Read Punu Esther 6 Bible Online

Esther 6 - Punu bible

Esther 6

¹Mukolu eni kaga amaba na dukanda. Kabogu amanengila mutu ubega Dibuku Dirangumunu; bamamurangila dionyi.

²Bamaranga amamasonugu mu diambu diBigtan na Terech abamaba baneni bakaga nesi bakelisi bamakotulu abamaronda uboka kaga Xerxes na nana Mardochee amatubulila fundu.

³Kabogu kaga amawivula rie: Mu dionyi, digoba yi Mardochee amadila? Yisaku yi amadila? Basalitsi bakaga bamawaka rie: Asamadila yima.

⁴Mbana kaga amawivula rie: Anyi avu va dulombili? Uvosa akivosa na Haman amakota o tindi ndagu kaga. Amaruga uyiwivula kaga musuga ulelisa Mardochee.

⁵Basalitsi bakaga bamamuwaka rie: Haman avu va gusu kana. Kaga amaruma rie: Akoti.

⁶Haman anokota kaga amamuwivula rie: Yi nyuvayila mutu agu nyirondi ugobisa? Haman amatasa rie: Mutu susu nyi agu kaga ogobisa? Tsiri meʼ beni?

⁷Kabogu Haman amawagula rie: Kaga pa guirondi ugobisa mutu,

⁸bonga yikutu yiagu ayi ndeʼ beni guiduaringi na kabala agu na dugaba duagu nobiwakisa ombu basefu bagu baneni;

⁹bomuduisa biduaru bibukaga nomumatisa va julu kabala agu nomulinsa o yiari na yiari bimusiengi, boyenagamuganga va gusu andi rie: Labanu nana kaga egobisili mutu!

¹⁰Kaga amaruma Haman rie: Diwelimina, lensa nobonga yikutu na kabala nana gubanovosila, gukadivayila Mardochee muJuif aguitsani va gusu ndagu ami. Guyalibana ne dimosi mu motsu ama gubanovosa.

¹¹Haman amabonga yikutu na kabala na amaduisa Mardochee, amamulinsa va julu kabala utsiengila dulombili dumusiengi na amayenagamuganga va gusu andi rie: Labanu nana kaga egobisili mutu!

¹²Mardochee amagabuga uyetsana va gusu ndagu kaga na Haman amasundila ugabuga o ndagu andi na munyongu na amakegumba tsanda.

¹³Haman amatsingula mugatsi andi Zerech na bambatsi bandi botsu adi amalaba. Bamamuwaka rie: Pa gumabanda usundusu va gusu Mardochee muJuif, jaba yiri gugolunga, gumabetsu kala.

¹⁴Uvosa mbe bakivosa na bilumbi bimatola uyemulanda o mulambu agu Esther amamuelambisa.