Read Punu Ukumuga 12 Bible Online

Ukumuga 12 - Punu bible

Ukumuga 12

¹Fumu amatsingula Moise na Aaron ava bamabila o Egypte rie:

²Tsungi ejiji jiuba tsungi enu jitega; jiuba tsungi enu jitega jiyilima.

³Tsingulanu dibuli diotsu dibaIsrael rie: Mu yilumbu yimugumi mu tsungi ejiji kadi mukuta ubonga muana yindombu vo yinsabi: ndagu ndagu yindombu yiandi.

⁴Pa mukuta ugaa uneni yiri dugorungula umana yibulu yiotsu, durungula uyiji va mosi na jogu abasinsa ubambana nenu. Diwendi rie: duletala batu nojaba nana mutu mutu ogabulu.

⁵Yiuba yibulu ayigaa na yifu, yimulumi ayikavu yilima yimosi; durungula ubonga muana yindombu vo muana yinsabi.

⁶Duyikelisa te oa yilumbu yiyigumi na muina yitsungi ejiji; mukuta mukuta uyiboka va tsisiga.

⁷Dubonga malungu mayibulu, dumasinga mu makutu motsu mabeji na mu migunda mimunu ndagu yika la ndagu aji duyiji;

⁸vana mukolu eni duji nyama tsigoku; dutsiji na mapa amagaa na dufunusu na magaji manduli.

⁹Duyatsiji mbisu, duyatsilamba, tumba tsiugoku na muru na bakondu na bigari.

¹⁰Duyasuega biguji te na kedi; pa vosiala biguji dukabinyensa.

¹¹Ava duji mulambu duduara babeleeti na bapondu na dukagaanga manguangu, dukaji mbangu mbangu. Aguna la mulambu ufeta Paque jiFumu.

¹²Vana mukolu eni nyuvioga o Egypte na nyuboka tsomi tsiotsu tsibisi Egypte, ubanda na tsomi tsibatu te na tsibiruitsi na nyutabulila bansambi botsu babisi Egypte bunsonsi. Menu la Fumu.

¹³Maiungu meni moba yilimba o mandagu ama jenu duba; ava nyulabila malungu nyuvioga kuasa, yivunga yigodubunga ava nyukilisila bisi bulongu buEgypte.

¹⁴Durangiminanga yilumbu yieni na duyikelisanga feta jiukitsila menu Fumu; duyikelisanga jenu na bategula benu te na mutubu.

¹⁵Mu yisambuali yibilumbu dujanganga mapa amagaa na dufunusu. Ubanda na yilumbu yitega duyamueba na dufunusu o mandagu menu. Ubanda na yilumbu yitega te na yimusambuali, mutu uotsu oyiji mapa amavu na dufunusu ogusulu mu dutalu dubaisraei.

¹⁶Yilumbu yitega duba na tindi yibenguna yiNsambi na mu yilumbu yimusambuali wandi. Duyasala ne yisalu yimosi mu bilumbu bieni; yika ulamba biguji bimutu mutu.

¹⁷Dukelisanga feta jimapa amagaa na du-funusu, la mu yilumbu yieni nyimapalisila batu benu o bulongu buEgypte. Dukelisanga mugaga egugu: jenu na bategula benu dukelisanga yilumbu yieni te na mutubu.

¹⁸Mu tsungi ajitega ava tsisiga jiyilumbu yimagumabe-ji na yimosi duyajanganga mapa amagaa na dufunusu.

¹⁹Duyakelisa dufunusu o mandagu menu te na yisambuali yibilumbu; mutu uotsu ne muenyi ne muIsrael aguji mapa amavu na dufunusu ogusulu mu dutalu dubaIsrael.

²⁰Duyaji mapa amavu na dufunusu; o mandagu menu motsu, dujanganga yika mapa amagaa na dufunusu.

²¹Moise amanengila bivunda biotsu biIsrael, amabaruma rie: Yesolanu yibulu yiPaque noyiboka yiri mikuta mienu miujanganga mulambu uPaque.

²²Mbana dukabonga bitsafinyi biyisopa. Dukabiputiga mu malungu mayibulu amavu mu nsienga, dukabonga malungu meni nomasinga mu migunda na mu makutu amavu o munu ndagu. Ne mutu mosi ayapala o ndagu te na kedi.

²³Ava Fumu ovioyila uboka bisi Egypte, yiotsu ayi olabila malungu mu migunda na mu makutu motsu mabeji ovioga kuasa va miunu mimandagu, agosingisa mubungitsi ukota o mandagu menu uyenabokanga abenu.

²⁴Jenu na baana benu dukelisanga motsu mana mugaga te na mutubu.

