Read Punu Ukumuga 18 Bible Online

Ukumuga 18 - Punu bible

Ukumuga 18

¹Muvagulitsi upagu uMadian diina diandi Jethro agumaba boji buMoise amagulu motsu ama Fumu Nsambi amavayila Moise na batu bandi baIsrael; amagulu wandi yiri Fumu amapalisa baIsrael o Egypte.

²Jethro amayegabusa Sefora, mugatsi Moise agumalegusulu.

³Amayegabusa baana babeji baSefora wandi; umosi diina diandi Guerchom, Moise amavindiga dionyi rie: Nyiji muenyi o bulongu bungana.

⁴Ususu diina diandi Eliezer, divindugulu rie: Nsambi taji ami amakwamusa, amakwaka kalala ava Pharaon mbe ambokila.

⁵Jethro na baana beni na mugatsi uMoise bamarasuna Moise o milaku amimaba o kumu bebeli na mukongu uNsambi.

⁶Amaruma mutu uyetsingula Moise rie: Menu boji buagu Jethro, uruga nyiruyi ombu gagu jetu na mugatsi agu na baana bagu babeji bababaala.

⁷Moise amayebengusana boji buandi, amayegudama na amayemubumba; bamatsingusana misamu miogu mbana bamakota o ndagu Moise.

⁸Moise amatsingula boji buandi motsu ama Fumu amavayila Pharaon na bisi Egypte botsu mu diambu dibaIsrael, na nana bamalabila maguga mu nsila na nana Fumu amabawakila kalala.

⁹Jethro amalaba nsangu ava amagululu motsu ama amavayila baIsrael na nana amabawakila kalala ombu bisi Egypte.

¹⁰Jethro amavosa rie: Diboti ombu Fumu agumaduwaka kalala ombu bʼisi Egypte nʼombu Pharaon agumawaka jenu baIsrael kalala.

¹¹Mbana nyimajaba yiri Fumu aji muneni uviolila bansambi botsu, mu mbari mbivulu tsibisi Egypte tsimabagabuyila.

¹²Jethro amavagulila Nsambi pagu jiunyensa na pagu tsisusu wandi. Aaron na bivunda biIsrael bamayejiji va mosi na boji buMoise va gusu Nsambi.

¹³Ava kedi Moise amatsana utabulila batu bunsonsi, batu bamaba diteli va gusu andi kedi kedi te na tsisiga.

¹⁴Boji buMoise amalaba motsu ama amavayila batu, mbana amamuwivula rie: Yi guivayi na batu bebaba? Dibandu yi guitsanini wagu pinsa na batu botsu baji diteli va gusu agu kedi kedi te na tsisiga?

¹⁵Moise amawagula boji buandi rie: Batu beruyi ombu gami uyigulu diufi diNsambi.

¹⁶Pa bana mua mambu beruyi ombu gami; nyigulu miunu miogu, mbana nyibajabisi maruma maNsambi na migaga miandi.

¹⁷Boji buMoise amamutsingula rie: Adi guivayi digaa diboti.

¹⁸Gudeda, na gudetsa basusu wandi mu mbari yisalu yimaguviolila gugorungula uyisala wagu pinsa.

¹⁹Gulu diufi diami, nyirondi ugulonsa. Nsambi abi nagu! Ba yikambi yibatu baIsrael ombu Nsambi, nobega mambu motsu ombu gandi.

²⁰Balonsi maruma na migaga; balonsi bifu abi vengu bokipanga, na adi vengu bovaganga.

²¹Va julu vana sola babaala bawelimina abedumi Nsambi: abavu basunda na abagesingi ufutu usuega dibi; bavayi basefu babatosini, na babakama na bamagumaramaranu na badigumi digumi.

²²Jogu batabulilingi batu bunsonsi; jogu bogubeyila yika mambu maneni, tumba jogu beni botabula mua mambu mageyi. Geyisa yisalu yiagu, jogu baguwamusi.

²³Pa guivayi nana na pa Nsambi edisingi guba uwelimina na yisalu, mbana batu bebaba bogabuga na nsangu o mandagu mogu.

²⁴Moise amadedila diufi diboji buandi na amavaga motsu ama amamutsingula.

²⁵Moise amasola babaala baIsrael amabavaga basefu babatosini ba babakama na bamagumaramaranu na badigumi digumi.

²⁶Jogu bamatabulilanga batu bunsonsi, bamabeganga yika mambu maranga ombu Moise, jogu beni bamatabulanga mambu motsu mageyi.

²⁷Moise amaganina boji buandi; Jethro amayenagabuga o bulongu buandi.