Read Punu Esdras 9 Bible Online

Esdras 9 - Punu bible

Esdras 9

¹Motsu mana manosuka basefu bamatasuna novosa rie: Batu baIsrael na bavagulitsi bapagu na bisi Levi basamakakana na bisi malongu, begukuyili nsoruru tsiogu: tsibaCana na tsibaHitt na tsibaPerezie na tsibaJebusie na tsibaAmmon na tsibaMoab na tsibaEgypte na tsibaAmor.

²Bamawela na bamawelila baana bogu bababaala bamalongu meni, diwendi rie: batu baNsambi na bisi malongu meni bamafubana. Basefu na bivovi bamareyila ukota mu nsoruru tsieni.

³Nyinodigulu nyimapasa biduaru biami na yijungi yiami na nyimakefuga diviolu na yedu wandi; nyimagaangu na tindi munyongu.

⁴Nyimatsana yika utsana na munyongu te na pagu jitsisiga mbana batu botsu abamaduma Nsambi Israel bamagukama ombu gami mu diambu dinsoruru tsibaJuif abamaruyila o buviga.

⁵Ava pagu jitsisiga, nyinomana unyonganga nyimaretsama na bitsatsu bibiduaru biami mbana nyimakutama na nyimasamba miogu ombu Fumu Nsambi ami; nyimasambila rie:

⁶Nsambi ami, nyilabi motsu yika pisama na pisama! Aa Nsambi ami yisonyi nyilabi uge ngila ombu gagu. Mabi metu mamaviolila ufuna na mbela etu jimalabana nesi te no julu.

⁷Jetu botsu tuna mbela ubanda va temu bataji betu te na namunyi na mu diambu dimabi metu tumawakusulu jetu na bakaga betu na bavagu litsi betu bapagu ombu bakaga bangana, tuma laba divita nesi buviga na bima bietu bimaki ndu te na tuilabingi yisonyi.

⁸Tumba Fumu Nsambi, gumatuvayila mua maboti, gumatusila bansialutsu na gumatuviosa o mbura agu; gumatumonitsa mua yijalala ayimatuwamusa o buviga buetu.

⁹Nyiina Fumu Nsambi, tuvu baviga tumba gusamatuliyila nsima o buviga buetu. Gumatulasanga maboti mabakaga baPerse, gusamtusingisa uboku yiri turungulila Ndagu agu nomuereliga abimapansiga o Juda no Jerusalem agu tumatsananga sui.

¹⁰Aa Nsambi etu, diambu yi tuvosa va julu motsu mana? Jetu tumabusa migaga miagu.

¹¹Basalitsi bagu bababiyitsi bamabiga rie: Bulongu abu duyedila buvu nsoruru na nsoruru na batu abetsani guna bamabubasa na muinsi na mbivulu ubanda o yiari yimosi te no yisusu.

¹²Bamabuesa rie: Duyawetsa baana benu na baana bogu na duyawelila baana benu baana bogu na duyakipa busina buogu nesi maboti mogu yiri dubanganga na mangolu nojanganga biguji biboti bibulongu abuba disiala dibaana benu te na bategula benu.

¹³Aa Nsambi, tumalabanga maguga mu diambu dibifu bibi na mbela tsietu, gusamatukilisa dedi na mabi metu; gumatusingisa uba monyu, jetu atuvu va gusu agu namunyi.

¹⁴Je tumuesumuna maruma magu nomuekunsa mawela na bisi malongu abevayingi nsoruru? Kabu agu jigo muelabana ombu getu te na gutubunga tindi ubunga te na vagomuesiala ne mutu mosi?

¹⁵Aa Fumu Nsambi Israel, ndeʼ guvu usu ngama; gumatusingisa mua bansialutsu. Laba tuvu va gusu agu, tuna mbela tsiotsu, tugaatuwelimina.