Read Punu Nehemie 4 Bible Online

Nehemie 4 - Punu bible

Nehemie 4

¹Tumba Saneballat na Tobia na baArab na baAmmon na baAsdod banogulu yiri bivaga biJerusalem umata bimati na maluta mamabanda udibama bamanyoga tindi kabu

²Jogu botsu bamagungasana uyetumuna Jerusalem nogubasa kimbu.

³Kabogu tumasambila Nsambi etu na tumasola batu utukelisa nyangu na mukolu yiri bagotutumuna.

⁴Tumba baJuda bamavosa rie: Basalitsi mangolu usuka mesuki, bisalu bivu bipuela, tsatsabi tugorungula umuerungulila yivaga!

⁵Mbe ka batu abetuvini betasi yiri tuvu bidunga na tuvu madiba la dibandu betasili yiri borungula utuboka nosikiga yisalu.

⁶Kabogu baJuif abamatsananga bebeli na batu abamatuvina bamaruganga ne yigumi yikumbu uyitulubusa. Jogu rie: Uruga beruyili yiari na yiari.

⁷Mu mbura atsisakarungu nesi o nsima yivaga nyimasunsa batu muna mikuta miogu; botsu bamaba bakunsama na majenga na makongu na bapita.

⁸Nyinogengila motsu nyimaretsama na nyimavosa na baneni na bivovi na batu basusu rie: Duyabaduma! Rangiminanu Fumu aguvu muneni na aguvu na diduma, toganu ukelisa baana bataji benu na baana benu bababaala na babagetu na bagatsi benu na mandagu menu!

⁹Batu abamatuvina bamagulu yiri tumalubusu na Nsambi amabunga yisalu yiogu. Kabogu tumarungula ugabuga o yivaga, mutu mutu o yisalu yiandi.

¹⁰Tumba ubandila na yilumbu yieni dikabu dimosi dibasalitsi bami bamasalanga na dikabu disusu dimaba dikunsama na makongu na bangubu na bapita na bikutu bimadilu bimagagala. Basefu bamakelisa baJuda botsu abamarungisa yivaga.

¹¹Abamanangulanga na abamanangusana mifuna bamasalanga na dikaka dimosi mbe ka dikaka disusu bamagaanga bitogulu;

¹²bamasu botsu, mutu mutu na dijenga diandi mu dilungu ava bamasalilanga.

¹³Dibaala agumasiganga mumbanda amaba va mugula ami. Nyimatsingula bivunda na bivovi na batu basusu rie: Yisalu yivu yiranga na yivu yineni na tumapansiganu yiari na yiari biyivaga na bamosi bamakakana na basusu.

¹⁴Ava mumbanda usigulu mbura yika la mbura aji duba dukagukama ombu gami. Nsambi etu otutoyila!

¹⁵Anana tumasalila yisalu; bamosi na majenga va makaka kedi kedi te na mukolu.

¹⁶Vana temu eni nyimaruma batu rie: Mutu mutu asilimi o Jerusalem na musalitsi andi yiri boba bawatsi mukolu na bosalanga nyangu.

¹⁷Tusamavula biduaru bietu, nesi menu nesi baana bataji bami nesi basalitsi bami nesi bawatsi abamandukanga; mutu mutu amaba na bitogulu biandi.