Read Punu Esther 3 Bible Online

Esther 3 - Punu bible

Esther 3

¹Mambu meni manovioga Kaga Xerxes amavega musuga uotsu ombu Haman muana dibaala uHammedata mutegula uAgag. Amamuvega yitsiga yiduyitsu ayimaviolila bibasefu bandi botsu.

²Baneni botsu bakaga bamakutama na bamagudama va gusu Haman mu mbari dimanimu na kaga. Tumba Mardochee amabusa ukutama vo ugudama.

³Baneni basusu bakaga bamawivula Mardochee rie:

⁴Dibandu yi guilensili diruma dikaga? Bamamusiembanga yilumbu na yilumbu ujaba yeri Mardochee owarisa kingu andi tumba asamabagulu. Bamayeditsingula Haman ujaba adi ovaga mu mbari Mardochee amabatsingula kala rie: Nyiji muJuif.

⁵Haman amalaba yiri Mardochee amabusa ukutama nesi ugudama va gusu andi. Amanyoga tindi kabu.

⁶Asamanyoyila yika Mardochee tumba baJuif botsu abamatsananga mu bufumu buotsu bukaga Xerxes.

⁷Mu tsungi jitega ajinengulungu tsungi Nisan mu yilima yiyigumi na bibeji bikaga Xerxes, Haman amabuaga mbanda ajimanengulungu Pourim ujaba yilumbu na tsungi uvaga diandi. Mbanda jimagaanga tsungi jiyigumi na beji ajinengulungu tsungi Adar.

⁸Mbana Haman amatsingula kaga Xerxes rie: Aa kaga, o biari biotsu bibufumu buagu vavu batu aberuyila o dilongu dimosi na bana migaga amiviakini na mibatu botsu na bagekipi migaga miagu. Divu diwelimina ubasila nana?

⁹Pa kaga elabi divu diwelimina asoni muganda aguirumi rie: Baboki! Nyuwakisa kama yirieru tsitona tsilora tsivema ombu baneni bagu yiri botsikotisa mu bilundulu biagu.

¹⁰Kaga amagusula moru andi na amaguwakisa ombu Haman agumavinanga baJuif; amaba muana dibaala uHammedata na mutegula uAgag.

¹¹Kaga amamutsingula rie: Kelisa lora tsiagu tsivema. Mbe ka batu bebaba ngebakipi; bavayili nana guirondili.

¹²Mu yilumbu yiyigumi na birieru bitsungi jitega bamanengila basonitsi bakaga; na musuga uHaman bamasonina baneni bakaga na barumitsi babiari biotsu na basefu babatu botsu na nsonogulu tsiogu na mambembu mogu. Bamagusona mu diina dikaga Xerxes na bamana miga yilimba yimoru andi.

¹³Bilumbi bimawenda yiari na yiari bikaga na miganda mieni. Mimasona rie: Bokisanu baJuif botsu, duyabalasa yingeba; babokianu, nesi mufudu nesi yinunu nesi muana ugeyi nesi mugetu na kindanu bima biogu. Diuvagu mu yilumbu yiyigumi na birieru bitsungi jiyigumi na beji ajinengulungu tsungi Adar.

¹⁴Muna miganda mieni mimasonugu mugaga agumasamunu yiari na yiari na agumaruma batu botsu uba bakunsama uviva yilumbu yieni.

¹⁵Nana kaga amarumina, bilumbi bimayenawenda mbangu; mbana mugaga eni umasamunu o Suse. Bakaga na Haman bamatsana unuanganga tumba mtisiengi uSuse umaba yika kumfu na kumfu.