Read Punu Ukumuga 10 Bible Online

Ukumuga 10 - Punu bible

Ukumuga 10

¹Fumu amaruma Moise rie: Wenda ombu Pharaon, nyimamuegalisa murima andi na mirima mibasalitsi bandi, yiri nyumuelasa bimaga biami va misu mogu.

²O gusu ndeʼ wagu gutsingulanga baana bagu bababaala na bategula bagu misamu miami nana nyimakilisila bisi Egypte na minongu mibimaga abi nyimabalasa. Jenu wenu dujaba yiri menu la Fumu.

³Moise na Aaron bamawenda ombu Pharaon umutsingula rie: Fumu Nsambi baHebreu jandi rie: Te na temu yi gukesunsila va gusu ami? Dunda batu bami yiri bonsalila.

⁴Pa guibusi udunda batu bami, mugesa nyuruma makokoku ubasa bulongu buagu buotsu.

⁵Mobasa bulongu buotsu te na butamba bugomuelabana, moji mua mugunu agusamabungu na mfula jimamanyi na mojanganga miri miotsu amibendi mu misiru mienu.

⁶Makokoku mobasa mandagu magu nesi mandagu mabasalitsi bagu botsu nesi mandagu mabisi Egypte botsu. Bataji bagu na bakaga bagu basakalaba diambu dimunongu eni ubandila va duburu duogu te na namunyi. Moise amapala o ndagu Pharaon amayenawenda.

⁷Basalitsi baPharaon bamamuwivula rie: Te na temu yi mutu egugu odundila utulasa maguga? Dunda batu beni yiri bosalila Fumu Nsambi ogu. Gugelabi yiri Egypte ubungana jibungini?

⁸Moise na Aaron bamagabusu ombu Pharaon na amavosa nogu rie: Wendanu yesalilanu Fumu Nsambi enu. Nsingulianu, banyi bowenda?

⁹Moise amawagula rie: Tuwenda jetu botsu: bafudu betu na banumba betu na binunu bietu na babaala na bagetu na bindombu bietu na binsabi bietu na bangombi betu; mu mbari jivu feta etu jineni jiuyitsila Fumu.

¹⁰Pharaon amabadesarie: Fumu abi nenu! Menu nyududunda na mikuta mienu wandi? Viaga! Nyidujabi, duna ditasa dibi! Digorungula uba!

¹¹Tsatsabi! Wendanu jenu babaala uyesalila Fumu, adina dumakwivula. Mbana bamababingisa va gusu Pharaon.

¹²Fumu amaruma Moise rie: Samba gogu agu o bulongu buEgypte yiri makokoku mobasa Egypte na moji bivaru biotsu, diwendi rie: biotsu abi mfula jimamanyi jimasila.

¹³Moise amasamba nguangu andi o bulongu buEgypte na Fumu amasingisa punga jiyiari ayi wisi epalili ugumbanga nyangu jiotsu te na mukolu uotsu. Ava kedi punga jiyiari ayi wisi epalili jimabega makokoku.

¹⁴Makokoku mamabasa bulongu buEgypte, mamaba dibumba dineni adisakalabana na kala na digomuelabana disusu dimunongu eni

¹⁵Mamakubiga butamba buotsu, butamba bumaba yika pisama na pisama; mamaji bivaru biotsu na milunda miotsu, diwendi rie: biotsu abi mfula jimamanyi jimasila; nesi birongula bimiri nesi bibivaru o bulongu buotsu buEgypte.

¹⁶Vana vana Pharaon amanengila Moise na Aaron amabatsingula rie: Nyina mbela va gusu Fumu Nsambi enu na va gusu enu wandi.

¹⁷Tumba tandilianu dibi diedidi temu ejiji buandi; sambilanu Fumu Nsambi enu yiriakakisini yivunga yieyiyi yidufu.

¹⁸Moise amapala o ndagu Pharaon mbana amasambila Fumu.

¹⁹Fumu amagumbisa punga jimangolu jiyiari ayi wisi ewendisini, jionyi jimayenagabusa makokoku te na jimamadiamisa mu Mubu uBenga; vasamasiala ne dikokoku dimosi o bulongu buotsu buEgypte.

²⁰Fumu amamuegalisa murima Pharaon na Pharaon asamamuewensa baIsrael.

²¹Fumu amaruma Moise rie: Samba gogu agu o julu, vabi tindi pisama o bulongu buEgypte pisama ajiurungula nesi ubembu.

²²Moise amasamba gogu andi o julu; vamaba pisama jineni o bulongu buEgypte te na bilumbu birieni.

²³Bisi Egypte basamalabasana nesi ulabasana, ne mutti mosi asamaretsama va kana andi te na bilumbu birieru. Tumba kana atsi baIsrael bamatsanina tsimaba yika yijalala na yijalala.

²⁴Pharaon amanengila Moise na amamutsingula rie: Durungula uwenda uyesalila Fumu. Yika bindombu bienu na binsabi bienu na bangombi benu bosiala tumba mikuta mienu miurungula uwenda nenu.

²⁵Moise amavosa rie: Kabogu ndeʼ beni gutuvega abi tuvagulila Fumu Nsambi etu pagu nesi pagu tsiunyensa.

²⁶Migamba mietu miuwenda netu na vagosiala ne yimosi mu mbari abina tusalila Fumu Nsambi etu. Te na tutola tugolejaba abi tusola uvagulila Fumu.

²⁷Fumu amamuegalisa murima uPharaon na Pharaon amabusa ubawensa.

²⁸Pharaon amabinga Moise rie: Pala o ndagu ami! Guyamuelabana nami, yilumbu ayi gumuelabana nami gufu.

²⁹Moise amawaka rie: Ndeʼ beni gumadivosa! Ngomueruga ombu gagu.