Read Punu Ukumuga 22 Bible Online

Ukumuga 22 - Punu bible

Ukumuga 22

¹Pa mudayitsi amatsukugu ava amabulila ndagu na pa odimbu te na ofu agumamudimba agoba na mbela mu diambu didufu duandi;

²tumba pa diambu dimalabana nyangu agumamudimba oba na mbela jidufu duandi. Pa agaafu ogabusa abi amadaga; pa agaa na yima, osumbusu mu diambu diudaga uandi.

³Pa ayimadagu yikivu monyu, nesi ngombi nesi buru nesi yindombu nesi yinsabi oyigabusa nobuesa yisusu va julu.

⁴Pa mutu osingisa mugamba andi ukota o gari manungi mangana mamunongu na munongu umabivisa kabogu ovega biboti bimanungi mandi ufuta abi mugamba andi umabivisa.

⁵Pa mutu onyensa kangi ajiulava te nonyensa mawansi nonyensa tsangu tsible atsivu mu bibutu na atsikivu mu nungi te na nungi jiotsu jiunyenga, jandi agumanyensa kangi eni ofuta biotsu.

⁶Pa mutu ovega mutu nandi mbongu vo yima yisusu umusueyila na yiudagu o ndagu andi, pa mudayitsi ogaangu oyigabusa kumbu beji.

⁷Pa mudayitsi agogaangu, fumu ndagu owenda ombu Nsambi, uyeleva yiri asamadaga yima yimutu nandi.

⁸Mu misosi miotsu yeri mingombi yeri miburu vo miyindombu vo miyinsabi vo miyiduaru vo miyima ayimatsiemuga ayi bovosila rie: Yima yieni arayi! Botsu babeji abavu mu musosi eni bobegu ombu Nsambi; jandi agu Nsambi ovega mbela ogabusila ususu kumbu beji ayimadagu.

⁹Pa mutu ovega mutu susu yima yiotsu umukelisila: nesi buru nesi ngombi, nesi yindombu nesi yinsabi nesi yibulu yika la yibulu na va julu vana yibulu yieni yiufu vo yiutabuga yilema vo yiutsiemuga,

¹⁰mutu nandi vengu oleva pesi mu diina diFumu yiri jaʼ beni asamabonga yima yingana. Fumu yibulu yieni vengu osinga pesi eni, mbana mutu nandi agaafuta yima.

¹¹Tumba pa yibulu yimadagu tindi udagu, mukelisi uyionyi ofutila fumu yionyi.

¹²Pa yibulu yimaligu na yibulu yibukanyi, mukelisi uyionyi olasa yilimba, mbana agofutila fumu yionyi mu mbari amalasa yiri yimaligu na yibulu yibukanyi.

¹³Pa mutu osomba yibulu ombu mutu susu, va julu vana yibulu yiutabuga yilema vo yiufu o nsima kodu fumu andi, vengu yiufutu.

¹⁴Pa dionyi dimalabana va misu mafumu yionyi, disawelimina yiri yiufutu. Pa yibulu yimavondu na ditasa ufuta, dufunu adumatabulu duba duwelimina nesi pa yiufu.

¹⁵Pa dibaala omingila tsiemi ajisakakumu munu novaga bumbembu nandi vengu omuwela novega taji andi madila.

¹⁶Pa taji tsiemi atsibusa umuwetsa nandi dibaala dieni ofuta dufunu duwelimina mu mbari amabivisa tsiemi.

¹⁷Boka nganga jimugetu.

¹⁸Mutu uotsu agufubana yitsiga na yibulu aboku.

¹⁹Jandi oyivaguli pagu tsiandi ombu bansambi bangana aboku mu mbari agetsivagulili Fumu.

²⁰Guyalasa muenyi maguga na guyamukambisa; mu mbari ndeʼ wagu gumaba muenyi o bulongu buEgypte.

²¹Guyalasa mukuili maguga, nesi yisiana.

²²Pa guibalasi maguga, na pa bokamuyila nyubagulu,

²³kabu ami jiulabana na nyudubunga na dijenga, mbana bagetu benu boba bakuili na baana benu boba bisiana.

²⁴Pa guisombisi mbongu ombu batu bami abavu bijaga abitsani nagu guyabanganga nana basombisitsi basusu aberombi udila mbika.

²⁵Pa gubonga yikutu yimutu nagu tuga, gumugabusila yionyi ne wisi akatsima;

²⁶mu mbari yivu mfunga andi ajimukubiyi dunyuru: yima yi okegumba? Pa okamuyila nyumugulu mu mbari nyivu mungo yingeba.

²⁷Guyasabula diina diami menu aguvu Nsambi agu na guyasienga barumitsi.

²⁸Guyatsikadana upagulila biumanga biagu biotsu. Gupega tsomi agu jidibaala.

²⁹Gupega tsomi tsingombi tsiagu na tsibindombu biagu na tsibinsabi biagu; biuletsana yisambuali yibilumbu na banguji bogu; yilumbu yimunana gubipega.

³⁰Dubanganga tindi batu baNsambi. Duyaji nyama atsimavopulu o musiru; dukatsibuayila bamondi.