Read Punu Nehemie 1 Bible Online

Nehemie 1 - Punu bible

Nehemie 1

¹Mambu maNehemie muana dibaala uHakalia. Mu tsungi Kisleu mu yilima yimagumabeji ava nyimabila o Suse musiengi ukandu,

²Hanani muana taji ami umosi na babaala bamosi bamaruyila o Juda. Nyimabawivula mu diambu dibaJuif bamosi abamasiala o buviga na mu diambu diJerusalem.

³Bamawaka rie: Bansialutsu bavu o Juda o buviga, belabingi maguga na yisonyi wandi. Mbe ka Jerusalem, bivaga bimapansiga na biabutsu bimanyenga.

⁴Nyinogulu mambu meni nyimatsana uyenalilanga; nyimaviosa bilumbu bipuela na munyongu uneni nesi ubusa uji. Nyimasambila Nsambi aguvu o julu rie:

⁵Aa Fumu Nsambi aguvu o julu, Nsambi aguvu muneni na aguvu na diduma! Guikelisi pangini agu na jogu abekelisi maruma magu na guilasi usigama uagu ombu jogu abegurondi.

⁶Kokolu tsiagu, kengili na liga matuji, gulu dusambu duami, menu aguvu musalitsi agu. Nyangu na mukolu nyisambilingi mu diambu dibaIsrael abavu basalitsi bagu. Kokolu, tanda masumu metu. Dingensa jetu na bataji bami tumavaga masumu;

⁷tumaguvayila dibi na tusamakelisa maruma na migaga na bingitsi abi gumaruma musalitsi agu Moise.

⁸Rangimina diambu adi musalitsi agu Moise amaguvosila rie: Pa dugoba dusigama nyudupansa o malongu amavu yiari na yiari;

⁹tumba pa dugabuga ombu gami na pa dukelisa maruma mami nomakipanga, nesi ava dubingulu yiari na yiari, nyudubengusana, jenu botsu va mosi na nyudugabusa o mbura aji nyimatsaninanga.

¹⁰Fumu, jetu tuvu basalitsi bagu na tuvu batu bagu! Gumatugobula na mangolu magu maneni.

¹¹Kokolu tsiagu Fumu, gulu dusambu duami na tsambu tsibasalitsi bagu abegudumi! Buejisa ama nyirondi uvaga nosingisa kaga ukwagula na buranga. Nyimaba mutu agumagabila kaga malamu va temu eni.