. Bamayigabusanga vana; bamadivaganga yilumbu na yilumbu na bamadilanga mbongu tsipuela.

¹²Kaga na Yoyada bamatsiveganga ombu abamaba na yisalu usalanga o Ndagu Nsambi na bamangasisa bapakitsi bamamanyi na basarpati ulonda Ndagu Nsambi na basalitsi bamadilu na bakunga diwendi ombu botsu abamaba na yisalu ulonda Ndagu Nsambi.

¹³Basalitsi bamasalanga na bamalonda na buketi buogu; bamabuejisa Ndagu Nsambi na bamajiwarisa.

¹⁴Banomana yisalu bamabega mbongu atsimasialulu ombu kaga nombu muvagulitsi upagu Yoyada na bamavaga bisalulu biNdagu Nsambi na bisalulu bimuyitsa na bipagu tsiunyensa na mamoyi na bisalulu bisusu bilora na bilora jivema. Yitsingu yiotsu yiYoyada bamavagulila pagu tsiunyensa o Ndagu Nsambi.

¹⁵Yoyada amafuila va bununu; amafu ava amabila na kama na magumarieru mabilima.

¹⁶Bamamutsiga o musiengi uDavid va mugula bakaga mu mbari amavanganga maboti o Israel uyitsa Nsambi nokipanga Ndagu andi.

¹⁷Yoyada anofu basefu baJuda bamakevega uyitsa kaga; kaga amalaba ubueji.

¹⁸Anana baIsrael bamabusila Ndagu Nsambi jibataji bogu na bamasalila baAstarte na bakosi. La dibandu Fumu amanyoyila baJuda na bisi Jerusalem; bamaba na mbela.

¹⁹Ne nana Fumu amabatindila babiyitsi ubagabusa ombu gandi tumba basamagulu malubu mogu.

²⁰Zacharie muana dibaala uYoyada amagaangu na Yinyunyi yiNsambi; amarelama va gusu batu na amabatsingula rie: Nsambi jandi rie: Dibandu yi duisumunini maruma mami? Jenu dugefumngi na dugaa na magumba mu mbari dumandiyila nsima, meʼ wami nyudubusa.

²¹Kabogu bamatungila Zacharie fundu na musuga ukaga bamamutindila mamanyi va dulombili duNdagu Nsambi.

²²Kaga Joas amalibana maboti ma Yoyada taji andi na amasingisa dufu dumuana andi udibaala Zacharie. Ava amafuila Zacharie amagamuga rie: Fumu alabi diambu diedidi, abagabusili pila!

²³Va disukusulu duyilima bagora baSyrie bamayetoga na Joas na bamatola o Juda no Jerusalem. Bamaboka basefu botsu na bamatindila kaga jiDamas biotsu abi bamakinda.

²⁴Bagora baSyrie bamatola na mua dutalu dugeyi dubatu, diuleba Fumu amabawakisa bagora bapuela bapuela mu mbari bamaliyila Fumu Nsambi bataji bogu nsima. Anana baSyrie bamakilisila Joas.

²⁵Ava bamakakinina nandi na banomusila na maguga maneni, bivunda bamamutungila fundu mu diambu dimalungu mamuana dibaala umuvagulitsi upagu Yoyada; bamamuboka va tangi andi; anana amafuila. Bamamutsiga o musiengi uDavid tumba basamamutsiyila o mbura jibakaga.

²⁶Abamamutungila fundu miina mogu amama: Zabad muana dibaala uChimeat muisi Ammon na Yozabad muana dibaala uChimrit muisi Moab.

²⁷Mambu mandi masusu mamasonugu mu Dibuku dibaKaga nesi miina mabaana bandi bababaala. Amassia muana andi udibaala amaruma va yivinga yiandi.