Read Punu Ukumuga 21 Bible Online

Ukumuga 21 - Punu bible

Ukumuga 21

¹Fumu amabuesa rie: Migaga misusu ami gubavega amimi:

²Pa gusumba muviga uHebreu, osala bilima bisiamunu tumba mu yilima yimusambuali ojegusu tsiri ufuta yima.

³Pa amakota palata o buviga opala palata; pa amaba na mugatsi, mugatsi andi opala nandi.

⁴Pa fumu andi amamuwelila na amabura baana bababaala na babagetu, mugatsi na baana boba bafumu andi tumba muviga jaʼ beni opala.

⁵Pa muviga ovosa rie: Nyirondi fumu ami na mugatsi ami na baana bami ngerondi upala,

⁶fumu andi omubega ombu Nsambi mbana omubambasana va dikotulu dindagu vo dikutu na fumu andi omutoba dituji na mutobu. Ubanda va temu eni muviga oba muviga mutubu.

⁷Pa mutu osumbisa muana andi umugetu, agopala o buviga nana baviga basusu bopalila.

⁸Pa agelasi fumu andi ubueji, agumatasa umubonga mugatsi andi, omusingisa ukobulu; tumba agaa na musuga umusumbisa ombu benyi, dionyi digaa disogana na migaga.

⁹Pa amamusolila muana andi omukelisa nana mugaga uirumini ukelisa baana babagetu.

¹⁰Pa mutu owelana na mugetu agumubeji agogandisa mugetu utega ne diambu dimosi: nesi biguji nesi biduaru nesi ufubana yitsiga.

¹¹Pa jandi agemuvayili mambu meni marieru, mugetu orungula uboka diwela tsiri ufuta tsombu.

¹²Jandi agudimbisa dibaala kuba te na ofu jaʼ wandi aboku.

¹³Pa tsiri murambu amamurambila na pa Nsambi amasinga yiri olaba diambu dieni, nyumukunsila mbura aji osuemina.

¹⁴Tumba pa mutu ovayila mutu nandi dibi nosoga diela umubokila, guyemugaanga nesi va yinyensulu yiami yipagu nomuboka.

¹⁵Jandi agudimba taji andi vo nguji andi aboku.

¹⁶Jandi agudaga mutu na omusumbisa vo umukelisa jaʼ beni, aboku.

¹⁷Jandi agusienga taji andi vo nguji andi aboku.

¹⁸Pa batu botsunda na umosi va gari ogu odimba ususu dimanyi vo yigaba, ne pa agaafu tumba aji va tangi,

¹⁹ava osimbuyila nobanda ulinga na nguangu jandi agumamudimba agokilusu ofuta yika temu aji agaarungula usala nomubuyisa te na obeluga.

²⁰Pa fumu odimba muviga andi udibaala vo umugetu nguangu na muviga eni ofu vana vana, fumu eni akilusu.

²¹Pa agaasundila ufu yilumbu yitega vo yimubeji fumu eni agokilusu; amamusumba na mbongu tsiandi.

²²Pa batu botsunda na pa bogubana mugetu aguvu na dimi na adina diumurombisa uviosa moji, pa agofu, jogu bofuta dufunu adu mulumi umugetu eni obafunina, bomufutila va gusu bansonsi.

²³Tumba pa ofu bosoga miuru,

²⁴disu na disu mosoga miuru, dinu na dinu mosoga miuru, dikaka na dikaka mosoga miuru, na dikulu na dikulu mosoga miuru,

²⁵unyensa mbatsi jaʼ wandi ogunyensa, utsungula mbatsi jaʼ wandi ogutsungula, ufubula mbatsi jaʼ wandi ogufubula.

²⁶Pa mutu odimba muviga andi udibaala vo umugetu mu disu na orombisa disu diandi utobiga, omupalisa o buviga mu diambu didisu diandi.

²⁷Pa amadokula muviga andi udibaala vo umugetu dinu omupalisa o bu viga mu diambu didinu diandi.

²⁸Pa ononga dibaala vo mugetu masiyi na mutu eni ofu, ngombi eni jiuboku na mamanyi, nyama ngombi eni jigoligu, na fumu ngombi agokilusu.

²⁹Tumba pa ngombi eni jimalenonganga batu masiyi na pa bamalubusa fumu andi na jandi asamajibamba na jiumueboka dibaala vo mugetu ngombi jiuboku na mamanyi na fumu andi oboku wandi.

³⁰Pa bovega fumu eni dufunu ukekobula, ofuta biotsu abi orumu ufuta.

³¹Ava ngombi jiutsungulila muana dibaala vo muana mugetu mugaga eni udugusu;

³²tumba pa ngombi eni jiutsungula muviga, nesi dibaala vo mugetu, fumu ngombi ofuta magumarieru mambongu ombu fumu muviga, ngombi eni jiuboku na mamanyi.

³³Pa mutu osupulila yiduna yimamba vo pa atsitima yiduna yimamba yigona na ageyidibiyi mbana ngombi vo buru obonduga o gari yiduna yieni,

³⁴fumu yiduna yieni ofutila fumu yibulu yieni, jandi anofuta obonga yibulu ayimafu.

³⁵Pa ngombi jiunonga ngombi ngana masiyi te na ajimanongu masiyi jiufu bosumbisa ngombi ajivu monyu na bogabana mbongu; na bogabana na ngombi ajimafu wandi.

³⁶Tumba pa dimajabunu yiri yifu yingombi eni yimaba unonganga batu masiyi na fumu andi asamajibambanga, fumu eni ovinsa ngombi ajivu monyu na jandi obonga ajimafu.

³⁷Pa mutu amadaga ngombi vo yindombu vo yinsabi na oyiboka vo usumbisa, ofuta ngombi yiranu mu ngombi mosi vo bindombu bina mu yindombu yimosi vo binsabi bina mu yinsabi yimosi.