Read Punu Ukumuga 11 Bible Online

Ukumuga 11 - Punu bible

Ukumuga 11

¹Fumu amatsingula Moise rie: Nyumuetinda yivunga ayiusita ombu Pharaon nʼombu bisi Egypte. Ayina yinovioga oduwensa; odubinga nesi udubinga.

²Tsingula baIsrael yiri dibaala dibaala ovonda dibaala nandi na mugetu mugetu ovonda mugetu nandi bima bilora jivema na bima bilora.

³Fumu amadetsa mirima mibisi Egypte te na bamagabila baIsrael maboti mogu. Moise jaʼ beni amagengulu mutu muneni o bulongu buEgypte na amakakusu na basalitsi baPharaon te na batu botsu.

⁴Moise amamuevosa na Pharaon rie: Fumu jandi rie: Va gari wisi nyuvioga o bulongu buEgypte.

⁵Tsomi tsiotsu tsibisi Egypte tsiufu, ubanda na tsomi jiPharaon aji mbe jiubialila yitsiga yiandi, te na tsomi jimu viga aguvu o nsima dikusa te na tsomi tsiotsu tsibiruitsi.

⁶Va temu eni o bulongu buotsu buEgypte uba yika migamu na migamu, munongu migamu amisakagulunu na kala na vagomueba migamu mimunongu eni wandi.

⁷Tumba ombu baIsrael botsu ubandila ombu batu te na bibulu vagogulunu ne diufi dimbulu-koku, adina diujabisa duviakusunu adu Fumu evayi va gari bisi Egypte na baIsrael.

⁸Kabogu basalitsi bagu botsu botasuna na bogudama va gusu ami novosa rie: Wenda na batu bagu botsu. Mbana nyuwenda. Mbana Moise amapala o ndagu Pharaon na kabu jineni.

⁹Fumu amatsingula Moise rie: Diuleba Pharaon obusa mambu magu adina diufunisa bimaga biami o bulongu buEgypte.

¹⁰Moise na Aaron bamavaga bimaga bieni biotsu va gusu Pharaon, tumba Fumu amamuegalisa murima uPharaon na Pharaon amabusa upalisa baIsrael o bulongu buandi.