²⁵Ava dutolila o bulongu abu Fumu amavangana pangini uduvega, dukelisanga yifu yieyiyi yingitsi.

²⁶Ava baana benu boduwivulila rie: Ayina divindugulu yi?

²⁷Dukabawagula rie: Ayina yivu pagu ajimavagululu Fumu va temu Paque. Ava baIsrael bamabila o Egypte, Fumu amaboka bisi Egypte tumba amavioga kuasa va gusu mandagu metu, diwendi rie: amawaka mikuta mietu kalala. Kabogu baIsrael bamagudama uyenayitsa Fumu.

²⁸BaIsrael bamayenawenda na bamavaga motsu ama Fumu amaruma Moise na Aaron.

²⁹Ava gari wisi Fumu amaboka tsomi tsiotsu o bulongu buEgypte, ubanda na tsomi jiPharaon aji mbe jiubialila yitsiga yiandi te na tsomi jimuviga aguvu o tsugu te na tsomi tsiotsu tsibiruitsi wandi.

³⁰Va gari mukolu Pharaon na basalitsi bandi na bisi Egypte botsu bamarambuga; vamaba migamu mineni o Egypte, mu mbari vasamaba ne ndagu jimosi ajisamabokisa mutu.

³¹Vana mukolu eni Pharaon amanengila Moise na Aaron na amabatsingula rie: Gusuganu o bulongu buami jenu na baIsrael. Wendanu yesalilanu Fumu nana dumavosila.

³²Bonganu bindombu bienu na binsabi bienu na bangombi benu nana dumavosila; wendanganu, tumba kabilianu miula.

³³Bisi Egypte bamagamuga rie: Lensanu, wendanganu! Yika tsie jetu botsu tufu?

³⁴La dibandu baIsrael bamanangulila matuka mogu mbe masakavi nesi uvi. Bamapieta bidu biogu mu biduaru biogu, bamabinangula va masambaka mogu.

³⁵BaIsrael bamavaga adi Moise amabaruma, bamavonda bisi Egypte bima bilora jivema na bima bilora na biduaru.

³⁶Fumu amadetsa mirima mibisi Egypte te na bamagabila baIsrael maboti mogu, nana bamabawivulila. Anana baIsrael bamakindila bisi Egypte.

³⁷BaIsrael bamarambuga o Ramses, bamawenda o Soukot: dutalu duogu dumaba bebeli na kama yisiamunu tsitosini tsibabaala tsiri utala bagetu na baana na binunu.

³⁸Yinombu yineni yibatu baminongu na minongu bamawenda va mosi nogu; bamaba na imigamba mineni wandi mibindombu na mibinsabi na mibangombi.

³⁹Bamavaga mapa mageyi amasamaba na dufunusu na matuka meni amamarambuyila nogu o Egypte, ama mbe masakavi nesi uvi; mu mbari bamabingu o Egypte, basamatsikadana na basamabega biguji bisusu.

⁴⁰Bilima bibaIsrael o Egypte bimaba kama jina na magumarieru.

⁴¹Vana disukusulu dikama jina na magumarieru mabilima, muna yilumbu yieni batu baFumu bamagusuga o bulongu buEgypte muna mukuta mukuta.

⁴²Mukolu egugu ukelusungu mu mbari muna mukolu eni Fumu amapalisila batu bandi o bulongu buEgypte, dedi mosi baIsrael na bategula bogu bokelisanga mukolu eni urangiminanga Fumu.

⁴³Fumu amatsingula Moise na Aaron rie: Guluanu maruma maPaque amama rie: Muenyi uotsu ayaji mulambu uPaque.

⁴⁴Gureba muviga agumasumbu na mbongu mbana orungula uji mulambu uPaque.

⁴⁵Tumba muenyi na musalitsi bayaji mulambu uPaque.

⁴⁶Yibulu yiPaque yiuligu yika o ndagu; guyapalisa nyama o ndagu na guyabula ne yivisi yimosi.

⁴⁷Dibuli diotsu dibaIsrael diuji mulambu uPaque.

⁴⁸Pa muenyi aguitsani o ndagu agu erondi uji mulambu uPaque jiFumu nesi babaala botsu abetsani muna vengu bolerebu mbana borungula uji mulambu uPaque, mbana bogengulu nana nderi bavu baIsrael; tumba ne mutu mosi agusarebu ayaji mulambu uPaque.

⁴⁹Voba diruma dimosi ombu baIsrael nesi ombu muenyi aguitsani nenu.

⁵⁰BaIsrael botsu bamavaga motsu ama Fumu amaruma Moise na Aaron.

⁵¹Muna yilumbu yieni Fumu amapalisa baIsrael o bulongu buEgypte muna mukuta mukuta.