Read Punu Ukumuga 15 Bible Online

Ukumuga 15 - Punu bible

Ukumuga 15

¹Mbana Moise na baIsrael bamawimbilila Fumu duimbu duedudu rie: Nyuwimbilila Fumu mu mbari amalasa bundumba buandi, Amadiamisa bakabala na babeyitsi bogu!

²Fumu avu mangolu mami na dibandu diduyitsu duami; Jandi amakobula. Jandi avu Nsambi ami; nyumuyitsanga; Jandi avu Nsambi taji ami, Nyumugobisanga.

³Fumu avu mutoyitsi umangolu. Diina diandi divu Fumu.

⁴Amabuaga o gari mubu makalu maPharaon na dibadi diandi; bangogaga baEgypte bamadiamusu o Mubu uBenga.

⁵Mibiji mimabadiamisa: bamadiama o tsi mamba nderi mamanyi.

⁶Fumu, dikaka diagu dimabaala dimalasa mangolu magu! Fumu, dikaka diagu dimabaala dimabelisa bavinitsi bagu.

⁷Na bundumba buagu buneni gumabelisa bavinitsi, gumalasa kabu agu, ajimaba nderi muji agumasielasana.

⁸Gumavotsa yika uvotsa, mamba mamagukama muwigu umarelama nderi bibaga na mibiji mimakita o gari mubu.

⁹Muvinitsi amavosanga rie: Nyubaduka na nyubadala, nyubapatula abiogu, pila ami jiudugusu, nyusomuna dijenga mbana nyubaboka.

¹⁰Tumba ndeʼ Fumu gumavptsa punga agu mubu umabadiamisa. Jogu botsu bodiama o tsi mamba nderi biumbu.

¹¹Fumu, bansambi bapuela bavu tumba nsambi yi jivu dedi nagu? Anyi avu dedi nagu mu bunsambi? Anyi avu uwelimina ukakusu? Anyi avu uwelimina uvaga bimaga?

¹²Gumasamba gogu agu umabaala: butamba bumabamina!

¹³Na yingeba yiagu gumawendisa batu bagu gumabawaka kalala na mangolu magu gumababega o bulongu bupangini.

¹⁴Batu bamadigulu na bamaregama; goma jimagaanga baPhilistin wandi.

¹⁵Bivunda biEdom bimagaangu na goma, batoyitsi baMoab bamaregama tindi uregama; bisi Canaan botsu bamabakama mirima.

¹⁶Keri na goma bimabagaanga. Aa Fumu mangolu magu mamabarombisa uba sui nderi dimanyi te na batu bagu bamasabuga! Te na bosabuga ngensa, batu aba ndeʼ beni gumakesumbila.

¹⁷Ndeju gubabega na gubatsanisa va julu mukongu aguvu disiala diagu, va mbura aji ndeʼ Fumu gumakunsila yitsanunu yiagu, Mbura Nsambi aji ndeʼ beni Fumu gumasunda.

¹⁸Fumu, guvu kaga te na mutubu!

¹⁹Bakabala baPharaon na makalu mandi na babeyitsi bandi babakabala bamasunda o gari mubu, na Fumu amabagulasana na mubu; tumba baIsrael bamavioga va mbura jikamuga o gari mubu.

²⁰Miriam yibusi yiAaron agumaba mubiyitsi amabonga ndungu, bagetu botsu basusu baIsrael bamamudukanga na bandungu bogu noyenayinanga.

²¹Miriam amabawimbisa rie: Wimbililanu Fumu, Amalasa mangolu mandi; Amadiamisa bakabala na babeyitsi bogu o mubu.

²²Moise amasoyiga baIsrael va Mubu uBenga. Bamawenda o yiari yikumu jiChour; bamamana bilumbu birieru o kumu, tumba basamadila mamba.

²³Bamatola o Mara tumba basamarungula unu mamba maMara mu mbari mamaba nduli. (La dibandu mbura eni jimanengululungu Mara.)

²⁴BaIsrael bamatatila Moise rie: Yi tunu?

²⁵Moise amagamuyila Fumu; Fumu amamulonsa muiri agu amabuaga mu mamba na mamba mamabueji. Avana Fumu amabaveyila migaga na maruma, avana wandi amabaweliyila.

²⁶Fumu Nsambi amavosa rie: Pa guidedili diufi diami tindi udedila, na pa guivayi amavu mawelimina va gusu ami na pa guiliyi matuji ugulu maruma mami na pa guikelisi migaga miami miotsu, kabogu ngogunamusu maali ama nyimanamusu bisi Egypte; mu mbari menu la Fumu oyigubelusi.

²⁷Bamatola o Elim agumaba yigumi na bileka bibeji na magumidusambuali mamambari. Bamavaga milaku va mugula mamba.