Read Punu Ukumuga 24 Bible Online

Ukumuga 24 - Punu bible

Ukumuga 24

¹Nsambi amatsingula Moise rie: Matanu o julu mukongu ombu gami, jenu na Aaron na Nadab na Abihou na magumidusambuali mabivunda biIsrael. Mbe dusakaweʼ vala kutamanu.

²Yika ndeʼ Moise gubambana nami; abamaruga nagu bayabambana ne pesu; botsu basusu bayamata ne umata.

³Moise amagabuga ombu baIsrael na misamu miotsu miFumu na migaga wandi. Batu botsu bamawagula na diufi dimosi rie: Tudedila maruma motsu maFumu.

⁴Moise amasona mambu motsu maFumu. Mbana amarambuga kedi jineni amarunga yinyensulu yipagu o banda mukongu na amareliga yigumi na mamanyi mabeji mayigumi na bifumba bibeji biIsrael.

⁵Amasindiga bafudu baIsrael uyevagulila Fumu pagu tsiunyensa noboka balumi babangombi bapagu tsikabusulu tsimaboti.

⁶Moise amabonga malungu mamosi ama amawitila mu bansienga na amatsatsa mamosi va yinyensulu yipagu.

⁷Amabonga dibuku dipangini na amadiranga va gusu batu botsu; baIsrael bamawaka rie: Tudedila motsu ama Fumu atsiruma na tukipanga maruma mandi.

⁸Moise amabonga malungu ama amatsatsa batu ava amavosila rie: Amama la malungu mapangini aji Fumu amavangana nenu dedi mosi nana amavosila.

⁹Mbana Moise amamata o julu mukongu jogu na Aaron na Nadab na Abihou na magumidusambuali mabivunda biIsrael.

¹⁰Bamalaba Nsambi Israel. O tsi matambi mandi umaba nsila ajimavagu na mamanyi madufunu duneni masafira amamaba dumbulu nana julu.

¹¹Bivunda bieni biIsrael Nsambi asamababoka; bamamulaba na misu mogu bamaji na bamanu va gusu andi.

¹²Fumu amaruma Moise rie: Ruga o julu mukongu ombu gami, sikama vana. Nyuguvega bibuku bimamanyi ama nyimasona migaga na maruma abi gulonsa baIsrael.

¹³Moise amarelama, jogu na Josue, agumamusalilanga na Moise amamata o julu mukongu uNsambi.

¹⁴Amaleganina bivunda rie: Tukelisianu vava te na tugabuga. Aaron na Hour bosiala nenu; pa mutu oba na diambu akayeditsingula ombu gogu.

¹⁵Kabogu Moise amamata o julu mukongu na dimungi dimagumba mukongu.

¹⁶Bundumba buFumu bumakubiga mukongu uSinai, dimungi dimagukubiga te na bilumbu bisiamunu. Mu yilumbu yimusambuali Fumu agumaba o gari dimungi amanengila Moise.

¹⁷BaIsrael bamalabilila bundumba buFumu o julu mukongu nderi muji aguisielisini.

¹⁸Moise amakota o gari dimungi, amamata o julu mukongu, amayetsana magumana mabilumbu na magumana mamikolu.