Read Punu Ukumuga 16 Bible Online

Ukumuga 16 - Punu bible

Ukumuga 16

¹Dibuli diotsu dibaIsrael bamasogama va Elim mu yilumbu yiyigumi na biranu yitsungi jimubeji ubandila ava bamapalila o Egypte, bamatola o kumu jiSin ajivu va gari Elim na mukongu uSinai.

²Ava bamabila o kumu dibuli diotsu dibaIsrael bamatatila Moise na Aaron.

³BaIsrael bamabawivula rie: Dibandu yi Fumu asamatubokisila o bulongu buEgypte? Je aguna tumalaba kunyi? Tsia tumagukurungu? Jenu dumatubega o kumu ejiji uyitubokisa botsu na nsala.

⁴Fumu amatsingula Moise rie: Nyudubondusila mapa ameruyili o julu. Batu bomabolanga mawelimina yilumbu na yilumbu; nyubaweliga na nyulaba yeri bokelisanga maruma mami vo pa bagomakelisanga.

⁵Mu yilumbu yimusiamunu ava bolambila ama bamabola, bolaba yiri mamafuna temu beji.

⁶Moise na Aaron bamatsingula baIsrael botsu rie: Ava tsisiga dujaba yiri Fumu agumadupalisa o bulongu buEgypte.

⁷Mugesa kedi dulaba bundumba buFumu mu mbari amagulu mitatu mienu ami dumamutatila. Dibandu yi dutatila jetu bangana?

⁸Moise amavosa rie: Na tsisiga Fumu oduvega banyama, kedi odugukurusu mapa mu mbari Fumu amagulu mitatu ami dumamutatilanga. Jetu tuna diambu? Mitatu mienu migetugengili, migengili Fumu.

⁹Moise amatsingula Aaron rie: Tsingula dibuli diotsu dibaIsrael rie: Bambananu ombu Fumu mu mbari amagulu mitatu mienu.

¹⁰Ava Aaron amavosilanga na dibuli dibaIsrael, kabogu bamageluga o yiari yikumu na bamasundila ulaba bundumba buFumu mu mamungi.

¹¹Fumu amavosa na Moise rie:

¹²Nyimagulu mitatu mibaIsrael. Batsinguli rie: Ava tsisiga duji banyama, mugesa kedi dugukuru mapa; mbana dujaba yiri menu nyivu Fumu Nsambi enu.

¹³Va tsisiga banguali bamabasa milaku miogu, na va kedi disala dimanoga utsiengila milaku.

¹⁴Ava disala dieni dimakamuyila vamasiala bima bigeyi o kumu abimabagunu na tsangu, diwendi rie: Bima bigeyi abimaba nderi manogu.

¹⁵BaIsrael bamabigengila na bamawivusana rie: Abina yi? Mu mbari basamajaba diina dibima bieni, Moise amabatsingula rie: Amana la mapa ama Fumu eduveyi.

¹⁶Guluanu adi Fumu amaruma rie: Mutu mutu akabola biwelimina nandi, diwendi rie: Bietsu birieru vo bina, duduka dutalu dubatu benu, mutu mutu obonga biwelimina na bisi ndagu andi.

¹⁷Anana baIsrael bamavayila; jogu botsu bamabibola, bamosi bamaviosulila, basusu yika mua pesu.

¹⁸Mbana bamabiweliga na bietsu birieru vo bina, jandi agumaviosulila ubola asamadila uviolila, jandi agumabola mua pesu asamakambulu. Mutu mutu amabola biwelimina uji.

¹⁹Moise amabatsingula rie: Ne mutu mosi ayabisuega te na kedi.

²⁰Bamosi basamadedila Moise, vamaba batu abamasuega bimosi te na kedi; mbana bayinyi bamabikuta, biotsu bimabiva. Moise amabanyoyila.

²¹Ubongila va temu eni, kadi kedi mutu mutu amabola biwelimina uji, tumba ava nyangu jimabalila bionyi bimasulumuganga.

²²Mu yilumbu yimusiamunu mutu mutu amabolanga biwelimina na bilumbu bibeji, diwendi rie: bietsu bisiamunu vo yinana. Bivunda bidibuli bamayeditsingula Moise.

²³Moise amabatsingula rie: Adina Fumu amaruma mu mbari mugesa uvu yilumbu yiuvuma, tsona jivu yingitsi yiFumu, lambisanu abi duvu na nsala ulamba na royisanu abi duirondi uroyisa mbana dusuega bionyi abiusialulu te na kedi.

²⁴Bamabisuega te na kedi nana Moise amabarumina; biotsu bisamabiva, na bayinyi basamabikuta.

²⁵Moise amavosa rie: Bijianu namunyi, mu mbari yivu yilumbu yitsona uyitsila Fumu; namunyi dugorungula ubidila o kumu.

²⁶Dubibolanga mu bilumbu bisiamunu; tumba yilumbu yimusambuali yivu yitsona, bigoba.

²⁷Mu yilumbu yimusambuali, batu bamosi va gari ogu bamawenda uyebibola, tumba basamabidila.

²⁸Mbana Fumu amawivula Moise rie: Temu yi dumabandila ubusa udedila maruma mami na migaga miami?

²⁹Rangimina yiri Fumu amaduvega yilumbu yitsona uvuma, la dibandu eduveyili biguji bibilumbu bibeji mu yilumbu yimusiamunu. Vengu mutu mutu otsana va mbura andi mu yilumbu yimusambuali.

³⁰Kabogu mu yilumbu yimusambuali batu botsu bamatsana.

³¹BaIsrael bamaluga yiguji yieni manna. Yimaba yigeyi nderi tsangu tsivema ayimaba na mugangu nderi mapa amamavagu na buji.

³²Moise amavosa rie: Guluanu adi Fumu amaruma rie: Bietsu birieru vo bina biubasu manna nosuegulu bategula benu, yiri jogu bolaba mapa ama nyimadulisila o kumu ava nyimadupalisila o bulongu buEgypte.

³³Moise amaruma Aaron rie: Bonga yivagulu na yibasi na bietsu birieru vo bina na yibasi na manna, yisunsi va gusu Fumu yiri yiusuegulu bategula benu.

³⁴Aaron amadedila diruma adi Fumu amaruma Moise, diwendi rie: amayisunsa va gusu yigara yipangini uyisuega.

³⁵BaIsrael bamajanganga manna magumana mabilima, te na bamatola o bulongu abu bamatsanina; bamajanganga manna te na bamatola o mandilu mabulongu buCanaan.

³⁶Yietsu yimanna yimaba kilu jina ayimaba yimosi mu yigumi yiefa.