Read Punu Nehemie 7 Bible Online

Nehemie 7 - Punu bible

Nehemie 7

¹Yivaga yinorungululu na biabutsu binonamugu bakelisi bamakotulu na bawimbitsi na bisi Levi bamakota mu bisalu biogu.

²Nyimawakisa durumu duJerusalem ombu muana taji ami Hanani nombu Hanania agumaba yivunda yibagora; amaba mutu usigama na amadumanga Nsambi uviolila basusu.

³Nyimabatsingula rie: Biabutsu biJerusalem biyadibulungu te na diweru adi batu bogulungu yiusila; ava tsisiga bodibiyila biabutsu ava bakelisi bamakotulu bakivu vana. Solanu bagora va gari bisi Jerusalem, mutu mutu okelisa mbura andi nesi ndagu andi.

⁴Diuleba Jerusalem umaba uneni yika pesu batu bamatsana muna; mbe basakarunga mandagu mapuela.

⁵Nsambi ami amapega ditasa ugukiga bivunda na bivovi na batu ubasansama. Nyimaranga dibuku dibukulu bujogu abamareyila na nyimalaba mambu ameduki:

⁶Durangu dubisi yiari yiJuda abamaruyila o buviga buNabucodonosor kaga jiBabylone, jogu abamagabusila o Jerusalem no bulongu buJuda; mutu mutu amagabuga o musiengi andi.

⁷Bivunda bijogu abamagabuga ababa: Zorobabel na Yechoua na Nehemia na Azaria na Raamia na Nahamani na Mordokai na Bilchan na Misperet na Bigvai na Nehoum na Baana. Durangu dubabaala baIsrael adudu:

⁸Yifumba yiParoch yimaba tosini beji kama mosi na magumidusambuali na babeji;

⁹yifumba yiChefatia yimaba kama yirieru na magumidusambuali na babeji;

¹⁰yifumba yiAra yimaba kama yisiamunu na magumaranu na babeji;

¹¹yifumba yiPahat-Moab, diwendi rie: bategula baYechoua na Yoab; yimaba tosini beji na yinana yikama na yigumi na yinana;

¹²yifumba yiElam yimaba tosini na kama beji na magumana na bana;

¹³yifumba yiZattou yimaba yinana yikama na magumana na baranu;

¹⁴yifumba yiZakai yimaba yisambuali yikama na magumasiamunu;

¹⁵yifumba yiBinnoui yimaba kama yisiamunu na magumana na yinana;

¹⁶yifumba yiBebai yimaba kama yisiamunu na magumabeji na yinana;

¹⁷yifumba yiAzgad yimaba tosini beji na kama yirieni na magumabeji na babeji;

¹⁸yifumba yiAdonicam yimaba kama yisiamunu na magumisiamunu na yisambuali;

¹⁹yifumba yiBigvai yimaba tosini beji na magumasiamunu na yisambuali;

²⁰yifumba yiAdin yimaba kama yisiamunu na magumaranu na baranu;

²¹yifumba yiAter, bategula baHizquia yimaba magumidufu na yinana;

²²yifumba yiHachoum yimaba kama yirieru na magumabeji na yinana;

²³yifumba yiBessai yimaba kama yirieru na magumabeji na bana;

²⁴yifumba yiHarif yimaba kama na digumi na babeji;

²⁵yifumba yiGabaon yimaba magumidufu na baranu;

²⁶bisi Bethleem na Netofa bamaba kama na magumidunana na yinana;

²⁷bisi Anatot bamaba kama na magumabeji na yinana;

²⁸bisi Bet-Azmavet bamaba magumana nababeji;

²⁹bisi Quiriat-Yearim na Kefira na Beerot bamaba yisambuali yikama na magumana na barieru;

³⁰bisi Rama na Gueba bamaba kama yisiamunu na magumabeji na umosi;

³¹bisi Mikmas bamaba kama na magumabeji na babeji;

³²bisi Bethel na Ai bamaba kama na magumabeji na barieru;

³³bisi Nebo ususu bamaba magumaranu na babeji;

³⁴yifumba yisusu yiElam yimaba tosini na kama beji na magumaranu na bana;

³⁵yifumba yiHarim yimaba kama yirieru na magumabeji;

³⁶bisi Jericho bamaba kama yirieru na magumaranu na baranu;

³⁷bisi Lod na Hadid na Onobamaba yisambuali yikama na magumabeji na umosi;

³⁸bisi Senaa bamaba tosini yirieru na yifu yikama na magumarieru.

