Read Punu 2 Misamu 33 Bible Online

2 Misamu 33 - Punu bible

2 Misamu 33

¹Manasse amaba na yigumi na bilima bibeji ava amabandila uruma na amarumanga magumaranu na bilima biranu o Jerusalem.

²Amavaga amasamalasa Fumu ubueji, amavaga nsoruru tsibisi malongu ama Fumu amabingila baIsrael.

³Amamuerungulilambura tsiduyitsu atsi taji andi Ezekias amapansa, amarungila Baal binyensulu bipagu na amavalisa kosi jiAstarte na amakota muyitsa ubambuelili ne tsungi na wisi.

⁴Amarunga binyensulu bipagu bingana o Ndagu Nsambi, diuleba Fumu amavosa rie: Nyutsananga va gari batu bami o Jenisalem.

⁵Amarunga binyensulu bipagu bibambuelili na tsungi na wisi va ndombili tsiotsu tsibeji tsiNdagu Nsambi.

⁶Amanyensa baana bandi bababaala pagu o yibususu yiHinnom; amakipanga banganga bamunongu na munongu; amasola batu abamayitsanga binyunyi bibi noresanga. Amaviosulila uvaga amasamalasanga Fumu ubueji umunyoyisa.

⁷Amavalisa kosi aji amakotisa o Ndagu Nsambi. Diuleba Fumu amatsingula David na muana andi Salomon rie: O Ndagu Nsambi o Jerusalem musiengi agu nyimasola va gari misiengi miIsrael, nyuyetsananga mutubu va gari batu.

⁸Pa baIsrael bekelisi marama ama nyimabaruma na migaga ami musalitsi ami Moise amabaruma ukelisa, ngomuebasingisa ulinga yiari na yiari bibulongu abu nyimavega bataji bogu.

⁹Batu bamadutu na Manasse na bamaviolila ne bisi malongu uvaga mabi mabatu aba Nsambi amabingisila baIsrael.

¹⁰Fumu amavosa na Manasse na batu bandi tumba basamakipa amandi.

¹¹Mbana Fumu amasingisa bivunda bibagora bakaga jiAssyrie uyegaanga Manasse, bamamutunga na bapanga bakunga na bamamubega o Babylone.

¹²Anobasu na munyongu amasambila Fumu Nsambi andi na amakesunsa na murima uotsu va gusu Nsambi bataji bandi.

¹³Amamuwivula umulasa yingeba. Nsambi amamugulu na amasinga tsambu tsiandi; amamugabusa o Jerusalem nesi o bufumu buandi. Mbana Manasse amajaba yiri Fumu avu Nsambi mosi buandi.

¹⁴Adina dinovioga Manasse amarungisa yivaga yimusiengi uDavid ayimatola te no dikotulu adinengulungu Nyama tsiMamba ayi amatsieingisa o yiari ayi wisi ewendisini yiyileka yiGuihon yinovioga Ofel na amayisakiga tindi usakiga. Amatsanisa bivunda bibagaora o misiengi miotsu mikandu miJuda.

¹⁵Amatsiemusa bansambi bangana O Ndagu Nsambi na bakosi wandi na amapansa binyensulu bipagu bingana abi amalerungisa va julu mukongu uNdagu Nsambi nesi o Jerusalem; amapalisa muinsi uotsu o tsomu dimbu.

¹⁶Amamuerungisa yinyensulu yipagu yiFumu na va julu yionyi amavagulila pagu tsikabusulu tsimaboti tsimunongu na munongu na amaruma baJuda usalila Fumu Nsambi Israel.

¹⁷Batu bamamuevagulanga pagu tsiunyensa va mbura tsiduyitsu tumba bamatsivagulilanga yika Fumu Nsambi ogu.

¹⁸Misamu miusita miManasse na dusambu duandi na mambu mababiyitsi abamavosu nandi mudiina diFumu Nsambi Israel, miotsu mina mimasonugu mu Bisalu bibaKaga baIsrael.

¹⁹Dusambu duandi na nana Nsambi amamugululu na masumu mandi na nsimbulu tsiandi na mbura atsi amarungila mbura tsiduyitsu noreliga bakosi na bitumba nesi akakesunsa; motsu manamamasonugu mu Bisalu biHozai.

²⁰Manasse amafu na bamamutsiga o yiari yiandi. Amon muana andi udibaala amaruma va yivinga yiandi.

²¹Amon amaba na magumabeji na bilima bibeji ava amabandila uruma na amarumanga bilima bibeji o Jerusalem.

²²Amavaga amasamalasa Fumu ubueji dedi mosi nana taji andi Manasse amavayilanga; amavagulila bitumba biotsu pagu abi taji andi Manasse amavaga na amabiyitsanga.

²³Tumba asamakesunsa va gusu Fumu nana taji andi Manasse amakesunsila. Amm amaviosulila uvaga mabi.

²⁴Bivunda bibagora bamamutungila fundu na bamamubokisa o ndagu andi.

²⁵Tumba baJuda bamabokisa botsu abamamutungila fundu; bamabiatsa muana andi Josias kaga va yivinga yiandi.