Read Punu 2 Misamu 36 Bible Online

2 Misamu 36 - Punu bible

2 Misamu 36

¹BaJuda bamasola Joachaz muana dibaala uJosias na bamamubiatsa kaga va yivinga yitaji andi o Jerusalem.

²Joachaz amaba na magumabeji na bilima birieru ava amabandila uruma na amaruma yika miweli mirieru o Jerusalem.

³Kaga jiEgypte amamupatula bufumu o Jerusalem. Va julu vana amaruma baJuda ufuta dumandu dutosini yirieru tsikilu tsilora jivema na magumarieru makilu tsilora.

⁴Kaga jiEgypte amasola Eliaquim muana taji uJoachaz uba kaga o Juda no Jerusalem na amavinsa diina diandi yika Joaquim. Mbe ka muana taji andi Joachaz amayenamubega o Egypte.

⁵Joaquim amaba na magumabeji na bilima biranu ava amabandila uruma na amarumanga yigumi na yilima yimosi o Jerusalem. Amavaga amasamalasa Fumu Nsambi andi ubueji.

⁶Nabucodonosor kaga jiBabylone amayetoga nandi na amamutungisa na bapanga bakunga uyemubega o Babylone.

⁷Amayenabega bisalulu biNdagu Nsambi o Babylone na amabikotisa o ndagu andi o Babylone.

⁸Misamu miJoaquim na nsoruru atsi amavaga na motsu amamaba nandi mimasonugu mu dibuku dibakaga baIsrael na dibaJuda. Joakin muana andi udibaala amaruma va yivinga yiandi.

⁹Joakin amaba na yinana yibilima ava amabandila uruma na amaruma miweli mirieru na yigumi yibilumbu o Jerusalem. Amavaga amasamalasa Fumu ubueji.

¹⁰Ava mutubu kaga Nabucodonosor amamubega o Babylone na bisalulu bidufunu duneni biNdagu Nsambi. Amasola Sedecias uba kaga o Juda no Jerusalem va yivinga yimuana taji andi Joakin.

¹¹Sedecias amaba na magumabeji na yilima yimosi ava amabandila uruma na amarumanga yigumi na yilima yimosi O Jerusalem.

¹²Amavaga amasamalasa Fumu Nsambi andi ubueji; amabusa mambu mamubiyitsi Jeremie amamavosu na musuga uFumu.

¹³Diuleba kaga Nabucodonosor amamulevisa pesi na diina diNsambi; amakaluga mumbini ombu gandi. Amagalisa murima andi tindi ugalisa na asamagabuga ombu Fumu Nsambi Israel.

¹⁴Basefu botsu babavagulitsi bapagu na basefu botsu babatu bamafunisa masumu ava bamavayila nsoruru tsimalongu motsu; bamasabula Ndagu Nsambi ajimaba Mbura andi o Jerusalem.

¹⁵Fumu Nsambi bataji bogu amabatindilanga bilumbi temu na temu uyebalubusa; amaronda uwamusa batu bandi nokelisa Mbura andi.

¹⁶Tumba baIsrael bamadesa bilumbi biNsambi na bamalensa mambu mandi nabamadesa babiyitsi bandi. Fumu amanyoga tindi unyoga te na kabu andi jisamagaru usaguga.

¹⁷Mbana Fumu amasindiga kaga jiBabylone uyebatoyisa na amabokisa bagora bogu o gari Ndagu Nsambi. Asamalasa yingeba ombu mutu uotsu nesi mufudu nesi numba nesi yivunda vo yinunu.

¹⁸Amabega bisalulu biotsu biNdagu Nsambi o Babylone nesi bigeyi nesi bineni nesi bilundulu biNdagu Nsambi nesi bilundulu bikaga na bibasefu bandi.

¹⁹Bisi Babylone bamanyensa Ndagu Nsambi na bamapansa bivaga biJerusalem, bamanyensa mandagu motsu mabakaga na bamabunga bima biotsu bidufunu duneni.

²⁰Kaga ogu amabega abasamaboku baviga o Babylone; bamaba baviga bandi na babategula bandi te na Babylone mamarumu na bisi Perse.

²¹Anana mbembu Fumu jimadugusulu aji mubiyitsi Jeremie amamuvosila: diwendi rie: bulongu budugusu bilumbu biandi uvuma. Bulongu buba sui te na dutalu dumagumidusambuali mabilima udugusu tsona tsiotsu atsi bamasabula.

²²Mu yilima yitega yidurumu duCyrus kaga jiPerse, Fumu amatabula diambu udugusu diambu diandi adimavosu na mubiyitsi Jeremie. Amavega Cyrus ditasa usamuna nosona diambu diedidi:

²³Guluanu adi Cyrus kaga jiPerse evosi rie: Fumu Nsambi aguvu o julu amasunsa bufumu buotsu o tsi durumu duami. Amatuma umuerunga Ndagu Nsambi o Jerusalem o bulongu buJuda. Jenu aduvu mu dutalu dubatu bandi gabuganu o Jerusalem. Fumu Nsambi awendi nogu!