Read Punu Esdras 1 Bible Online

Esdras 1 - Punu bible

Esdras 1

¹Mu yilima yitega yidurumu duCyrus kaga jiPerse, Fumu amatabula diambu udugusu diambu diandi adimavosu na mubiyitsi Jeremie. Amavega Cyrus ditasa usamuna nosona diambu diedidi rie:

²Guluanu adi Cyrus kaga jiPerse evosi rie: Fumu Nsambi aguvu o julu amasunsa bufumu buotsu o tsi durumu duami. Amatuma umuerungisa Ndagu Nsambi o Jerusalem o bulongu buJuda.

³Jenu aduvu mu dutalu dubatu bandi gabuganu o Jerusalem. Fumu Nsambi awendi nenu!

⁴Va mbura tsiotsu atsi baIsrael botsanini bisi yiari yieni bobavega lora jivema na lora yiri ava betolili o Jerusalem boba na pagu tsitondini na biruitsi ubega o Ndagu Nsambi.

⁵Basefu bamikuta mibifumba biJuda na biBenjamin na bavagulitsi bapagu na bisi Levi: botsu abamadila ditasa diNsambi bamakunsama uwenda uyerunga Ndagu Nsambi o Jerusalem.

⁶Botsu abamabambana nogu bamabavega bima bilora jivema na bilora na bima bisusu na biruitsi na bima bidufunu duneni tsiri utala pagu tsitondini.

⁷Kaga Cyrus amagabusa bisalulu biNdagu Nsambi abi Nabucodonosor amakinda o Jerusalem ubikotisa o ndagu bansambi bandi.

⁸Kaga amaruma Mitredat uba mukelisi ubilundulu nowakisa biotsu ombu Chechebassar agumaba muana kaga jiJuda.

⁹Dutalu dubiotsu adudu: magumarieru mansienga tsilora na tosini jinsienga tsilora jivema na magumabeji na yifu yimabaga

¹⁰na magumarieru mamamoyi malora na kama jina na yigumi yimamoyi malora jivema na tosini jibisalulu bisusu.

¹¹Bisalulu biotsu bilora na bilora jivema dutalu dubionyi dumaba tosini yiranu na kama jina. Ava jogu bamarambuyila o Babylone Chechebassar amabonga biotsu na amayenabibega ava bamagabusulu o Jerusalem.