Read Punu Esdras 6 Bible Online

Esdras 6 - Punu bible

Esdras 6

¹Mbana kaga Darius amavega diruma uyenarombanga dibuku didubayi o ndagu ajimasuegulu miganda na bima bidufunu duneni o Babylone.

²Mbana o Ecbatane musiengi ukandu uMedie bamarasuna dibuku adimasonugu diambu diedidi:

³Yilima yitega yidurumu duandi Cyrus amavega diruma diedidi: Ndagu Nsambi o Jerusalem jirungululu yiri voba mbura jiuvagulila pagu tsiunyensa; Ndagu eni jiurungulu bibuga bigulu; jiuba yirela yimagumarieru mametera na yiavu yimagumarieru mametera.

⁴Jiuba na milonga mirieru mimamanyi amamapaku na mulonga umosi utsimbi tsigona. Biotsu biufutu na kaga.

⁵Va julu vana bisalulu bilora na bilora jivema biNdagu Nsambi abi Nabucodonosor amagusula o Ndagu Nsambi o Jerusalem vengu biugabusu vana mbura aji bimaleba o Ndagu Nsambi.

⁶Kabogu Darius amasona muganda egugu ombu Tattenai murumitsi udisimu dina diEuphrate nombu Chetar-Boznai nombu bambatsi abetsani o disimu dina rie: Duyamuekipa diambu diedina.

⁷Dundanu baJuif, baningingi Ndagu Nsambi; murumitsi na bivunda bibaJuif bajirungulili vana mbura aji jimaleba.

⁸Guluanu diruma adi nyirumi: Dusalanga va mosi na bivunda bibaJuif urungulila Ndagu Nsambi; mbongu tsiufutila babaala beni tsiubongulu ombu kaga, atsiruyili mu dumandu dudisimu dina diEuphrate.

⁹Biotsu biwelimina uvagulila Nsambi aguvu o julu pagu tsiunyensa abibi: balumi babangombi na balumi babindombu na baana babindombu va julu vana ble na musayi na malamu na matsi, dukaveganga bavagulitsi bapagu abi bovondanga yilumbu na yilumbu; bayagambu na yima.

¹⁰Kabogu bonmgula uvagula pagu tsiunyensa atsiuguhmu mbunga jiboti ombu Nsambi aguvu o julu na basambilila kaga na baana bandi bababaala.

¹¹Pa mutu osumuna diedidi, nyirumi rie: Basomuni mukambu mu ndagu andi na bamugomini mu-uonyi; bapansi ndagu andi mbuengili mbuengili.

¹²Nsambi aguitsani o Jerusalem akilisi kaga jiotsu nesi dilongu diotsu aboweliga upansa Ndagu andi nolensa mambu mami. Menu Darius nyimaruma maruma memama. Kebananu, duyamabunsa.

¹³Tattenai murumitsi udisimu digunu diEuphrate na Chetar-Boznai na bambatsi bogu bamadedila maruma maDarius.

¹⁴Bivunda bibaJuif abamawarusu na Aggee mubiyitsi na Zacharie mubiyitsi agu maba muana dibaala uIddo urunga berungi Ndagu Nsambi na nsangu na bisalu biogu bimabueji. Kabogu bamamanisila bisalu nana duganu duNsambi Israel dumabila na nana bamarumunu na Cyrus na Darius na Artaxerxes bakaga baPerse.

¹⁵Ndagu jimasuka urungululu mu yilima yimurieru yitsungi Adar mu yilima yimusiamunu bidurumu duDarius.

¹⁶BaJuif na bavagulitsi bapagu na bisi Levi na batu basusu abamaruyila o buviga bamawakisa Ndagu Nsambi na nsangu ombu Nsambi.

¹⁷Mu duwakusulu duNdagu Nsambi bamavagula kama balumi babangombi na kama beji tsibalumi babindombu na kama jina tsibaana babindombu va mosi na bipagu jiutsindula dibumi diyigumi na bifumba bibeji biIsrael, diwendi rie: yigumi nabalumi babeji babinsabi.

¹⁸Bamagaba bavagulitsi bapagu na bisi Levi muna makabu mogu abamasolu usala yisalu yiNdagu Nsambi o Jerusalem nana dimasonugulu mu dibuku diMoise.

¹⁹Jogu abamaruga o buviga bamaji Paque mu yilumbu yiyigumi na bina bitsungi jitega.

²⁰Bavagulitsi bapagu na bisi Levi bamakeliomisa va mosi; bamaba balioma. Kabogu bisi Levi bamaba bawelimina utabula bindombu biPaque miuru; na bibavagulitsi bapagu ne bijogu beni.

²¹BaIsrael botsu bamaji feta Paque nesi abamaruyila o buviga nesi abamakakana na muinsi ubisi malongu abamaronda ufubana nogu uyitsa Fumu Nsambi Israel.

²²Bamaji feta jimapa magambu na dufunusu na nsangu uyitsila Fumu yisambuali yibilumbu. Fumu amababasa na nsangu mu mbari amavega kaga jiAssyrie murima ubaronda, adina dimawarisa mangolu mogu ava bamarungulila Ndagu Nsambi jiNsambi Israel.