Read Punu Esther 9 Bible Online

Esther 9 - Punu bible

Esther 9

¹Mu tsungi jiyigumi na beji diwendi rie: tsungi Adar muyilumbu yiyigumi na biranu, diruma dikaga mbe dimadugusulu. Batu abamavina baJuif mbe bamabatsoyisa, tumba disamamueba nana; baJuif bamabatsoyisa.

²BaJuif bamagukama o misiengi miogu o biari biotsu bikaga Xerxes uyenabokanga jogu abamaronda ubaboka. Ne mutu mosi asamarungula ugagana nogu mu mbari botsu bamagaangu na tindi goma.

³Bivunda bibiari biotsu na baneni bakaga na barumitsi na bivunda bibasalitsi bakaga bamawarisa baJuif mu mbari bamalaba Mardochee goma.

⁴Mardochee amaba na mangolu o ndagu kaga na diduma diandi dimanyavanga o biari biotsu mu mbari amaba na tindi mangolu.

⁵BaJuif bamasaka batu botsu na dijenga; bamaba dubudama duneni. BaJuif bamavayila batu abamabavinanga nana bamarondila.

⁶O Suse, baJuif bamaboka kama yiranu tsibabaala, tsiri ubalasa ne umosi yingeba.

⁷Bamaboka Parchanedata na Dalfon

⁸na Aspata na Porata na Adalia na Aridata

⁹na Parmacheta na Arissai na Aridai na Vayezata,

¹⁰diwendi rie: yigumi yibaana bababaala baHaman muana dibaala uHammedata agumavinanga baJuif, tumba basamakinda bima biogu.

¹¹Muna yilumbu yieni dutalu dujogu abamaboku o Suse dumayetsingula kaga.

¹²Kaga amatsingula mugatsi andi Esther rie: BaJuif bamaboka kama yiranu tsibabaala na yigumi yibaana bababaala baHaman o Suse, musiengi uneni; yi bovaga o biari bisusu bikaga? Yi guikwivuli? Ne pa diuba yiasi yibufumu, yiuguvegu.

¹³Esther amawaka rie: Aa kaga, pa guilabi diwelimina, singisa baJuif abavu o Suse umuedugusu diruma namunyi na baleyili yigumi yibamfumbi babaana bababaala baHaman.

¹⁴Adina kaga amaruma. Diruma dimamuesamunu o Suse na bamaleliga yigumi yibamfumbi babaana bababaala baHaman.

¹⁵BaJuif abamaba o Suse bamamuegukama mu yilumbu yiyigumi na bina bitsungi Adar na bamaboka kama yirieru tsibabaala o Suse. Tumba basamakinda bima biogu.

¹⁶BaJuif basusu abamatsananga o biari bisusu bikaga bamagukama utoyisa batu abamabavina. Bamakejeyisa ava bamabokila yigumi na tosini yiranu tsibatu abamabavinanga, tumba basamakinda bima biogu.

¹⁷Mambu meni mamalabana mu yilumbu yiyigumi na birieru bitsungi Adar. Yilumbu yiyigumi na bina baJuif beni bamadunda uboka batu na bamayivaga yilumbu yifeta uyenasangilanga.

¹⁸Diuleba baJuif abamaba o Suse bamagukama yilumbu yiyigumi na birieru na yiyigumi na bina uyenabokanga batu abamabavinanga; bamagusula yilumbu yiyigumi na biranu; bamayivaga yilumbu yifeta uyenasangilanga.

¹⁹La dibandu baJuif bamusiru bevayi yilumbu yiyigumi na bina bitsungi Adar yilumbu yifeta uyenasangilanga notindasananga bima.

²⁰Mardochee amasona mambu meni motsu na amatinda migada ombu baJuif botsu abamaba o biari biotsu bikaga Xerxes, nesi vala nesi bebeli.

²¹Amabaruma ujanganga feta kadi yilima mu yilumbu yiyigumi na bina na yigumi na biranu bitsungi Adar.

²²Muna bilumbu bieni baJuif bamakejeyisa ava bamabokila batu abamabavinanga; muna tsungi eni munyongu ogu umakaluga nsangu na dibi dimakaluga diboti! Vengu bovaga feta uyenasangilanga notindasananga bima nogabilanga bijaga.

²³BaJuif bamakevega udugusu ama Mardochee amabasonina na bamasinga yiri feta aji bamavaga jiukelusungu mutubu.

²⁴Mardochee amabarangimisa rie: Haman muana dibaala uHammedata mutegula uAgag agumavinanga baJuif botsu amatunga fundu ubabokisa. Amabuaga Pourim, munongu mbanda ujaba yilumbu ubabokisa.

²⁵Tumba Esther anowenda ombu kaga, kaga amaruma rie: Dibi adi Haman amatasila baJuif dibi va julu muru andi na alelugu, jandi na baana bandi bababaala.

²⁶La dibandu benengili bilumbu bieni Pourim, diruyili mu Pour, munongu mbanda ajimabuagu. BaJuif bamarangimina adimasonu na Mardochee na motsu ama jogu beni bamalasungu.

²⁷BaJuif bamakevega udugusu bilumbu bieni bibeji yilima na yilima nana bamarumunu na Mardochee; jogu na bategula bogu na jogu abofubananga nogu.

²⁸Bilumbu bieni biurangumunungu nosangilanga te na kula tsiotsu mu kadi mukuta no kadi yiari no kadi musiengi; bilumbu bieni biPourim biyalibunu ombu baJuif nesi bategula bogu bayalibana ubirangimina.

²⁹Esther mugatsi kaga muana mugetu uAbihail na Mardochee bamasona muganda agumubeji uwarisa musuga utega agumasonugu mu diambu diPourim.

³⁰Bamatinda miganda ombu baJuif botsu abamaba o kama na magumabeji na yisambuali yibiari bikaga Xerxes. Mimasonugu ugabila batu duvotsu nobasunsa mirima.

³¹Mimabaruma uvaga feta jiPourim bilumbu bieni nana dimarumunu na Mardochee na Esther; diruma dimatabululu jogu na bategula ukelisanga temu tsiubusa uji na temu tsiunyonganga.

³²Maruma maEsther mamawarisa feta jiPourim; mamasonugu mu dibuku.