Read Punu Esdras 3 Bible Online

Esdras 3 - Punu bible

Esdras 3

¹Mu tsungi jimusambuali baIsrael abamaba o misiengi miogu bamagukama o Jerusalem na murima mosi.

²Yechoua muana dibaala uYossadac na baana bataji bandi abamaba bavagulitsi bapagu na Zorobabel muana dibaala uChealtiel na baana bataji bandi bamamuerunga yinyensulu yipagu yiNsambi Israel uyevagula pagu tsiunyensa nana dimasonugulu mu migaga miMoise musalitsi Nsambi.

³Diuleba bamaduma bisi bulongu bamamureliga yinyensulu yipagu va yibuga yigulu na bamavagulila pagu tsiunyensa vana: pagu tsikedi na tsisiga.

⁴Bamakipa feta jima samba nana dimasonugulu: yilumbu na yilu mbu bamavagulanga pagu tsiunyensa nana bamavegulu dutalu uvagulanga kadi yilumbu.

⁵Adina dinovioga bamavagulanga pagu tsiyi lumbu na yilumbu na pagu tsibisusungi na tsibafeta uyitsila Fumu va julu vana mutu uotsu agumaronda uvagulila Fumu pagu amatsibega.

⁶Yilumbu yitega yitsungi jimusambuali bamabandila uvagulila Fumu pagu tsiunyensa diuleba bibuga biNdagu Nsambi jigona mbe bisakarungu.

⁷Bamafuta bapakitsi bamamanyi na bagominitsi bamandagu; va julu vana bamavega bisi Tyr na bisi Sidon biguji na malamu na matsi yiri bobapasila tsimbi tsisedera o Liban notsisabusa mubu te no Jaffa. Bamadivaga na musuga uCyrus kaga jiPerse.

⁸Yilima ayimubeji yidugabugu duogu o Jerusalem, musiengi uNdagu Nsambi, mu tsungi jimubeji Zorobabel muana dibaala uChealtiel na Yechoua muana dibaala uYossadac na baana bataji bogu abamaba bavagulitsi bapagu na bisi Levi bamabanda yisalu; bamavega bisi Levi aba maba na magumabeji mabilima ne uviolila, yisalu urumisa barungitsi baNdagu Nsambi.

⁹Yechoua na baana bandi bababaala na baana bataji bandi na Cadmiel na baana bandi ba babaala na yifumba yiHodavia bamafubana urumisa abamasalanga o Ndagu Nsambi. Bamawamusu na bisi Levi abamaba mu yi fumba yiHenadad.

¹⁰Ava basalitsi bamasundila bibuga biNdagu Nsambi bamaretsa bavagulitsi bapagu abamaduara bijungi biogu na abamaba na mi mbanda va mosi na bisi Levi abamaba bategula baAssaf abamaba na bambumbu uyena yitsanga Fumu nana bamarumunu na David kaga jiIsrael.

¹¹Bamagobisanga noyitsanga Fumu na duimbu duedudu: Yitsanu Fumu, avu muboti na durondu duandi duitsingingi te na mutubu! Batu botsu bamagamuganga na nsangu ugobisanga Fumu mu mbari urunga berungi bibuga biNdagu Nsambi.

¹²Tumba bavagulitsi bapagu bapuela na bisi Levi na basefu bamikuta abamanuna abamalaba Ndagu jitega bamalila tindi ulila ava bamalabila bibuga biNdagu eni. Tumba basusu bapuela bamalaba yika nsangu na nsangu.

¹³Basamamuerungula ujaba migamu miulila na minsangu mu mbari ugamuga begamuyi migamu mineni te na nduku jimagulunu vala.