Read Punu Esther 4 Bible Online

Esther 4 - Punu bible

Esther 4

¹Mardochee anogulu adimavagu amapasa biduaru biandi na amaduara siela na amagolila dibufu. Mbana amatsiengil amusiengi uyenagamuganga na munyongu.

²Anotola va gusu ndagu kaga, amasikama; mutu uotsu agumaduara siela amagandusu uyekota.

³O biari biotsu abi bamagulu mugaga ukaga, baJuif bamalabanga munyongu uneni; bamabusa uji, bamalilanga na bamanyonganga na bapuela bamaduara basiela na bamasilama va dibufu.

⁴Basalitsi babagetu baEsther na mivangu miandi bamayemutsingula dionyi; mugatsi kaga amakambulu tindi ukambulu. Amatindila Mardochee biduaru umuduisa yiri ovula siela andi tumba asamabigaru.

⁵Mbana Esther amanengila Hatak muvangu umosi va gari mivangu ami kaga amamuvega. Amamuruma uyewivula Mardochee rie: Dibandu yi guivayili nana?

⁶Hatak amarasuna Maidochee va gusu ndagu kaga.

⁷Mardochee amamutsingula diotsu adimalabana na amamutsingula durangu dulora tsivema adu Haman amavangana upodula o yilundulu yikaga pa baJuif botsu bobokulu.

⁸Amamuvega muganda umugaga agumasamunu o Suse mu diambu didubungu dubaJuif; amamuruma ugulasa Esther nomujabisa motsu. Va julu vana alembiyili Esther uwenda ombu kaga uyemuwivula umulasa yingeba nomuwamusa mu diambu dibatu bandi.

⁹Hatak amagabuga ombu Esther.

¹⁰Esther amaruma Hatak uyetsingula Mardochee mambu memama rie:

¹¹Basalitsi botsu bakaga nesi batu botsu bayiari na yiari bikaga bejabi yiri vavu mugaga aguiveyi mbela dufu ombu mutu uotsu, nesi dibaala nesi mugetu, aguikoti ombu kaga o tindi yibuku yiandi pa asamanengulungu. Jandi agukaga osamba muansu ulora odila monyu. Tuka tsungi, nyisakamuenengulungu ombu kaga.

¹²Mambu maEsther manoyetsingulu Mardochee,

¹³amamuwagula rie: Guitasi yika ndeʼ buandi va gari baJuif botsu agugoboku mu mbari guitsani o ndagu kaga?

¹⁴Pa ndeʼ guba sui namunyi baJuif bowamusu na mutu ususu; bowaku kalala. Tumba jenu na bisi ndagu taji agu dubungana! Digorungula uba yiri mu diambu diedidi guvu mugatsi kaga?

¹⁵Esther amamuetinda yilumbi uyetsingula Mardochee rie:

¹⁶Wenda yegukiga baJuif botsu abavu o Suse, dukabusa uji mu diambu diami. Duyaji na duyanu ne yima yiotsu te na bilumbu birieru. Meʼ wami nyubusa uji nesi basalitsi bami wandi. Mbana nyuwenda ombu kaga, diuleba vavu mugaga, nyukota ombu gandi; pa nyufu, nyufu!

¹⁷Mardochee amayenawenda, amavaga adi Esther amavosa.