Read Punu Nehemie 5 Bible Online

Nehemie 5 - Punu bible

Nehemie 5

¹Yilumbu yimosi batu bamosi na bagatsi bogu bamaba na mitatu mineni mu diambu dibaana bataji bogu baJuif.

²Bamosi bamavosa rie: Jetu na baana betu bababaala na babagetu tuvu bapuela, batuveyi ble abi tujanganga yiri tugofu.

³Basusu bamavosa rie: Vengu tuvega manungi metu motsu nesi ameburingi mirayisan nesi mandagu metu udilanga ble; ava dungosu dunsala.

⁴Basusu bamavosa rie: Jetu tumasomba badoli ufuta kaga dumandu dumanungi metu.

⁵Yika tsie tugaa baana bataji? Baana betu na baana bogu bagaa dedi? Laba tumasundusu te na baana betu bamosi bamakotusu o buviga. Yi turungula uvaga, manungi metu motsu mamabongu kala na basombisitsi?

⁶Ava nyimagululu mitatu miogu nyimanyoga tindi unyoga.

⁷Kabogu nyimatabula diambu usiemba bivunda na bivovi mu mbari bamalasa baana bataji bogu maguga. Kabogu nyimabanengila o yibenguna yineni.

⁸Nyimabatsingula rie: Na mangolu metu tumakobula baana bataji betu abamasumbusu o malongu mangana. Mbana jenu beni na jenu beni dusumbasana? Bamavola sui mu mbari diambu dimabagaanga.

⁹Mbana nyimavosa rie: Duna mbela. Dugaa na goma Nsambi etu? Dugegulu bisi malongu abetuvini betusiengi?

¹⁰Meʼ wami na baana bataji bami na basalitsi bami tumabasombisa badoli na ble. Dundanu usuyiga abi dumasombisa!

¹¹Kabogu bagabusilianu manungi mogu motsu namunyi nesi mioliva miogu nesi mandagu mogu, busanu nesi mbika, sinsa viri abi dumabasombisa; mbongu na ble na malamu na matsi.

¹²Bamawaka rie: Tubigabusa na tugomuebasuyiga; tuvaga adiguivosi. Mbana nyimanengila bavagulitsi bapagu na nyimalevisa basombisitsi pesi va gusu ogu yiri bagobunsa pangini.

¹³Nyimakuka yijungi yiami na nyimavosa rie: Nsambi akuki mutu uotsu agugokelisa pangini eni! Amupatuli ndagu andi na biandi biotsu! Mutu eni asiali miogu na miogu! Dibuli diotsu bamavosa rie: Amen! Botsu bamayitsa Fumu. Na batu botsu bamakelisa pangini.

¹⁴Ubandila na yilumbu ayi kaga amapayila murumitsi ubaJuif o yiari yiJuda na yilima yimagumabeji te na yilima yimagumarieru na bibeji bikaga Artaxerxes, diwendi rie: yigumi na bilima bibeji, nesi menu nesi baana bataji bami tusamakusuyila mu mbongu tsimurumitsi.

¹⁵Barumitsi abamateyila bamakambisa batu, bamabatsotsa biguji na malamu va julu vana magumana mambongu; nesi basalitsi bogu bamalasanga batu maguga. Nyisamavaga munongu mosi mu mbari nyimaduma Nsambi.

¹⁶Nyimasala urungulila yivaga yieyiyi; jetu na basalitsi bami basamapatula ne mutu mosi nungi andi va julu vana basalitsi bami botsu bamasalanga va mosi nami.

¹⁷Kama na magumaranu mabivovi bibaJuif bamajanga va tavula ami va mosi na batu abamaruganga uyitulaba.

¹⁸Yilumbu na yilumbu bamalambisanga ngombi mosi na bindombu bisiamunu abimasolu na batsoli wandi; mu kadi yigumi yibilumbu bamambeyilanga malamu. Ne nana nyisamatsotsa batu dikabu dimurumitsi mu mbari bisalu biotsu bimabagengila; bamaba na mufuna uneni.

¹⁹Aa Nsambi ami, tangimini mu motsu ama nyimavayila batu bebaba! Ndasi yingeba yiagu!