³⁹Bavagulitsi bapagu ababa: yifumba yiYedaya bategula baYechoua yifu yikama na magumidusambuali na barieru;

⁴⁰yifumba yilmmer yimaba tosini na magumaranu na babeji:

⁴¹yifumba yiPachehour yimaba tosini na kama beji na magumana na yisambuali;

⁴²baana bababaala baHarim ba maba tosini na digumi na yisambuali.

⁴³Bisi Levi ababa: baana bababaala baYochoua na baCadmiel diwendi rie: baana bababaala baHodeva bamaba magumidusambuali na bana.

⁴⁴Bawimbitsi ababa: baana bababaala baAssaf bamaba kama na magumana na yinana

⁴⁵Bakelisi bamakotulu ababa: baana bababaala mu yifumba yiChalloum na yiAter na yiTalmon na yiAccoub na yiHatita na yiChobai bamaba kama na magumarieru na yinana.

⁴⁶Basalitsi baNdagu Nsambi bamaba bategula baSiha na baHassoufa na Tabbaot

⁴⁷na baQueros na baSia na baPadon

⁴⁸na baLebana na baHagaba na baChalmai

⁴⁹na baHanan na baGuiddel na baGahar

⁵⁰na baReaya na baRessin na baNecoda

⁵¹na baGazam na baOuza na baPassea

⁵²na baBesai na baMeounim na baNefouchessim

⁵³na baBacbouc na baHacoufa na baHarour

⁵⁴na baBaslit na baMehida na baHarcha

⁵⁵na baBarcos na baSisra na baTema

⁵⁶na baNessia na baHatifa.

⁵⁷Dikabu dimosi dibategula baSalomon ababa: Sotai na Soferet na Perida

⁵⁸na Yala na Darcon na Guiddel

⁵⁹na Chefatia na Hattil na Pokeret-Hassebaim na Amon.

⁶⁰Dutalu duotsu dubasalitsi baNdagu Nsambi na dubategula baSalomon: kama yirieru na magu midufu na babeji.

⁶¹Abamarambuyila o Tel-Mela na Tel-Harcha na Keroub, Addon na Immer basamarungula ujabisa mandagu mabataji bogu nesi bifumba bibakaga bogu, ujabisa yeri bavu baIsrael.

⁶²Bategula baDelaya na baTobia na baNecoda bamaba kama yisiamunu na magumana na babeji.

⁶³Va gari bavagulitsi bapagu ababa: bategula baHobaya na baHaccos na baBarzillai (amalugu diina dieni mu mbari amawela muana mugetu uBarzillai agumba muisi Galaad).

⁶⁴Bamaromba ujaba bukulu buogu tumba basamasonu muna. Kabogu bamagengulungu muinsi na bamabagusulu mu yisalu yibuvagulitsi bupagu.

⁶⁵Murumitsi jaʼ beni amabagandisa uji abimaba tindi yingitsi te na muvagulitsi upagu umosi owivula Ourim na Toummim.

⁶⁶Dibuli diotsu dibaIsrael abamaruyila o buviga dimaba magumana na tosini beji na kama yirieru na magumasiamunu mabatu.

⁶⁷Tsiri utala basalitsi bogu bababaala na babagetu abamaba yisambuali yitosini na kama yirieru na magumarieru na yisambuali. Dutalu dubawimbitsi dumaba kama beji na magumana na bawimbitsi baranu bababaala na babagetu.

⁶⁸Bamaba na kama jina na magumarieru na samo yiranu na tosini yisiamunu na yisambuali yikama na magumabeji maburu.

⁶⁹Basefu bamikuta mipuela bamavega miensili umanisila bisalu urungulila Ndagu Nsambi. Murumitsi amavega tosini mbongu tsilora na magumaranu mamamoyi na kama yiranu na magumarieru mabijungi bibuvagulitsi bupagu.

⁷⁰Basefu bamikuta bamavega magumabeji matosini tsimbongu tsilora na tosini na kama mosi tsikilu tsilora jivema.

⁷¹BaIsrael basusu bamavega magumabeji matosini tsimbongu tsilora na tosini kilu tsilora jivema na magumasiamunu na yisambuali yibijungi bibuvagulitsi bupagu.

⁷²Bavagulitsi bapagu na bisi Levi na bakelisi bamakotulu na bawimbitsi na batu basusu na basalitsi baNdagu Nsambi diwendi rie: baIsrael botsu bamayenagabuga mutu mutu o musiengi andi. Tsungi jimusambuali jihotola baIsrael bamaba o misiengi miogu.