Read Punu Ukumuga 25 Bible Online

Ukumuga 25 - Punu bible

Ukumuga 25

¹Fumu amatsingula Moise rie:

²Wivula baIsrael umbeyila pagu tsiogu. Mutu uotsu aguvu na murima ukwakisa pagu atsimbeyili.

³Pagu atsivu tsiwelimina ukwakisa atsitsi; lora na lora jivema na kunga;

⁴na matsanda maboti maminongu na minongu madumbulu na mayinyuru ayivu va gari dumbulu na ubenga na mabenga na mionyi miyinsabi;

⁵na mikata mibindombu amimabensu na mibinsabi na muiri uakasia

⁶na matsi mamangasa na miyombu mimatsi madubiatsu na mipagu tsisusu;

⁷na onikisa na mamanyi masusu madufunu duneni ubuejisila yijungi yibuvagulitsi bupagu na mfunga jitulu.

⁸BaIsrael botungila mbura Nsambi yiri nyutsananga va gari ogu.

⁹Dukatungila ndagu yibenguna na bisalulu biandi biotsu nana nyugulonsila.

¹⁰Bagomini yigara yipangini na tsimbi tsiakasia; usakama uyionyi uba kama na magumabeji na santimetera yiranu, uroga uyionyi uba magumidusambuali na santimetera yiranu na udonga uyionyi uba magumidusambuali na santimetera yiranu.

¹¹Gukayinamiga tindi lora nesi va julu nesi o gari na gukayivaga lora na lora mu mungongu.

¹²Gukavaga milunga mina milora na gukaminamiga o biari biotsu bibina biyigara yieni; milunga mibeji o yiari yimosi na mibeji o yiari yisusu.

¹³Gukavaga manguangu mabeji ma-akasia gukamanamiga lora.

¹⁴Gukasoma manguangu mu milunga amimanamugu mu migula miyigara, monyi monangululungu yigara;

¹⁵manguangu mokotusu va gari milunga miyigara yipangini; magogusulu, via.

¹⁶Gukapodula bibuku bimamanyi ama nyusona mambu mapangini o gari yigara yieni.

¹⁷Gukagomina yitsiga yiyingeba, ayivu yidibutsu yiyigara yipangini yitindi lora; usakama uyionyi uba kama na magumabeji na santimetera yiranu; uroga uyionyi magumidusambuali na santimetera yiranu.

¹⁸Gukayivaga na bibagunu bibiansa bibeji bilora na gukabibaka lora kodu na kodu tsiyitsiga yiyingeba ayivu yidibutsu.

¹⁹Gukabumba yibagunu yiyiansa muna yidibutsu o kodu mosi na yibagunu yiyiansa yisusu o kodu susu; bibagunu bibiansa na yidibutsu biuba yibuku yimosi.

²⁰Bibagunu bibiansa biusamba mapapi mogu ama biugumbila yitsiga yiyingeba ayivu yidibutsu.

²¹Gukadibiga yigara yipangini na yitsiga yiyingeba ayivu yidibutsu na gukapodula bibuku bimamanyi ama nyusona mambu mapangini o gari yionyi.

²²Avana nyubengunina nagu va julu yitsiga yiyingeba ayivu yidibutsu yiyigara yipangini, va gari bibagunu bibiansa abivu va julu yigara yipangini, avana nyuguveyila maruma mami motsu mu diambu dibaIsrael.

²³Gukagomina tavula na tsimbi tsiakasia, usakama ujionyi uba metera mosi; uroga uba magumaranu masantimetera na muranga uba magumidusambuali na santimetera yiranu.

²⁴Gukajinamiga tindi lora nesi va julu na gukajinamiga lora na lora mu mungongu.

²⁵Gukabuesa mungongu uyavu yinana yisantimetera va mugula tavula na va julu uonyi gubuesa ususu ulora.

²⁶Gukavaga milunga mina milora na gukaminamiga o biari biotsu bibina bimakulu matavula.

²⁷Milunga miuba va mungongu na miukotusu manguangu amonangululungu tavula.

²⁸Gukavaga manguangu mabeji ma-akasia gukamanamiga lora, monyi monangululungu tavula.

²⁹Gukabumba bipela na mamoyi na bambuta na batasi; bionyi biuba bisalulu bipagu jiunu va julu tavula, biotsu bina gukabivaga na tindi lora.

³⁰Va julu tavula gukasunsanga mapa mapagu te na mutubu va gusu ami.

³¹Gukabumba dingasa ditindi lora: dingasa dieni diuba dilora ajimabaku; na dikutu didionyi na yibibili yidionyi na mbuta tsidionyi na bafelera badionyi, diwendi rie: gukabumba biotsu yibuku yimosi.

³²Dingasa dieni diuba na bitayi bisiamunu; bitayi birieru bidingasa o yiari yimosi na bitayi birieru o yiari yisusu yidingasa.

³³Mu yitayi yimosi muba mbuta yirieru atsiuba na bibagunu bimilunda miamandi atsiunamugu milunda na bafelera; mu yitayi yisusu muba mbuta yirieru atsiuba na bibagunu bimilunda miamandi atsiunamugu milunda na bafelera; biuba munongu mosi na bitayi biotsu bisiamunu.

³⁴Mu yibibili yidingasa muba mbuta jina mu bibagunu biamandi abiuba na milunda miogu na bafelera bogu.

³⁵Muba mulunda umosi o tsi bitayi bibeji abivu mu yibibili yidingasa na mulunda ususu va gari bitayi bisusu bibeji; na mulunda ususu va gari bitayi bisusu bibeji; diuba munongu mosi mu bitayi biotsu bisiamunu bidingasa.

³⁶Milunda na bitayi bidingasa biuba yibuku yimosi; biotsu biuba bitindi lora ajimabaku.

³⁷Gukavaga yisambuali yibalambi abovakugu umonitsa o gusu.

³⁸Bitsimusulu bibalambi na bisunsulu bimabufu biuba bitindi lora.

³⁹Dingasa na bisalulu bidionyi biotsu biubonga magumarieru makilu tsitindi lora.

⁴⁰Ndeʼ Moise tsiyisa novaga biotsu abi nyigulonsi va julu mukongu egugu.