Read Punu 2 Misamu 35 Bible Online

2 Misamu 35 - Punu bible

2 Misamu 35

¹Josias amaji feta Paque uyitsa Fumu o Jerusalem mu yilumbu yiyigumi na bina bitsungi jitega na bamaboka yindombu yiPaque.

²Amakotisa bavagulitsi bapagu mu bisalu biogu na amabawarisa usala yisalu yiogu o Ndagu Nsambi.

³Amanengila bisi Levi abamabiatsu usala yisalu yiFumu abamalonsanga baIsrael; amabatsingula rie: Sunsanu yigara yipangini yiNsambi o Ndagu aji Salomon muana dibaala uDavid kaga jiIsrael amarungisa; dugomueyinangulanga mu masambaka. Salilanu Fumu Nsambi enu na batu bandi baIsrael.

⁴Banu dukunsama muna bifumba bienu na muna makabu menu nana David kaga jiIsrael amasonina na muana andi Salomon amawarisa.

⁵Kelisanu mbura tsienu o Mbura Nsambi muna mikuta mibaana bataji benu na muna yifumba yibisi Le vi.

⁶Vagulanu yindombu yiPaque pagu, keliomisanu na yilambilianu baana bataji benu, dukavaga motsu ama Moise amavosila Fumu.

⁷Kaga Josias amavega baIsrael magumarieru matosini baana babindombu na babinsabi, biotsu bina biPaque na tosini yirieru tsibangombi.

⁸Bivunda biandi wandi bamavega bibulu na tondini ombu batu nombu bavagulitsi bapagu na bisi Levi. Hilquia na Zacharie na Yehiel, barumitsi baNdagu Nsambi bamavega tosini beji na kama yisiamunu tsibaana babindombu na babinsabi biPaque na kama yirieru tsibangombi ombu bavagulitsi bapagu.

⁹Basefu babisi Levi Konania va mosi na baana bataji bandi Chemaya na Netaneel na Hachabia na Yeiel na Yozabad bamavega bisi Levi tosini yiranu tsibaana babindombu na babinsabi na kama yiranu tsibangombi.

¹⁰Va dibandu difeta bavagulitsi bapagu na bisi Levi bamavioga o mbura tsiogu muna makabu mogu nana kaga amabarumina.

¹¹Bamatabula bindombu na binsabi miuru; bamawakisa bavagulitsi bapagu malungu, bavagulitsi bapagu bamamapuga yiari na yiari biyinyensulu yipagu; mbe ka bisi Levi bamaralanga bibulu.

¹²Bamakakasana bibulu, sinsa viri balumi babangombi abamaba pagu tsiunyensa atsiuvagulila Fumu, bamavega baIsrael muna bifumba biogu nana dimasonugulu mu dibuku diMoise.

¹³Bamagoka yindombu yiPaque nana bamarumunu na bamalamba biguji biyingitsi mu mambiji mamunongu na munongu. Bamagabila baIsrael botsu mbangu mbangu.

¹⁴Mbana bisi Levi bamalamba bijogu beni na bibavagulitsi bapagu abamaba baana baAaron mu mbari bavagulitsi bapagu bamabanganga na bisalu uvagula pagu tsiunyensa nesi matsi nesi pagu tisusu.

¹⁵Bawimbitsi abamaba bategula baAssaf bamaba va mbura ogu nana David na Assaf na Heman na Yedoutoun abamaba balongitsi bakaga bamarumunu; bakelisi bamakotulu bamabaanganga va mbura tsiogu. Basamaledunda bisalu biogu mu mbari bisi Levi basusu ulambila bebalambili biguji biPaque.

¹⁶Kabogu yisalu yiotsu yifeta Paque yiFumu yimasalu muna yilumbu yieni: ulamba feta Paque novagula pagu tsiunyensa va yinyensulu yipagu yiFumu nana kaga Josias amarumina.

¹⁷Feta Paque jinovioga baIsrael abamaba vana bamaji feta jimapa magambu na dufunusu te na yisambuali yibilumbu.

¹⁸Vasakalabana Paque ajimaba dedi na Paque ajiji o Israel ubanda na temu mubiyitsi Samuel; ne kaga jimosi jiIsrael asakakunsa Paque ajimaba dedi na aji Josias amakunsa, bisi Juda botsu na baIsrael na bisi Jerusalem bamaba guna.

¹⁹Paque eni jimaligulu mu yilima yiyigumi na yinana bidurumu dukaga Josias.

²⁰Yiotsu ayi Josias amamanina ulonda Ndagu Nsambi, Neco kaga jiEgypte amawenda uyebatoyisa o Karkemich va mugula umujamba uEuphrate. Josias amayebabegusana,

²¹tumba Neco amatinda bilumbi uyemuwivula rie: Kaga Juda diambu yi divu va gari jetu nagu? Ngeruyi namunyi uyitoga nagu tumba nyiruyi uyitoyisa bavinitsi bami basusu, Nsambi amatuma ulensa nodivaga. Guyatumuna paga na Nsambi aguvu nami mu mbari akeguvunga.

²²Tumba Josias asamamudunda, amabusa ugulu posulu tsiNeco atsimaruyila ombu Nsambi amawenda uyebatoyisa o kumu jiMeguiddo.

²³Utoga betoyi na barela badupalu bamanonga kaga Josias, mbana amaruma bagora bandi rie: Kusulianu mu mbari nyimatsimguga tindi utsunguga.

²⁴Bagora bandi bamamugusula va dikalu diandi didivita na bamamunangiga va dikalu diandi disusu; bamayenamubega o Jerusalem. Amafu na amatsigu o ngila tsibataji bandi. BaJuda botsu na bisi Jerusalem bamalila Josias.

²⁵Jeremie mubiyitsi amatuba duimbu dumanyonyi mu diambu didufu duJosias. Ubanda va temu eni te na namunyi bawimbitsi botsu beranguniningi Josias mu nyimbu tsiogu tsimanyonyi, dimakaluga yifu o Israel na nyimbu tsieni tsimasonugu mu dibuku dimanyonyi.

²⁶Misamu misusu miJosias mimasonugu

²⁷mu dibuku diBakaga baIsrael na dibaJuda; bumbeji buandi bumasonugu muna nana amabila usigama na migaga miFumu.