Read Punu Ukumuga 26 Bible Online

Ukumuga 26 - Punu bible

Ukumuga 26

¹Gukarunga Ndagu Yibenguna na yigumi yimatsanda maboti madumbulu na mayinyuru ayivu va gari dumbulu na ubenga na mabenga; gukasala na buketi nosona bibagunu bibiansa muna.

²Usakama ukadi tsanda uba yigumi na metera jina; uroga ukadi tsanda uba metera beji; matsanda motsu moba yietsu yimosi.

³Matsanda meni maranu mogukusunu na masusu maranu mogukusunu wandi.

⁴Gukavaga masita madumbulu mu mungongu tsanda ava gumanina ugukasana amatega, guvaga munongu mosi ava gumanina ugukasana amamubeji.

⁵Gukavaga magumaranu mamasita mu tsanda ajitega na gukavaga magumaranu mamasita mu mungongu utsanda ajimubeji; masita meni mamosi mayaviakana na masusu.

⁶Gukavaga magumaranu mamapengana malora na mapengana meni gunamisinina tsanda mosi na jisusu. Ndagu Yibenguna jiuba yibuku yimosi.

⁷Gukavaga matsanda mamionyi miyinsabi na monyi gukavaga ndagu ajimubeji jitsanda aji gukubiyila Ndagu Yibenguna; gukavaga yigumi na tsanda mosi.

⁸Usakama ukadi tsanda uba yigumi na metera yiranu; uroga ukadi tsanda uba metera beji; yietsu yiyigumi na tsanda mosi yiuba dedi.

⁹Gukagukasana matsanda maranu va mosi na masusu masiamunu, gukamagukasana va mosi, ajimusiamunu jiuba va gusu Ndagu.

¹⁰Gukavaga magumaranu mamasita mu mungongu umatsanda amatega ava gumamanina umagukasana mbana gukavaga magumaranu mamasita mu mungongu umatsanda amamubeji.

¹¹Gukavaga magumaranu mamapengana makunga na gukakotisa mapengana meni mu masita. Anana gurungisila Ndagu Yibenguna ajiuba yibuku yimosi.

¹²Matsanda moviogulila Ndagu Yibenguna kabogu mamosi motolusu te no nsima Ndagu.

¹³Bibuku bibametera abiusialulu yiari na yiari yimatsanda maNdagu Yibenguna biufurugu yiari na yiari biNdagu ujikubiga.

¹⁴Gukakubiga Ndagu ajimubeji na mikata mibalumi babindombu amiubensu na mikata mibinsabi.

¹⁵Gukagomba tsimbi tsiNdagu Yibenguna, tsionyi tsiuba tsiakasia atsi gureliga.

¹⁶Usakama ukadi dusimbi uba metera yiranu; uroga ukadi dusimbi uba magumidusambuali na santimetera yiranu.

¹⁷Kadi dusimbi duba na magedulu unamasana dusimbi na dusimbi nandi; gukavaga munongu mosi na tsimbi tsiotsu tsiNdagu Yibenguna.

¹⁸Gukagomba magumabeji matsimbi ugomina yiari yitandu yiNdagu Yibenguna.

¹⁹Gukavaga magumana mamabandu malora jivema o tsi magumabeji matsimbi, diwendi rie: mabandu mabeji o tsi kadi dusimbi; dusimbi dusimbi digedulu diandi.

²⁰Gukamuegomba magumabeji matsimbi ugomina yiari yibanda yiNdagu Yibenguna.

²¹Na magumana mamabandu matsionyi malora jivema, mabandu mabeji o tsi kadi dusimbi.

²²Gukagomba tsimbi yisiamunu ugomnia onsimaNdagu Yibenguna o yiari ayi wisi ewendisini.

²³Gukagomba tsimbi beji urunga bitungu biNdagu Yibenguna o nsima;

²⁴tsiuba beji beji ubandila o tsi na tsiutungu tindi utungu mu makodu na milunga; gukavaga munongu mosi na tsimbi tsiotsu tsibeji atsimagomunu mu bitungu.

²⁵Tsiuba yinana yitsimbi na mabandu matsionyi malora jivema, diwendi rie: yigumi na mabandu masiamunu, mabandu mabeji o tsi kadi dusimbi.

²⁶Mbana gukagomina baweleeti baranu ba-akasia,

²⁷uwarisa tsimbi tsiyibaga yisusu na yiranu tsisusu uwarisa tsimbi tsiyibaga yidikusa o yiari ayi wisi ewendisini.

²⁸Duweleeti adugari dunamasana tsimbi mu bagari ubandila kodu mosi te na kodu susu wandi.

²⁹Gukanamiga tsimbi lora na milunga milora wandi, gukakotisa baweleeti abamanamugu lora muna.

³⁰Anana ndeʼ Moise gurungila Ndagu Yibenguna nana nyigulonsili va julu mukongu egugu.

³¹Gukavaga dumbu dumatsanda maboti amavu madumbulu na mayinyuru ayivu va gari dumbulu na ubenga na mabenga adumasalu na buketi nosonu bibagunu bibiansa muna.

³²Gukaduleliga mu makutu mana ma-akasia amamanamugu lora, makutu meni moba na mapengana malora na mosumu mu mabandu mana malora jivema.

³³Gukaviunsa dumbu na mapengana. O nsima dumbu gukakotisa yigara yipangini; dumbu dukakasana Mbura Nsambi na Mbura Ajivu Tindi Yingitsi.

³⁴O Mbura Ajivu Tindi Yingitsi gusunsila yidibutsu ayivu yitsiga yiyingeba va julu yigara yipangini.

³⁵Gukasunsa tavula va gusu dumbu na gukasunsa dingasa va gusu tavula o yiari yitandu yiMbura Nsambi; diwendi rie: tavula jiuba o banda.

³⁶Va dikotulu diMbura Nsambi gukavaga matsanda masusu maboti amavu madumbulu na mayinyuru ayivu va gari dumbulu na ubenga na mabenga, gukamamaraka.

³⁷Gukavaga makutu maranu ma-akasia, gukamanamiga lora, gukamanamiga matsanda na mapengana malora; gukawarisa makutu na mabandu maranu makunga.