Read Punu Ukumuga 27 Bible Online

Ukumuga 27 - Punu bible

Ukumuga 27

¹Gukagomina yinyensulu yipagu na tsimbi tsimuiri tsiakasia, usakama uyionyi uba metera beji na yibuku; uroga uyionyi uba metera beji na yibuku. Usakama na uroga biyinyensulu yipagu biuba dedi; udonga uyionyi uba metera mosi na yibuku.

²Mu bitungu biotsu bibina gukavaga masiyi amoba yibuku yimosi na yinyensulu yipagu; gukayinamiga kunga.

³Gukavaga yisunsulu yimabufu yiyinyensulu yipagu na bapelu na bansienga na misomu na mbiji tsimuji, gukabumba bisalulu bieni biotsu na kunga.

⁴Gukabumba tasi jikunga va yinyensulu yipagu na gukavaga milunga mina mikunga mu kodu tsijionyi.

⁵Gukajinamiga o tsi mu mugula uyinyensulu yipagu ubandila o tsi te na va gari.

⁶Gukavaga manguangu mayinyensulu yipagu na muiri uakasia, gukamanamiga kunga.

⁷Bakasoma manguangu mu milunga, manguangu meni moba yiari na yiari biyinyensulu yipagu, amuna yiunangululungu.

⁸Yinyensulu yieni yipagu yiuvagu na tsimbi; gukayidonsa va gari; yiuvagu nana gumalonsulu va julu mukongu egugu.

⁹Ndagu Yibenguna jiutsiengusu dulombili. O tandu uvu uwelimina uvaga duonyi na matsanda maboti, usakama umatsanda meni uba magumaranu mametera,

¹⁰amovakugu mu magumabeji mamakutu amavu na magumabeji mamabandu makunga; mapengana mamakutu na manguangu wandi moba malora jivema.

¹¹O yiari yibanda munongu mosi uba matsanda; usakama umonyi uba magumaranu mametera na magumabeji mamakutu na magumabeji mamabandu makunga; mapengana mamakutu na manguangu wandi moba malora jivema.

¹²O yiari ayi wisi ewendisini uba uwelimina na uroga udulombili, diwendi rie: magumabeji na metera yiranu na yigumi yimakutu na mabandu wandi.

¹³O yiari ayi wisi epalili magumabeji na metera yiranu mavu uroga udulombili;

¹⁴yiari yimosi yidulombili yiudibugu yisambuali yimetera na yibuku na matsanda maboti na makutu marieru na mabandu marieru.

¹⁵Yiari yimosi yidulombili yiudibugu yisambuali yimetera na yibuku na matsanda maboti; o yiari ayimubeji na makutu marieru na mabandu marieru.

¹⁶Yiabutsu yidulombili yiuba matsanda maboti mayigumi yimetera madumbulu na mayinyuru ayivu va gari dumbulu na ubenga na mabenga amomaruku. Gukavaga makutu mana na mabandu mana.

¹⁷Makutu motsu amotsiengila dulombili moba na manguangu malora jivema na mapengana malora jivema na mabandu makunga.

¹⁸Usakama udulombili uba magumaranu mametera; uroga ukodu na kodu uba magumabeji na metera maranu; muranga uba metera beji na yibuku; matsanda moba maboti na mabandu moba makunga.

¹⁹Bisalulu biotsu abiusala yisalu yiNdagu Yibenguna na makutu motsu mageyi na mabandu motsu madulombili moba makunga.

²⁰Ndeʼ Moise gukaruma baIsrael ugubeyila tindi matsi maoliva ama gusalisila dingasa yiri gukelisanga balambi abagotsimanga.

²¹O gari Ndagu Yibenguna va gusu dumbu dudugabu aduvu va gusu yigara yipangini, Aaron na baana bandi bababaala bokelisanga balambi yiri bagotsimanga va gusu Fumu ubandila tsisiga te na kedi. BaIsrael na bategula bogu vengu bokelisanga mugaga umutubu te na kula tsiotsu.