Read Punu Ukumuga 19 Bible Online

Ukumuga 19 - Punu bible

Ukumuga 19

¹Yilumbu yitega yitsungi jimurieru banopala o bulongu buEgypte, baIsrael bamatola o kumu jiSinai.

²Bamarambuga o Refidim na bamatola o kumu jiSinai na bamavaga milaku o kumu va nsungisini na mukongu.

³Moise amamata uyevosa na Nsambi. O julu mukongu, Fumu amavosa nandi rie: Gukavosa na bisi ndagu Jacob na baIsrael botsu rie:

⁴Dumalaba adi nyimavaga o Egypte, nana nyimadubeyila nami nderi mbira oyibeyingi baana bandi.

⁵Kabogu pa duigulu diufi diami na pa duikelisi pangini ami jenu duba tindi batu bami mu mbari butamba buotsu buvu abuami.

⁶Duba yifumba yiami yibavagulitsi bapagu na dilongu adiukevega usala yisalu yiami. Amana la mambu ama gutsingula baIsrael.

⁷Moise amagabuga o milaku na amanengila bivunda biIsrael na amabatsingula mambu meni motsu nana Fumu amamurumina.

⁸Batu botsu bamawagula rie: Tuvaga motsu ama Fumu amaruma. Moise amatsingula Fumu mambu mabatu.

⁹Fumu amatsingula Moise rie: Gulu, nyuruga ombu gagu va gari dimungi dineni yiri batu bokulu ava nyuvosila nagu, mbana boguvayila yitu. Moise amamuetsingula Fumu mambu mabatu.

¹⁰Fumu amaruma Moise rie: Gabuga ombu baIsrael; baliomisi namunyi na mugesa, basusi biduaru biogu wandi.

¹¹Babi bakunsama mu yilumbu yimurieru; va gusu batu botsu nyusunduga va julu mukongu uSinai.

¹²Gutsiengila mukongu na gubatabulila mandilu, na gubalubusa rie: Kebananu, duyamata va julu mukongu, vo ne ubemba mukongu eni, mutu uotsu agubemba mukongu eni aboku,

¹³tumba bayamubemba bomutindila mamanyi vo bomunonga mbansa: ne yibulu, ne mutu oyibembi mukongu aboku. Ava mumbanda usigulu jogu bobambana na mukongu.

¹⁴Ava Moise amavindimina mukongu amagabuga ombu batu; amaliomisa batu na jogu bamasusa biduaru biogu.

¹⁵Jandi amatsingula batu rie: Banu bakunsama mu bilumbu birieru; duyafubana bitsiga na bagetu.

¹⁶Ava kedi jiyilumbu yimurieru vamaba bidumi na tsiemu na dimungi dineni o julu mukongu. Diufi dimumbanda dimagulunu, batu botsu abamaba va milaku bamagaangu na goma.

¹⁷Moise amarambusa batu va milaku uyebengusana Nsambi; bamayegukama o banda mukongu.

¹⁸Mukongu uotsu uSinai umaba yika nsumbili na nsumbili mu mbari Fumu amasunduyila va gari muji o julu mukongu; nsumbili jimuji eni jimaronguga nderi nsumbili kangi, na mukongu uotsu umasisana tindi usisana.

¹⁹Diufi dimumbanda dimagulunu tindi ugulunu. Ava Moise amavosilanga, Nsambi amawakanga na bidumi.

²⁰Anana Fumu amasunduyila o tindi julu mukongu uSinai; Fumu amanengila Moise o julu mukongu uSinai. Moise amamata guna.

²¹Fumu amaruma Moise rie: Sunduga, yebagandisa ubambana ombu gami uyegengila; yiri bapuela bagofu.

²²Bavagulitsi bapagu abavu na musuga ubambana nami bakeliomisa wandi yiri ngobaboka.

²³Moise amawaka Fumu rie: Batu bagorungula umata mukongu uSinai mu mbari gumatugandisa kala ava gumavosila rie: Gukatsiengila mukongu notabula mandilu yiri moba mayingitsi.

²⁴Fumu amamutsingula rie: Gabugao milaku mbana dukamuemata jenu na Aaron; tumba bavagulitsi bapagu na batu bayamuesindasana na nsala uruga ombu gami yiri ngobaboka.

²⁵Moise amasunduga ombu batu na amabatsingula mambu meni motsu.