Read Punu Ukumuga 23 Bible Online

Ukumuga 23 - Punu bible

Ukumuga 23

¹Guyanyavisa mamfurulu. Guyafubana na batu babi usingisila bumbeji bumfurulu.

²Guyafubana na yinombu uvaga dibi; ava gusingisila bumbeji mu temu betabuli mambu guyagaru yinombu uguduta utsiemusa dusungugu.

³Guyagengila bufufu buyijaga ava guitabulili diambu diandi.

⁴Pa gubenguna na ngombi jimutu oyiguvini vo nesi buru andi ajimatsiemuga, gukamubeyila jionyi.

⁵Pa gulaba buru jimutu oyiguvini jimaviku na mufuna guyatsikadana ujigusulila mufuna eni vengu guwamusa muvinitsi eni.

⁶Bujaga bumutu buyaguruma utsiemusa dusungugu duandi ava evosili diambu.

⁷Guyagulu bafuritsi na guyabokisa agugaa na diambu vo aguvu usungama mu mbari ngeveyi ndunga ombu aguvu na mbela.

⁸Guyasinga milendu mu mbari milendu miveyi buduka ombu jogu abavu na malubu na mibivisi mambu mabatu basungama.

⁹Guyakambisa muenyi oyitsani nagu, ndeʼ beni guijabi buenyi mu mbari ndeʼ wagu gumaleba muenyi o bulongu buEgypte.

¹⁰Mu bilima bisiamunu guvaranga na gu-tsonsiganga digumba.

¹¹Tumba yilima yimusambuali gukasila nungi agu, jiuba difutu; bijaga abivu nagu biulaba nsangu na bibulu biuji abiusialulu muna. Guvaga munongu mosi na nungi agu jirayisan na jimioliva.

¹²Gusala bisalu biagu biotsu mu bilumbu bisiamunu tumba guvuma mu yilumbu yimusambuali: nesi ngombi agu na buru agu biudila yivumu wandi, nesi muana muviga agu na muenyi bovuma wandi.

¹³Gukelisanga motsu ama nyimagurumanga. Tsatsabi guyaranguna miina mabansambi basusu: mayarangunu ne urangunu nagu.

¹⁴Kumbu yirieru yilima na yilima gujanganga bafeta barieru ukitsila.

¹⁵Feta jitega aji gukelisanga feta jimapa amagaa na dufunusu yisambuali yibilumbu mu temu ajimakunsu jitsungi nsumbi, gujanganga mapa amagaa na dufunusu nana nyimagurumina mu mbari gumapalila o Egypte mu tsungi eni; mutu ayalabana nami miogu na miogu.

¹⁶Mbana gukelisanga feta jibiumanga ava gudokulila tsangu tsitega o nungi agu; na feta jidutsonsugu ava gugumbiyila digumba diagu.

¹⁷Kumbu yirieru yilima na yilima babaala botsu bokelasa va gusu ami, menu aguvu Fumu Nsambi agu.

¹⁸Guyasobana mapa amavu na dufunusu na malungu mayibulu ayimapagululu pagu jiduyitsu; matsi mayibulu ayimapagululu pagu mayasuegu te na kedi.

¹⁹Gubega milunda miumanga o ndagu Fumu Nsambi agu. Guyalamba muana yinsabi mu dile dinguji andi.

²⁰Gulu nyisindiyi yiansa o gusu agu ayiugukelisa muna nsila nogutolisa o mbura aji nyimakunsa.

²¹Muyitsi na dedila diufi diandi, guyagagana nandi mu mbari agogutanda bumbini buagu mu mbari avu na diina diami.

²²Tumba pa gugululu diufi diandi liyiyi na pa guivayi motsu ama nyuguruma menu Fumu nyuba muvinitsi ubatu abeguvini na mutumunitsi-paga ubatu abetumuni paga nagu.

²³Yiansa yiami owendanga va gusu agu o bulongu buotsu nʼombu baAmor nʼombu baHitt nʼombu baPerizie nʼombu bisi Canaan nʼombu baHivie nʼombu baJebusie na nyubabunga tindi ubunga.

²⁴Guyakutimina bansambi bogu na guyabasalila, guyagukuyila batu beni tumba gubabunga tindi ubunga nobula tindi ubula bitumba biogu.

²⁵Dusalilanga menu Fumu Nsambi enu mbana nyudugabila miula nesi biguji binuigu na nyukakasana ubela uotsu va gari enu.

²⁶Mu bulongu buenu bugoba nesi mugetu aguisuyi mioji nesi yinguma. Nyudugusu bilima bienu.

²⁷Nyureyimisa batu abegayini nenu; nyurombisa kumfu va gari batu abedutoyisi te na bavinitsi benu botsu bodurina.

²⁸Nyuretsa banyosi va gusu enu abobinga baHivie na bisi Canaan na baHitt vala nenu.

²⁹Ngodivaga mu yilima yimosi yiri bulongu bugokaluga kumu nobasa de na bibulu na bibulu.

³⁰Nyubinganga bavinitsi benu pesu pesu te na bokakana vala nenu na dufunanga te na dudila tindi udila bulongu.

³¹Nyukunsa mandilu: ubandila o Mubu uBenga te no mubu ubaPhilistin, ubandila o kumu te no mujamba. Nyuduwakisa bisi bulongu na dubabinga.

³²Duyavangana pangini nogu nesi na bansambi bogu.

³³Duyabasingisa utsana va mosi nenu o bulongu mu mbari bodurombisa uvaga masumu noyitsa bansambi bogu na dionyi diuba nderi murambu ombu genu.