Read Punu Nehemie 3 Bible Online

Nehemie 3 - Punu bible

Nehemie 3

¹Eliachib yivunda yibavagulitsi bapagu amaretsama na baana bataji bandi bavagulitsi bapagu. Bamarungulila yiabutsu ayimanengulungu Bindombu na banoyigomina bamayiwakisa ombu Fumu. Bamarungulila bivaga te no ndagu jisakama ajinengulu Kama, banobiwakisa ombu Fumu bamamuerungulila te no ndagu jisakama ajinengulu Hananeel.

²Bisi Jericho bamarunga va mu gula Eliachib mbana Zakour muana dibaala ulmri amarunga va mugula ogu.

³Baana bababaala baSenaa bamarungulila biabutsu abimanengulu Nyama tsiMamba na biotsu biwelimina ubinamiga.

⁴Abamasala va mugula ogu baMeremot baana bababaala baOuria na bategula baHaccos; abamasala va mugula ogu baMechoullam, baana bababaala baBerekia na bategula baMechezabel, agumasala va mugula ogu Sadoc muana dibaala uBaana.

⁵Abamasalanga va mugula ogu bisi Tecoa tumba baneni bogu basamakevega usala bisalu bibafumu bogu.

⁶Yechana muana dibaala uPassea na Mechoullam muana dibaala uBessodia, jogu bamarungulila yiabutsu yiGulu na biotsu biwelimina uyinamiga.

⁷Va mugula ogu Melatia muisi Gabaon amasalanga na Yadon muisi Meronot va mosi na baGabaon na bisi Mispa abamaba o tsi durumu dumurumitsi udisimu digunu dimujamba Euphrate.

⁸Ouziel agumasalilanga bisalu bilora, jandi amaba muana dibaala uHaraya, mbana Hanania agumasalanga miyombu. Jogu wogu bamarungulila o Jerusalem te no mbura aji yivaga yimaroga.

⁹Refaya muana dibaala uHour amarungulila va mugula ogu, amaba sefu jiyiari yimosi yiJerusalem.

¹⁰Yedaya muana dibaala uHaroumaf amasalanga va mugula ogu va nsungisini na ndagu andi; Hattouch muana dibaala uHachabneya amasalanga va mugula andi.

¹¹Malkia muana dibaala uHarim na Hachoub muana dibaala uPahat-Moab bamarungulila yiari yimosi yiyivaga va mosi na ndagu jisakama ajinengulu Foumeaux.

¹²Challoum muana dibaala uHallohech sefu jiyiari yisusu yiJerusalem amarungulila va mugula ogu, jogu na baana bandi babagetu.

¹³Hamoun na bisi Zanoa bamarungulila yiabutsu yiYibususu, bamayirungulila na biotsu biwelimina uyinamiga. Bamarungulila kama yiranu tsimetera te no yiabutsu ayimanengulu Mibondu.

¹⁴Malkia muana dibaala uRekab agumba sefu jiBet-Kerem amarungulila yiabutsu ayimanengulu Mibondu. Amayirungulila na biotsu biwelimina uyinamiga.

¹⁵Challoun muana dibaala uKol-Hoze agumaba sefu jiyiari ayinengulu Mispa amarungulila yiabutsu yiYileka, amayirungulila na biotsu biwelimina uyinamiga va julu vana amarungisa yivaga te no dianga JiSiloe va mugula nungi kaga te no yikadi ayimavindama o musiengi uDavid.

¹⁶Mbana Nehemie muana dibaala uAzbouc agumaba sefu jiBet-Sour amaba va mugula andi, amarungulila te na va nsungisini na mangila maDavid te no dianga adimarungu nesi te no mandagu mabagora bakaga.

¹⁷Mbana va mugula andi bisi Levi abamasalanga: Rehoum muana dibaala uBani na va mugula andi Hachabia agumba sefu jiyiari yimosi yiQueila, diwendi rie: yiari yiandi,

¹⁸mbana Bavai muana dibaala uHenadad agumaba sefu jiyiari yisusu yiQueila.

