Read Punu Esther 8 Bible Online

Esther 8 - Punu bible

Esther 8

¹Muna yilumbu yieni kaga amavega mugatsi andi Esther biotsu biHaman muvinitsi ubaJuif. Mbana Mardochee amanengulu ombu kaga mu mbari Esther amatubula nana bamabila bukulu bumosi.

²Kaga amagusula moru andi agu amapatula Haman na amaguduisa Mardochee. Mbana Esther amawakisa Mardochee biotsu biHaman.

³Mbana Esther amamuevosa na kaga. Amakebuaga va makulu mandi na amalila nomulembyila utsiemusa diruma diHaman mutegula uAgag adi amavayila uboka baJuif.

⁴Kaga amasamba muansu ulora ombu Esther agumaretsama.

⁵Amamuevosa rie: Kaga pa guilabi diwelimina undasa yingeba na durondu, basoni miganda amiuvinsa mambu amamasonu mu miganda miHaman muana dibaala uHammedata mutegula uAgag amimaburombisa baJuif abavu o biari biotsu bikaga uboku.

⁶Trie nyuwarila diguga adiugaanga batu bami? Tsie nyulabila batu bami dibokulu?

⁷Kaga Xerxes amawaka mugatsi andi Esther na Mardochee muJuif rie: Nyimalelisa Haman mu mbari amaburombisa baJuif dufu na nyimaguwakisa biotsu biHaman.

⁸Muganda agumasonugu mu diina diami na umanamugu yilimba yimoru ami ugovinsu, via! Soninanu baJuif nana duilabili mu diina diami mbana dukaminamiga bilimba bimoru ami.

⁹Mu yilumbu yimagumabeji na birieru bitsungi jimurieru diwendi rie: Sivan, basonitsi bakaga bamanengulu. Na musuga uMardochee bamasonina baJuif na baneni bakaga na barumitsina basefu bakama na magumabeji na yisambuali yibiari ubandila o Inde te no Ethiopie. Bamamisona na nsonogulu tsiogu na mambembu mogu bibaJuif.

¹⁰Bamamisona mu diina dikaga Xerxes na bamaminamiga na yilimba yimoru andi. Bamamitinda na babeyitsi babakabala abamamata bakabala bakaga.

¹¹Na miganda mieni kaga amavega baJuif musuga utoyisa jogu abamaronda ubaboka. Amabavega musuga ubokisa abamabatumuna, batu yika la batu babiari biotsu bikaga tsiri ubalasa yingeba.

¹²Amabavega musuga ubokisa bagatsi bogu nesi baana bogu nokinda biogu biotsu. Motsu mana movagu mu yilumbu yimosi o biari biotsu bikaga Xerxes, mu yilumbu yiyigumi na birieru bitsungi Adar.

¹³Miganda mieni mimasonugu diruma adimasamunu yiari na yiari ulubusa batu yiri muna yilumbu yieni baJuif boba na musuga ugabusila batu abebavini pila.

¹⁴Yiotsu ayi kaga amabavega diruma, bilumbi bimamata mu bakabala bakaga na bamawenda mambangu. Diruma dimasamunu o Suse.

¹⁵Mardochee anopala o ndagu kaga na yikutu yibukaga yidumbulu na yivema na dugaba duneni dulora na yijungi yitsanda jilina jiyinyuru ayivu va gari ubenga na dumbulu, bisi Suse bamagamuganga na bamamusangilanga.

¹⁶BaJuif bamabasa tindi ubasa na nsangu na ubueji na bamawimbila nyimbu tsindungulu.

¹⁷O kadi yiari na kadi musiengi mu mbura tsiotsu atsi diruma dikaga dimatola baJuif bamasangilanga na nsangu na bamalambisanga milambu mifeta. Bisi bulongu bapuela bamakevayila baJuif mu mbari bamagaangu na goma jibaJuif.