Read Punu 2 Misamu 8 Bible Online

2 Misamu 8 - Punu bible

2 Misamu 8

¹Mu magumabeji mabilima Salomon amarungisila mandagu meni mabeji: Ndagu Nsambi na ndagu andi,

²amamuerungisa misiengi ami Hiram muisi Tyr amamuvega na amatsanisa baIsrael muna.

³Salomon amayetumuna Hamat-Soba na amagubonga.

⁴Amamuerungisa Tadmor o kumu va mosi na misiengi miotsu amimaba bisuegulu biHamat.

⁵Amamuerungisa Bet-Horan-Dessus na Bet-Horon-Dessous misiengi mikandu amimaba na bivaga na makotulu amamagomunu madilu.

⁶Amamuerungisa Baalat na misiengi miotsu usueyila biandi na misiengi mimakalu. Amarungisa miotsu ami amaronda urungisa o Jerusalem nesi o Liban nesi o malongu motsu ama amarumanga.

⁷Anana Salomon amakotisila batu bebaba o yisalu: baHitt na baAmor na baPerizie na baJebusie diwendi batu abasamaba baIsrael.

⁸Bamasiala o bulongu mu mbari baIsrael basamarungula ubaboka kabogu Salomon amabasalisa baviga; nana bavu te na namunyi.

⁹Tumba Salomon asamasalisa baIsrael baviga, bamaba bagora na basefu na bivunda bibagora na bivunda bimakalu na babeyitsi babakabala.

¹⁰Dutalu dubivunda bibisalu biSalomon: kama beji na magumaranu.

¹¹Salomon amaruma yiri mugatsi andi agumaba muana mugetu uPharaon agusuyi o musiengi uDavid uwenda o ndagu aji amamurungila. Amavosa rie: Mugatsi ami agotsananga o ndagu David kaga jiIsrael mu mbari jivu va mbura atsimakotusu yigara yipangini yiNsambi na jivu yingitsi.

¹²Ubanda va temu eni Salomon amavagulilanga Fumu pagu tsiunyensa va yinyensulu yipagu yiFumu ayimarungu va gusu kana.

¹³Amavagulanga pagu tsiunyensa nana Moise amarumina: pagu jiyilumbu na yilumbu na pagu jibatsona na pagu jibisusungi; kumbu yirieru kadi yilima nana Moise amarumina amavagulanga pagu va temu feta jimapa amagaa na dufunusu na feta jibatsona na feta jimasamba wandi.

¹⁴Amakotisa bavagulitsi bapagu mu bisalu biogu nana taji andi David amakunsila makabu diwendi rie: bavagulitsi bapagu na bisalu biogu na bisi Levi na bisalu biogu biuyitsanga Fumu nosalanga bisalu yilumbu na yilumbu va gusu bavagulitsi bapagu na bakelisi bamakotulu abamagabu mutu mutu makotulu mandi. Anana David mutu Nsambi amarumina.

¹⁵Basamabusa maruma makaga mu diambu dibavagulitsi bapagu na bisi Levi nesi mu diambu diotsu na dibilundulu wandi.

¹⁶Anana bisalu biotsu biSalomon bimasalulu te na yilumbu ayi Ndagu Nsambi jimabanda urungu te na yilumbu ayi jimasukila, kabogu Ndagu Nsambi jimasuka urungu.

¹⁷Mbana Salomon amawenda o Ession-Gueber no Elath o mugula mubu o bulongu buEdom.

¹⁸Kaga Hiram amasindiga makumbi na basalitsi bandi abamajaba umabega; va mosi na babeyitsi bamakumbi baSalomon jogu botsu bamawenda o Ofir na bamayenabega yigumi na tona yirieru tsilora ombu kaga Salomon.