Read Punu Nehemie 13 Bible Online

Nehemie 13 - Punu bible

Nehemie 13

¹Muna yilumbu yieni ava bamarangila dibuku diMoise va gusu batu, bamaranga yiri baAmmon na baMoab bayakotusu mu dibuli dibatu baNsambi.

²Basamayebengusana baIsrael na biguji na mamba na bamanengila Balaam uyebaloyila baIsrael tumba Nsambi etu amakalusa mulogu eni miula.

³BaIsrael banogulu amamarangu bamatabula diambu ukakasana benyi botsu nogu.

⁴Ne diambu diedina dikalabana Eliachib agumaba muvagulitsi upagu amavegu yisalu ukipanga bibuku biNdagu Nsambi.

⁵Amaba yiburu yiTobia la dibandu amamuveyila yibuku yindagu yineni ayimaleba yisuegulu yimiensili nesi bima bimbunga jiboti nesi bisalulu nesi yimosi mu digumi bifufu nesi malamu nesi matsi, diwendi rie: biotsu abimaba dikabu dibisi Levi na dibawimbitsi na dibakelisi bamakotulu.

⁶Nyisamba o Jerusalem ava mambu meni motsu mamalabinina mu mbari nyimagabuga ombu kaga mu yilima yimagumarieru na mibeji bidurumu duArtaxerxes kaga jiBabylone. Ava disukusulu diyilima nyimadila musuga ukaga

⁷na nyimagabuga o Jerusalem. Nyimalaba dibi diEliachib adi amavaga uvega Tobia yibuku yiNdagu Nsambi.

⁸Nyimanyoga na nyimabuayisa bima biotsu biTobia o gusu kana.

⁹Nyimaruma rie: Liomisanu bibuku bindagu abivu bisuegulu bimiensili nesi bima biyingitsi nesi bima bimbunga jiboti.

¹⁰Nyimagulu wandi yiri bisi Levi basamamuedilanga makabu mogu ladibandu basamamuesalanga bisalu biogu, mutu mutu amagabuga o yiari yiandi. Bawimbitsi bamavaga munongu mosi.

¹¹Nyimasiemba bivovi na nyimabawivula rie: Dibandu yi Ndagu Nsambi jimalibununu? Mbana nyimagukiga bisi Levi na bawimbitsi na nyimabagabusa o bisalu biogu.

¹²Kabogu baJuif bamamuebega yimosi mu digumi bifufu na bimalamu na bimatsi o bisuegulu.

¹³Nyimavega Chelemia muvagulitsi upagu na Sadoc agumaba musonitsi na Pedaya agumaba muisi Levi yisalu ukelisanga bisuegulu na nyimabavega Hanan muana dibaala uZakour mutegula uMattania ubawamusa; botsu bamaba basigama. Yisalu yiogu yimaba ugabila baana bataji bogu bima biyingitsi.

¹⁴Aa Nsambi ami tangimini mu motsu ama nyimavaga! Guyalibana usigama uami ava nyimasalila mu Ndagu Nsambi nesi mu yisalu yiNsambi ami.

¹⁵Muna bilumbu bieni mu yilumbu yiuvuma nyimalaba usala besali na bigamunu biogu. Basusu ulongila belongili baburu malamu na mirayisan na mifiga na bima bimunongu na munongu ubisuvanga o Jerusalem. Nyimabagandisa muna yilumbu ayi bamasumbisilanga bima biogu.

¹⁶Vamaba bisi Tyr wandi abamatsaninanga o Jerusalem, jogu wogu bamabeganga banyama bamamba na bima bisusu yilumbu yiuvuma uyenabisumbisanga ombu baJuda nombu bisi Jerusalem.

¹⁷Nyimasiemba baneni baJuda na nyimabawivula rie: Yi duivayi? Tsiri yilumbu yiuvuma duisumuni?

¹⁸Tsiri nana bataji benu bamavayilanga? Tsiri la dibandu Nsambi etu amatusingisa ulabanga maguga meni motsu nesi misiengi mietu. Jenu duirombisi Nsambi umuelasa baIsrael kabu andi mu mbari duisumuni yilumbu yiuvuma.

¹⁹Mbana nyimaruma yiri badibiyingi biabutsu biJerusalem ne yilumbu yiuvuma yikatola te na yilumbu yiotsu. Nyimasunsanga basalitsi bami bamosi va gusu kana ugubitsa batu ukotisa mifuna yilumbu yiuvuma.

²⁰Kabogu batiyitsi bamuteti bamatsotsu usilamanga mukolu mosi vo mibeji va gusu kana Jerusalem.

²¹Nyimabasiemba rie: Dibandu yi duisilimini va mugula yivaga? Pa dumuevaga nana nyudukilisa. Ubanda va temu eni basamamueruganga yilumbu yiuvuma.

²²Nyimaruma bisi Levi wandi ukeliomisa noyekelisanga biabutsu bimusiengi yiri batu boyitsanga yilumbu yiuvuma. Aa Nsambi ami, tangimini mu dionyi! Ndeʼ aguvu muboti ndasi yingeba!

²³Muna bilumbu bieni nyimalabila baJuif abamawela bagetu baAsdod na baAmmon na baMoab.

²⁴Baana bogu bamosi bamavosanga mbembu jiAsdod na basusu mbembu tsingana; basamajabanga uvosa mbembu jibaJuif.

²⁵Nyimabasiemba na nyimabaloga; nyimadimba bamosi na nyimarubula basusu nanga. Nyimabagandisa rie: Duyawetsa baana benu babagetu na baana bogu bababaala na baana benu bababaala bayawela baana bogu babagetu, ne jenu beni duyawela baana bogu; mbana nyimabalevisa pesi na diina diNsambi mu dionyi.

²⁶Nyimabawivula rie: Tsiri adina Salomon kaga jiIsrael amasumuna? Vasamaba kaga ajimabagunu nandi o malongu motsu, amarondungu na Nsambi andi; Nsambi amamuvaga kaga jiIsrael jiotsu tumba bagetu bangana bamamurombisa uvaga masumu maneni.

²⁷Tsie tudusingisa uvayila Nsambi etu dibi dineni nowela bagetu bamalongu mangana?

²⁸Muana umosi uYoyada mutegula uEliachib agumaba yivunda yibavagulitsi bapagu amaba boji buSaneballat muisi Hora. La dibandu nyimamubingisa.

²⁹Aa Nsambi ami barangimini! Bamasumuna buvagulitsi bupagu na pangini ajimavangunu na bavagulitsi bapagu na bisi Levi.

³⁰Nyimaliomisa batu ava nyimagusulila batu bangana; mutu mutu na yisalu yiandi.

³¹Nyimamuewarisa diambu dipagu tsimikansu na matemu matsionyi nesi pagu tsibiumanga. Aa Nsambi ami tangimini nopayila maboti!