¹⁹Ezer muana dibaala uYechoua agumaba sefu jiMispa amarungila o yiari yisusu yiyivaga na nsungisini na mbura aji bamamatila o yilundulu yibitogulu, diwendi rie: va diroku diyivaga.

²⁰Va mugula andi Barouk muana dibaala uZabbai amarungulila na mangolu o yiari yisusu, ubanda va diroku diyivaga te no dikotulu dindagu jiEliachib te no kodu mosi jindagu andi.

²¹Va mugula andi Mermot muana dibaala uOuria mutegula uHaccos amasalanga o yiari ayimaba va gari dikotulu na kodu ndagu jiEliachib.

²²Mbana va mugula andi bavagulitsi bapagu abamatsananga yiari na yiari biJerusalem bamasalanga.

²³Va mugula ogu Benjamin na Hachoub bamarungulila va nsungisini na mandagu mogu. Va mugula ogu Azaria muana dibaala uMaasseya mutegula uAnania amasalanga va mugula ndagu andi.

²⁴Va mugula andi Binnoui muana dibaala uHenadad amarungulila yiari yisusu ubandila va ndagu jiAzaria te no diroku nesi te no yitungu yiyivaga.

²⁵Palal muana dibaala uOuzai amasalanga va nsungisini na diroku te no ndagu jisakama jikaga ajimaba o yiari yibagora. Mbana Pedaya muana dibaala uParoch amasalanga va mugula andi,

²⁶basalitsi baNdagu Nsambi abamatsananga o yiari yiOfel bamasalanga te na va nsungisini na yiabutsu ayimanengulu Mamba.

²⁷Va mugula ogu baTecoa bamarungulila yiari ayimabambana va nsungisini na ndagu jisakama te no yiari yiyivaga yiOfel.

²⁸Ubongila va yiabutsu ayimanengulu Bakabala, bavagulitsi bapagu bamasalanga, mutu mutu va gusu ndagu andi.

²⁹Va mugula ogu Sadoc muana dibaala ulmmer amasalisa Chemaya muana dibaala uChekania agumaba mukelisi udikotulu diyiari ayi wisi epalili, amasalanga va gusu ndagu andi.

³⁰Va mugula ogu Hanania muana dibaala uChelemia na Hanoun muana dibaala umusiamunu uSalaf bamarungulila yiari ayibambini. Va mugula ogu Mechoullam muana dibaala uBerekia amasalanga va nsungisini na ndagu andi.

³¹Mbana Malkia, musalitsi ulora amasalanga te no ndagu jibasalitsi baNdagu Nsambi te no yibuku yindagu ayimaba va yitungu.

³²Basalitsi balora basusu na batiyitsi bamuteti bamasalanga ubongila va yibuku yindagu ayimaba va yitungu yijulu jiyivaga te no yiabutsu ayimanengulu Bindombu.

³³Ava Saneballat amagululu yiri urunga tuirungulili yivaga amanyoga tindi unyoga.

³⁴Amadesa baJuif na amavosa va gusu baana bataji bandi na va gusu bagora baSamarie rie: Dibandu yi batsoritsi beni babaJuif besalili? Tsie bomuerungulila? Bovagula pagu tsiunyensa? Bomanisila yisalu mu yilumbu yimosi? Bomuesalisa mamanyi amamaviku ava mandagu mamanyengila?

³⁵Tobia muisi Ammon amaba va mugula andi kabogu amavosa rie: Barungingi! Yika yitsalala omata va julu yionyi na mamanyi motsu mopansiga yiari na yiari.

³⁶Aa Nsambi etu, guluati nana betusiengili! Bagabusili bisiengu biogu na bawakisi ombu bakinditsi abobabega baviga o bulongu bungana!

³⁷Guyabatanda dibi diogu na masumu mogu mayalibunu mu mbari bamatusienga jetu barungitsi.

³⁸Jetu tumarungulila yivaga: yimabengusana yiari na yiari na yimamata va gari mu mbari mutu mutu amakevega usala.