Read Punu Ukumuga 14 Bible Online

Ukumuga 14 - Punu bible

Ukumuga 14

¹Fumu amatsingula Moise rie:

²Ruma baIsrael bagabuyi noyevaga milaku va gusu Pi-Hahirot va gari Migdol na mubu, va nsungisini na Baal-Sefon; duvaga milaku va mugula mubu.

³Pharaon otasa yiri jenu baIsrael dumatsiemuga, kumu jimadunyambasana.

⁴Kabogu nyugalisa murima Pharaon, oduduka. Nyulasa Pharaon na mabadi mandi mangolu mami ava nyubagudisila. Mbana bisi Egypte bojaba yiri nyivu Fumu. BaIsrael bamavaga nana bamarumunu.

⁵Bamatsingula kaga Egypte yiri baIsrael bamarina. Mbana Pharaon na basalitsi bandi bamagabusa mirima nsima mu diambu dibaIsrael; bamavosa rie: Dibandu yi tumabawensila? Tugokambulu na bisalu?

⁶Pharaon amakunsa dikalu diandi, jogu na batu bandi bamayenasogama.

⁷Amabonga kama yisiamunu tsimakalu na bangogaga na makalu motsu masusu maEgypte amamabega batoyitsi.

⁸Fumu amagalisa murima Pharaon kaga jiEgypte agumadukilila baIsrael. BaIsrael bamapala o Egypte na mangolu maneni maFumu.

⁹Bisi Egypte bamabaduka; bakabala botsu na makalu maPharaon na babeyitsi bamakalu meni na dibadi diandi, bamabarasuna va milaku miogu va mugula mubu o yiari yiPi-Hahirot, va nsungisini na Baal-Sefon.

¹⁰Pharaon anobambana nogu, baIsrael bamabuaga misu na bamalaba bisi Egypte yika uduka bebaduki; kabogu bamagaangu na goma jineni te na bamagamuyila Fumu.

¹¹Bamawivula Moise rie: O bulongu buEgypte ugaa bangila? Dibandu yi gutsitubeyila uyifuila o kumu? Dibandu yi gutsitupalisila o Egypte?

¹²Tsiri nana tumalegutsingulila o Egypte rie: Uviolila ubueji pa tusalila bisi Egypte tsiri ufuila o kumu, mbeʼya?

¹³Moise amabawagularie: Duyalaʼ keri! Warisanu mirima! Fumu oduwaka kalala namunyi! Bisi Egypte aba duilabi namunyi, dugomuebalaba o gusu te na mutubu.

¹⁴Fumu odutoyila, jenu dugotoga!

¹⁵Fumu amawivula Moise rie: Migamu mieni dibandu yi? Vosa na baIsrael rie: Sogamanu!

¹⁶Ndeju bonga nguangu agu samba gogu agu o mubu, pasa mubu, mbana baIsrael bosunda mubu agumakamuga kala.

¹⁷Menu nyugalisa mirima mibisi Egypte yiri jogu wogu boduduka; mbana nyulasa bundumba buami ava nyugudisila Pharaon na dibadi diandi diotsu na makalu mandi na babeyitsi bandi babakabala.

¹⁸Bisi Egypte bojaba yiri menu la Fumu ava nyulasila bundumba buami nogudisa Pharaon na makalu mandi na babeyitsi bandi babakabala.

¹⁹Yiansa yiNsambi ayimawendanga va gusu baIsrael yimavinga va nsima ogu; na dimungi dimuji adimarelanga dimavinga va nsima ogu wandi.

²⁰Dimavinga va gari bisi Egypte na baIsrael. Dimungi dieni dimuji dimaba pisama ombu bamosi tumba ombu basusu dimaba yika yijalala na yijalala ayimabamonitsa mukolu. Bisi Egypte na baIsrael basamabambana mukolu uotsu.

²¹Moise amasamba gogu andi o mubu mbana Fumu amasindila mubu na punga ajimaruyila o yiari ayi wisi epalili ajimagumbanga na mangolu maneni mukolu uotsu; amakamusa mubu. Mamba mamapasiga,

²²baIsrael bamasunda mubu agumakamuga, mamba mamaba nderi bibaga yiari na yiari.

²³Bisi Egypte bamabaduka; bakabala botsu baPharaon na makalu mandi na babeyitsi bandi bamakalu, jogu wogu bamabaduka o mubu.

²⁴Ava mavuvungi Fumu jidimungi na dimungi dimuji amalabilila bisi Egypte na amabapupisa mirima.

²⁵Amapakula makulu mamakalu mogu na amarangisa muendu ogu, mbana bisi Egypte bamavosa rie: Turinianu! Fumu uwamusa ewamusi baIsrael, agaa netu.

²⁶Fumu amaruma Moise rie: Samba gogu agu o mubu; mamba modiamisa bisi Egypte na makalu mogu na babeyitsi bogu na bakabala.

²⁷Moise amasamba gogu andi o mubu ava mavuvungi, mubu umamuebanda bukanyi buandi na bisi Egypte bamaweliga urina; tumba Fumu amadiamisa bisi Egypte o gari mubu.

²⁸Mamba mamamuebasa na mamadiamisa makalu na babeyitsi babakabala na dibadi diotsu diPharaon adimaduka baIsrael o mubu; botsu bamaguda.

²⁹Tumba baIsrael bamavioga va gari mubu ukamuga, mamba mamaba yiari na yiari nderi bibaga.

³⁰Muna yilumbu yieni Fumu amawakila baIsrael kalala ombu bisi Egypte; va disimu baIsrael bamalabilila mfumbi tsibisi Egypte atsimaba layini o mubu.

³¹BaIsrael bamalaba mangolu maFumu ama amalasa ombu bisi Egypte. BaIsrael bamaduma Fumu na bamavayila Fumu na musalitsi andi Moise yitu.